Read Pochuri Naga LESARI 20 Bible Online

LESARI 20 - Pochuri Naga bible

LESARI 20

¹Israel nyiri aveh Dan vünüh Beersheba zhiese vü, Gilead azhih zhiehshu vünüh ti küjiluo rületsü. Mari tü satsa küsü vünüh Mizpa vünüh VÜWA tüvü sezhuh khe.

²Nyiri aveh alehvüwa, Israel kuoh aveh vü mari mpa nüh tu, ajih vünüh anyuchuwa küvi anyi anyie müza müzü.

³Jüti küsa vü Benjaminri tü Israel nyiri Mizpa vü kuotekhruthuohta küsa künara. Thinü Israel nyiri nüh, “Mokümjie vünüh khukekümsü hamatü viteru nüh hiri vü küza luo,” ti khuo.

⁴Thi Leviwa, fethekümvühwa vüpa nüh rüle taji, “Hi tü Gibeah, Benjamin azhih vü ru thi hi thi eh müsüwa hisü tü rüza tsothowa küze nti ru.

⁵Thinü Gibeah nyiri tü sühra nü hi sie saluo nü arüza vü azhehwa mükieshe; mari tü hi zothe nta küsa vünüh sa, thi mari nüh eh müsüwa re nü ma tü süm.

⁶Tinü hi nüh eh müsüwa tehthuoriem nü ma vi Israel aka anyu aveh vü küze kheh; küpakenühnyunü mari nüh Israel vü akükre thi müküsalehwa küsa kenüh.

⁷Halie, nohri Israel nyiri, nohri aveh nohri amüshe thi zanyoküthsü hala tsüluo,” ti küza.

⁸Jüti küüza vü nyi küsü kümjie nyiri aveh sühra taji, hiri nyiküsü nga ma juhthsüzheh, thi azheh vü shele küwawa nyu.

⁹Thitü hiri Gibeah vü hama sanaveh: hiri aküze vünüh Gibeah vü wa nü siesaluo naveh,

¹⁰thi Israel kuoh aveh vü nyi müzake vü anyi türake, anyie küsü vü müzake thi anyie türakevü anyie küsü ti vi nü anyiri kenüh ashievüru taji mari ru thuoüji mari nüh Israel vü müküleh sakümkenüh Benjamin vü Gibeah saküüzohm naveh.

¹¹Jükenüh Israel nyiri aveh tü sezhuh nü anyi anyuji küsü kümjie vünüh harü taji nyujiwa sie saluo.

¹²Jüti küsa vü Israel kuohri aveh tü Benjamin kuoh aveh vü anyiri küzetaji, nohri azhievü khukekümsü mowa samthuoh lo?

¹³Jükenüh Gibeah vü anyi kümsüri tsüm taji hiri nüh mari küzothem nü Israel vünüh kümsüwa viküjam luo. Thitü Benjaminri tü mari jienüri thi Israelra jikhi müküna.

¹⁴Thi Benjaminri tü Israel anyiri sie arie sana küsa kenüh Gibeah nyujiri vünüh kürü tsezhuru.

¹⁵Jüti sanü Benjaminri tü jüma rülo vü mari anyujiri vünüh anyuchuwa küvi anyi anyie mükeke nü türo sezhuh, Gibeah vü kürhori mpa mükünyu Gibeah vü kürhori anyuchuwa küshozhuri müzatürü sezhuh.

¹⁶Hamari azhievü küshozhu anyi müzatüri thuoüji kümzhu wuovü nüh aloh vi, thumkavüh kükavü asheh rike wienga mükazih.

¹⁷Thi Israel nyiri, Benjamin mükünyu anyuchuwa küvi anyi anyie müzamüzü sezhuh; hamari aveh nga arie nyiri kheh wie.

¹⁸Israel nyiri tü sühra nü Bethel vü khru taji Saküüwuowa vü kürü nü, “Benjaminri sie saluo na küsa kenüh arie vü hiri thawa nüh apo sawa na lo?” ti küna. Jüti küüna vü VÜWA nüh, “Judah nüh pokhu sawa naveh,” ti rületsü.

¹⁹Jüti sanü Israel nyiri tü arüne vü sühra taji Gibeah küwiejievü kürünape sa.

²⁰Israel nyiri tü ariepe vü tsezhuwa nü Benjamin sie saluo, thi Israel nyiri tü Gibeah vü mari sie saluo nta ri tsie kheh.

²¹Benjamin tü Gibeah vünüh shuru nü jüma rülovü Israelri anyianyie mükeke nü künyi zothem.

²²Thi anyiri, Israel nyiri tü luoveh saküji nü mari nüh rülo pokhu vü arieküsape rikütsiepe vü tsie kheh.

²³Jüti sanü Israel nyiri tü münüleh küju zie nü VÜWA vü künataji, “Hiri tü hiri jienü Benjaminri sie saluo na küsa kenüh shehnyiwa hü naveh ülo?” ti küna. Thinü VÜWA nüh, “Khrumari sie saluo luo,” ti rületsü.

²⁴Jüti küüza vü rülo künyiawa Israel nyiri tü Benjaminri sie saluonti shehnyi ru.

²⁵Thi Benjamin tü mari sie saluo nti rülo künyiawa Gibeah vünüh wa nü Israel nyiri anyie türatüze zothem; hamari aveh nga anyuchuwa küviri kheh wie.

²⁶Jüti sakümvü Israel nyiri aveh arienyiri ajü khru Bethel vünüh zie; mari tü VÜWA tüvü shupeh nü jüma rülovü müneleh küju assa sa, thi mari tü VÜWA tüvü kütso kükhurü thi kükathuokükhurü tsü.

²⁷Thi Israel nyiri tü VÜWA vü küna taji, (küpakenühnyunü jüma rülo vü Saküüwuowa kütsathuozhü Akütsathuozhü küthseku pehveh,

²⁸thi Aron atsawa tsa Eleazar tsa Finehas tü jümawa tüvü küürohkenüh) “Hiri tü arie küsape vü khru le nü hiri jienü Benjaminri siesaluo le naveh ünü, nyutü hiri tü lem na lo?” ti küna. Jüti küüna vü VÜWA nüh, “Khru luo, küpakenühnyunü thuohtü hi nüh mari vi nohri kevü thse naküveh kenüh,” ti küza.

²⁹Jükenüh Israel tü anyiri sanü Gibeah mükieshe.

³⁰Jüti sanü Israel nyiri tü rülo kücheawa Benjaminri siesaluo nti khru, thi küpa rülovü üta mari mpa nüh Gibeah vü saküjike.

³¹Thinü Benjamin tü anyiri siesaluo nti tsezhuwa nü anyujiwa vünüh letsuotewa; thi tsotho küpavü kümjie lehkhuji küjiwa, aleh küsü Bethel vü küwa thi küpawa thuoüji Gibeah vü küwa leh ti küsa anyu alie vünüh mari nüh fe thi anyi wuori zothe, ti sanü Israelri anyi chehrake zothem.

³²Jüti küsa vü Benjaminri nüh, “Mari tü atükhuwa üta hiri tüvü prürievehthuoh,” ti sa. Thitü Israel nyiri nüh, “Hiri tü tewanüh raluo, jüti sanü anyujiwa vünüh mari nyie taji alerüwa vü wanüh raluo,” ti sa.

³³Jüti küsa vü Israel nyiri aveh tü mari ape vünüh sühra nü mari mpa nüh Baal-tamar vü küjike nü peh, thi Israel nyiri mükieshenü küpehri tü mari ape vünüh Giba zhiehtu vü zhüwa.

³⁴Thi Israelri vünüh anyi küshozhu anyie türake ru nü Gibeah siesaluo, thi ariewa tü khra sheh; thitü Benjaminri tü küpokah mari vü shenyi vehthuoh ta küsa müthsü.

³⁵Jüti sanü Israel atüvü nüh VÜWA nüh Benjaminri chara; thi Israel nyiri nüh jüma rülovü Benjamin nyiri anyie mükeke münga nü müzake zoriejam; anyi hamari nga anyuchuwa küviri kheh wie.

³⁶Jükenüh Benjaminri tü mari chamthuoh ta küsa ngura. Israel nyiri tü Benjamin kükhutsü, küpakenühnyunü mari nüh Gibeah siesaluo naküsa kenüh küümkieshe küsari kütsotü kenüh.

³⁷Mükieshe küvehri nüh pre nü Gibeah vü zhüshuhru; jüti sanü mükieshe küpehri nüh tse zhuru nü anyu aha nüh anyujiwa aveh rehthe khehm.

³⁸Israel nyiri thi mükieshe küveh nyiri azhievü athsoshi küteke küsathuoüji anyujiwa vünüh anyikhu akülu küji küsü saküshu thuoüji,

³⁹Israel nyiri tü ariepe vü sühleru naveh. Benjaminri nüh Israel nyi chehrake reh nü küzothewa sate taji, “Arie pokhuwa üta mari nüh hiri tüvü zothejum wienathuoh,” ti sa.

⁴⁰Thitü athsoshiwa tü anyujiwa vünüh nyikhu kuotoke küwa vü Benjaminri tü asevü nüh no pehveh; thinü halie, anyujiwa ajü anyikhu vünüh atülü vü tekuo.

⁴¹Jütiküsa vü Israel nyiri nüh sühle ru ünü Benjamin nyiri tü luoveh zahtewa, küpakenühnyunü küpokahwa mari vü shenyi vehthuohta küsa mari nüh künguthuoh kenüh.

⁴²Jükenüh mari tü mari sieru Israel nyiri tüvü reza wuovü küprüke; jütawie ketünga ariewa tü ru mari phaküm sa, thi anyujiri vünüh shuküruri nüh mari aza vünüh mari zothem.

⁴³Benjaminri rehriejam nü mari zhe taji Nohah vünüh Gibeah zhiehshu kürüwie küju mari nyinya wa

⁴⁴Benjaminri nyi anyie türatüze zothem, mari aveh nga luoveh küzerikheh wie.

⁴⁵Thi mari tü kürele nü Rimon lokrü reza wuovü tetewa mari nyi anyie münga thuoüji alerüwa vünüh rehthem, jüti sanü mari tü Gidom vü zhe küshoke wa taji mari nyi anyie künyi müwiethem.

⁴⁶Jükenüh jüma rülovü Benjamin nyiri anyie mükeke nü münga anyuchuwa küviri zothem, mari aveh nga luoveh küzeri kheh wie.

⁴⁷Thitü anyi müza türo thuoüji reza wuovü Rimon vü tetewa nü Rimon lokrü vü sa müzü pehtewa.

⁴⁸Thinü Israel nyiri tü asevü sühleru Benjaminri siesaluo nü anyiri nga thi samwa nga küngu aveh thuoüji anyuchuwa ha nüh rehthekhehm. Thi mari nüh anyu küngu aveh anyih nüh tso khehm.