Read Pochuri Naga LESARI 19 Bible Online

LESARI 19 - Pochuri Naga bible

LESARI 19

¹Jüma tsotho vü Israel vü kajiwa münyie nüh küsa vü Leviri küsü tü Efraim küzhiho anyu apohtetsatsa vü rho pehveh, ma tü Judah vü Bethlehem vünüh amüsü küsü vi.

²Thinü ma müsü wa tü ma vü arüshutewa nü ma pa zheh Judahvü Bethlehem vü tewa taji jüla asa müzü kümjie pehtewa.

³Jüta teküwa vü ma vüpa tü azhü kümhie ti küza nü sie shelerunti sühra taji ma se nyitewa. Ma nüh ma siepe thi rawuh künyi sienü wa. Jüti sanü ma tü nyimzawa pa zheh vü ru, thi rülawa pa nüh ma ngu ünü ma tü lozheke nü ma mütu nti ru.

⁴Thi ma ku, rülawa pa nüh ma jüla küpeh taji ma tü rülo küchema vü nyipehtewa; jüti sanü masü tü jüla nüh tsa, zhu thi zeh ti sa.

⁵Rülo müzüawa masü tü rüne kümto sühra nü waluo nti küche, thitü rülawa pa nüh ma tühmuowa vü, “Lohse küzah küsü tsanü luoveh sakükhra taji jüsevü nüh waluo,” ti küza.

⁶Jükenüh masü tü shupeh nü kürü tsa thi zhu taji rülawa pa nüh ma vü, “Sütavü hala peh nü noh luoveh saküzhe luo,” ti küza.

⁷Jütiküsa vü ma nüh sühra nü wa nti küsa vü ma ku nüh ma tü jüla zeh le üti ma vü khri.

⁸Jüti küsa vü ma tü rülo münga tsetewaluo nti rüne kümto sühra; thinü rülawa pa nüh, “Noh luoveh saküzhe nü rülawa nüh müküma küju nü küzhike luo,” ti küza. Jükenüh masü khürünga ashie kürü tsa.

⁹Jüsevü anyiwa thi ma müsü wa thi ma siepewa mari küche tü tsetewaluo nti sühra ünü ma ku, rülawa pa nüh ma vü, “Halie, arülowa tü zo nü münüleh vü tetsethuoh; jükenüh hi nüh khuoveh nü rüza ajü küzhike luo; hala zeh luo thi noh luoveh tü külozheluo; jüti sanü thuotü nüh rüne kümto noh letse kenüh sühra nü azheh vü tewaluo,” ti küza.

¹⁰Thitü anyiwa tü jüma rüza jüla müpeh nti sanü sühra taji tsetewa nü Jebus (jüma tü Jerusalem) kürüwie ju. Ma tü rawuhrügi vü küsapewa künyi vi thi ma müsü wa ti sie nü tse.

¹¹Masü tü Jebus shehnyiru ünü rülo küsuo vünüh tewa, thinü siepewa nüh ma vüwa vü, “Raluo, hiri kürü azhie hamari küsü vü shehnyi wa taji rüzawa Gibeah nyuji Rama vünüh küze naveh ünüh,” ti küza.

¹²Jüti küüza vü ma vüwa nüh ma vü, “Hiri tü alienyiri, Israelra nyi mükünyura nyuji vü sühleke küwawa nyu; thitü hiri tü Gibeah vü karitewa naveh,” ti küza.

¹³Jüti sanü ma nüh ma siepewa vü, “Raluo, hiri azhie hamari küsü vü shenyi wa nü Gibeah nyutü Rama vünüh arüzawa küze naveh ünüh,” ti küza.

¹⁴Jükenüh mari tü mari lehvü tsetewa, thi Benjamin azhih Gibeah küshehnyi vünüh rünyi tü tetu,

¹⁵thi tu nü Gibeah vünüh arüzawa tü küze nti wuochuhwuovü küreletewa. Thi ma tü wa nü anyujiwa vü tu nü azhila vü shupeh; küpakenühnyunü arüzawa küze naküsa kenüh nyi küsü nga mari sie nü nyi küsü zhehlo vü nga mütu.

¹⁶Thinü halie, jüma münüleh vü anyikükhruori küsü ma zhuh vü ma küüroh vünüh ru; anyi jüma tü Efraim küzhiho anyu vünüh, thitü ma tü priru Gibeah vü rho, anyiwa azhie tü Benjaminri.

¹⁷Jüti küsa vü ma tü toke nü noküze ünü anyujiwa zhila vü küzehri ngu; jüti küsa vü anyikükhruori nüh, nohri tü khievü wa nti lo? thi khievü nüh tse lo? ti küna.

¹⁸Jüti küüna vü ma nüh, “Hiri tü Judah vü Bethlehem vünüh tsekari Efraim küzhiho anyu pohte vü hi nüh küruwa vü wa nti tselie. Hitü Judah vü Bethlehem vü wa nü eh azheh vü wa nti tse; tü nyiküsü nga hi sie azheh lovü kütu münyielie.

¹⁹Hiri tü hiri rawuh kenüh amaguo thi amüsa pehveh, eh kenüh, noh siepevühwa thi noh siepewa nyikütsewa kenüh ti lohse thi akhah pehveh; zanyo küsü nga mükünyie müsa,” ti küza.

²⁰Thinü anyikhruowa nüh, “Luoveh kürüzihwa no vü peh luo; noh nüh küvingü aveh hi nüh notsü nathuoh ünüh; thitü anyujiwa zhila vü müzeh nüh sanaveh ti küsampa saluo,” ti küza.

²¹Jükenüh ma nüh ma sie ma zheh vü ru nü rawuhwa vü amüsa tsü; thi mari tü mari jih khrü nü tsa thi zhu ti sa.

²²Mari tü mari luoveh saküzhe küveh vü, halie, nyujiwa anyi kümsüri tü ru nü azhehwa awuowuo mükieshe taji amükhie fe nü mari nüh anyikhruowa, azheh vüwa vü, “Noh zheh vü rupeh küvehwa siezhuraluo, jüti sanü hiri nüh ma fethe naveh ünüh,” ti küza.

²³Thinü anyiwa, azheh vüwa tü alievü shuwa nü mari vü, “Nyu, ehjienüri, amüke mümsü sheh tüm, anyi hama eh zheh vü küru ngunü zanyo kümsü hama müsa tüm.

²⁴Halie, hala eh tsa mükürüsa wa thi ma müsüwa pehveh; tinü hitü masü sieküüshuhru luo. Masü newa nü mari sie mowa samhieveh ünüh sie nü saluo; thitü anyi hama vü thuoüji kümsü shehmüsa tüm,” ti küza.

²⁵Thitü anyiri tü ma zhü müküna wie. Jükenüh anyiwa tü mamüsüwa shoh nü alievü mari vü thse nü mari nüh ma siezehm, thi arüne küju arüza ajü ma mürü. Rüne thohrie ru ünü mari tü ma jaküzem.

²⁶Arüne ru ünü nyimzawa tü ru taji ma Vüwa nüh küpeh anyiwazheh mükhie vü müjie kütho küju kulu nü zeh.

²⁷Thinü ma Vüwa tü arüne vü sühra taji azhehwa mükhie sanü maleh vü wa nti alievü shuwa ünü, halie, ma müsüwa tü ma ke akheji vü pake nü zehla.

²⁸Ma nüh nyimzawa vü, “Sühraluo, hisü tewaluo nüh,” ti küza. Thitü ma kürüle zanyoküsü nga müsa. Thinü ma nüh nyimza tü rawuh rügi vü sataji anyiwa tü sühra nü mazheh vü tewa.

²⁹Jüti sanü ma tü ma zheh lovü tu taji anyu vi nü ma müsüwa vü teke taji ma satsa amahnyo vünüh lethuolethuo taji tührakünyi samtü nü Israel zhih aveh vü küze.

³⁰Jüti küsa vü jüma küngu aveh nüh, “Israel nyiri nüh Egypt zhih vünüh shuteküru vünüh nosü küju zanyo hakümjie küsa müjiesa wie, nyutü müjie ngu wie; hama müshenoluo, tsüaluo luo thi phrahte luo,” ti küza.