Read Pochuri Naga LESARI 3 Bible Online

LESARI 3 - Pochuri Naga bible

LESARI 3

¹Akuohji hamari tü mari vünüh Israelri müte nta VÜWA nüh kükhe küsari, jüma tü Kanan arie küsa vü nyi müküsara Israelri kheh wie;

²jüma tü Israel nyiri wuhle khanavü arie müküthsü tsari tü arie thsüra thi ma nüh arie vi mari sosie na küsa kenüh wie.

³Akuohji hamari tü Filistinri avü müngari, Kananri aveh, Lebanon Küzhi vü kürho Hivri, Baal-Hermon vünüh Hamath vü kütuleh küju.

⁴Jümari tü VÜWA nüh Mosa vünüh mari pari vü ma nüh azhükütsüri künana ünü nyu nüh ta küsa thsü na küsa kenüh Israel kümte wie.

⁵Jükenüh Israel nyiri tü Kananri, Hitri, Amorri, Perizri, Hivri thi Jebusri azavü nyi rho;

⁶thi mari tü ma tsevüri vi nü ma vüvühri sa, thi mari mpa ma tsavühri vi nü ma tsari tsü; thi mari tü ma nyiazara kütsü sa.

⁷Jüti sanü Israel nyiri tü VÜWA mari Saküüwuowa kümam nü VÜWA notha vü mowa nü müsüveh ünüh sa, thi Balri thi Asherah kütsü sa.

⁸Jükenüh VÜWA rüküshu tü Israelri vü juzhuteru taji ma nüh mari zhu Mesopotamia kajiwa Kushanrishathaim ke vü thsem; thi Israel nyiri tü mahvi tüze Kushan Rishathaim kütsü sa.

⁹Thitü Israel nyiri nüh VÜWA vü zieküze ünü VÜWA nüh Israel nyiri kenüh mari küvizhura nyi küsü vizhutsü nü ma nüh mari vizhukütsü sa, jüma thuoüji Kenaz tsa Othniel, Kaleb anü.

¹⁰VÜWA Sietse tü ma vü turu nü Israelra lesa sa; ma tü arie vü wa thi VÜWA nüh Mesopotamia kajiwa Kushanrishathaim vi ma ke vü thse nü ma ke tü Kushan Rishathiam nyiehvü chara.

¹¹Jüti sanü azhih jümawa tü mahvi zürake münyiera. Thi Kenaz tsa Othniel tü süm.

¹²Jüsevü Israel nyiri tü mowa nü müsüveh ünüh vü notha vü satewa le hü; thi VÜWA nüh Moab kajiwa Eglon sakükhratsü nü Israel sie küsaluo sa, küpakenühnyunü mari nüh VÜWA tüvü mowa nü müsüveh ünüh saküm kenüh.

¹³Ma nüh Amorri thi Amalekri ma vü sazhuh nü wa Israel küchara sa; jüti sanü mari tü aluophi nyujiwa vi mari azhi sara.

¹⁴Thi Israel nyiri tü Moab kajiwa Eglon kütsü mahvi türatüze sa.

¹⁵Thitü Israel nyiri nüh VÜWA vü zie ünü VÜWA nüh makeri’a nüh mari küvizhura nyi küsü Gera tsa Ehud Benjamin kuoh vünüh vizhutsü, ma tü ake kümzhu wuo vünüh küviri küsü. Israel nyiritü ma nüh Moab kajiwa Eglon vü alekhrü tsü küüze sa.

¹⁶Thi Ehud tü ma mpa ma kenüh anyuchu awuowuo aha küpe apie thake küsü sanü ma thsükhu vü ma küzo azhie wuovü nüh pe.

¹⁷Thi ma nüh alekhrüwa vi Moab kajiwa Eglon tsü. Eglon tü anyi kühjawa küsü.

¹⁸Ehud nüh akhrüwa tsüju kümvü akhrü vüküruri küzem.

¹⁹Thitü ma thuoüji ma mpa nüh sühle Gigal kütuoh vü aloh vü tsorhe kürhe vü ru taji, “Hi tü küüthi zhühle noh kenüh pehveh lie, kajiwa,” ti küza. Thinü ma nüh azhütsü taji, “Zotipeh,” ti küza. Jüti küüza vü ma kütuoh vü pehküvehri tü ma vünüh shute kheh wa.

²⁰Jüti küsa vü ma tü ma mpa ma zheh küshothuo luomuo vü pehküveh vü Ehud tü ma vü ru. Ehud nüh ma vü, “Hi tü eh VÜWA vünüh noh kenüh zhühle pehvehlie,” ti küza. Thinü ma tü ma pe vünüh tesühra.

²¹Jüti küsa vü Ehud tü ma ke azhu wuovü thsuojuo ma küzo azhie wuovü nüh anyuchuwa shozhuru nü ma vo vü shükükhari jam;

²²thi anyupo nga tetu kheh, thi aküthü nüh anyuwa tü mülüte tewa, küpakenühnyunü ma nüh anyuchuwa tü ma vo lovü nüh müküshozhukenüh; thi asü tü shuteru.

²³Thinü Ehud tü atela vü shuwa nü ma rügi vü luomuo küshothuo mükhie khem taji jümari ziehm.

²⁴Ma tewa ünü asieperi tü turu; thi mari nüh küngu vü luomuo küshothuo mükhieri tü zieh küm ngura, mari nüh kümshe, “Küshothuo küüji lovü nüh ma mpa ma saküüsiehvehthuoh,” ti sa.

²⁵Jüti küsa vü mari tü müjie huoküüchu küju nü huopeh huo; thitü ma nüh luomuo küshothuo mükhieri müküsa wie kenüh mari nüh mürüküsa vüh vi taji jümari satu; thinü mari Vüwa tü jüla azhih vü süzeh la.

²⁶Mari zhihke nü pehküveh vünüh Ehud tü aloh vü tsorhe kürhü tuwuovü küthitewa nü Seira vü tewa.

²⁷Ma tü jüma jura ünü ma nüh Efraim Küzhi anyu vünüh tütü khu küze; thi Israel nyiri tü küzhiho nyieh vünüh mari sierhüwa sanü ma sie taji tsetsuo.

²⁸Jüti küsa vü ma nüh mari vü, “Eh se nyiluo, küpakenühnyunü VÜWA nüh nohri mükünongü Moabri vi nohri ake vü thsekümthuoh kenüh,” ti küza. Jükenüh mari tü ma se nyiwa nü Jordan keka vünüh Moabri khekhehm taji nyi küsü nga kari müküüze.

²⁹Jüti sanü mari tü jüma tsothovü mpa nüh anyie türake Moabri fethem, aveh nga kümzho thi küsarari anyi kheh wie; nyi küsü wie nga jomküze.

³⁰Jükenüh Moab tü jüma rülovü Israel ke kükhu vünüh chara. Jüti sanü azhihwa tü mahvi zerake münyiera.

³¹Ma sevü thuoüji Anat tsa Shamgar shuru ma nüh mieshü kühuo kütsüh nüh Filistinri anyi müza türo kürhiethe nü ma nga Israelri vizhura.