Read Pochuri Naga LESARI 2 Bible Online

LESARI 2 - Pochuri Naga bible

LESARI 2

¹Jüti küsa vü VÜWA zhühleri tü Gilgal vünüh Bokhim vü tekhru taji ma nüh, “Hi nüh Egypt vünüh nohri vishuru nü nohri pari vü tsü nta küsa zhih hi nüh küshie küsawa vü vishuru taji, Hi nüh nohri sie kütsathuozhüwa piketü küzokhuowa nyu,

²thi nohri tü azhih hala kürhori sie nü kütsathuozhü müsara; nohri tü mari kükhurüperi zochiejam naveh, ti küza. Thitü nohri tü hi nüh azhükütsü müküna nüh sam. Nohri hatü mowa samthuoh lo?

³Jükenüh hi nüh küüza thuoüji, hi tü nohri tüvü nüh mari zhemjara; thitü mari tü nohri mükünongüri küsanaveh, thi mari nyimzari tü nohri küjurü küsü küsanaveh,” ti küza.

⁴VÜWA zhühlewa nüh azhü hamari Israel nyiri aveh vü küza ünü mari jikhi zie kümsie nü krietewa.

⁵Thi mari nüh azhie jüma nyo tü Bokhim (Akükrieri) ti ji nü mari nüh jüla VÜWA vü küsahthuo sa.

⁶Jüti sanü Joshua nüh anyiri saküporie küm vü Israel nyiri tü azhih papa ka vi nti tewa.

⁷Thi anyiri tü Joshua kürhoju thi VÜWA nüh Israelri kenüh küüroh küji küsari aveh küngu Joshua sevü kürho sierhüri rülo aveh vü VÜWA kütsü sa.

⁸Thi Nun atsa Joshua, VÜWA siepewa tü mahvi müzake nü tührake vünüh süm.

⁹Jüti küsa vü mari nüh Gash küzhi zhiehtü wuovü Efraim küzhiho anyu ma ka azhih lovü Timnat Sereri vü chohwum.

¹⁰Thi awuhle jüma aveh nga mari apa vü sezhuh khe nü mari sevü awuhle küpa VÜWA müküthsü nyutü Israelri kenüh ma nüh küürohküsa müküthsü shuteru.

¹¹Jüti küsa vü Israel nyiri tü VÜWA notha vü mowa nü müsüveh ünüh sataji Balri kütsü satewa;

¹²thi mari tü VÜWA, ma pari Saküüwuowa[1] Egyptra zhih vünüh mari siezhu küruwa kulem taji mari natonahuo vü anyi jüla küpehra nyiaza azavü nyiaza küpara sevü nyitewa, thi mari vü küngietsuo nü VÜWA rüsakümtho taji arüsaküshum.

¹³Mari tü VÜWA kulem nü Balri thi Astarte kütsü satewa.

¹⁴Jükenüh Israelri vü VÜWA rüküshuwa tü saküjuzhum taji prükütsara kevü thsem nü mari nüh küüketem, jüti sataji ma nüh mari natonahuo vü pehküveh mari mükünongüra kükhra vüzhum, jüta küsa vü nüh mari mükünongüra tüvü mütsiera nüh sam.

¹⁵VÜWA nüh azhühkhe kütsü kümjie thi VÜWA nüh mari vü küshie küm kümjie mari nüh alievü tsezhuküwa vü VÜWA ke tü kümsüwa kenüh mari vü ruohluo wie; thi mari tü kürhosü sheh.

¹⁶Jüti küsa vü VÜWA nüh lesari vizhu nü mari nüh prüküvira kükhra vünüh mari külole kütsü sa.

¹⁷Thitü jütawie ketünga mari tü mari sierhüra zhü müküna nüh sam; küpakenühnyunü mari tü nyiaza küpari sie küphroküphrie taji mari vü küngiekütsuo kenüh; mari tü mari pari nüh müzheküru lehkhuji vünüh shita khaphrütewa, mari pari thuoüji VÜWA nüh azhükütsüri kümzheri, thitü mari thuoüji jüüta müsanüh sam.

¹⁸VÜWA nüh makeri’a nüh lesari küvizhu vü ma nüh lesawa siekütse sataji ma nüh lesawa tsotho ajü thuoüji mari mükünongüra ke vünüh mari külole kütsü sa; küpakenühnyunü VÜWA nüh mari saküümnomna thi mari kümrüri kenüh mari külüchi nüh VÜWA saküüngah nü mari küümze kenüh.

¹⁹Thitü lesawa süm thuoüji mari tü asevü sühle tewa nü küpara nyiaza ase nyitewa taji mari kütsü sa thi mari vü küngietsuo taji mari pari nyieh vünüh müsü tewawati; mari tü mari nüh küsa nyutü mari luoveh kükho lehkhuji vünüh müja.

²⁰Jükenüh VÜWA rüküshu tü mari vü juzhu taji, “Anyi hamari nüh mari apari vü azhükütsü eh kütsathuozhü sakümne nü eh jikhi müküna nüh saküm kenüh,

²¹Joshua süküm vü ma nüh akuoküji küsüküsü nga kükhe küsari hi nüh mari tüvü nüh zheküjawa nyu,

²²jüti sanü mari pari kümjie VÜWA lehkhuji vü tse na ünü nyu nüh, azhüküzhü ti tsera na ünü nyu nüh mari vünüh hi tü Israel müte naveh,” ti küza.

²³Jükenüh VÜWA nüh küsükeri vünüh mari zhemja nüh akuoküji jümari sam, thi ma nüh mari tü Joshua kükhu vü müthse nüh sam.