Read Pochuri Naga LESARI 5 Bible Online

LESARI 5 - Pochuri Naga bible

LESARI 5

¹Jüti sanü jüma rülo vü Debora thi Abinoam atsa Barak masü nüh azah sa:

²Israel vü asierhüri nüh asierhü sa, anyiri nüh lozhe nü mari mpa mari kütsü kenüh, VÜWA siakeluo!

³Künaluo, O kajiri; künaluo, O kajitsari; hi VÜWA vü azah sanaveh, hi tü VÜWA, Israel Saküüwuowa vü jikhiküzü satsü naveh.

⁴VÜWA, noh nüh küsie Seir vünüh tsezhu nüh, noh nüh küsie Edom asuo vünüh khazhutewa nüh, azhihwa tü amüngukükhetewa, thi atülüri nga kretewa, ah, akülu tü ajuh rütsuo ru.

⁵Aküzhiri tü VÜWA tüvü küzhüh, VÜWA, Israel Saküüwuowa tüvü Sinai nga küzhüh.

⁶Anatha atsa Shamgar tsotho vü, Jael tsotho vü, shieji sanü küzehkütseri letewa, thi küzekütseri alehküzah vünüh tse.

⁷Israel vü anyuza küsa letewa, mari tü letewa, noh müjie küsühra küju, Debora, Israel vü azah küsü kümjie sühra,

⁸nyiaza kürütheri kürüka vü, arie tü akheriri vü pehtewa. Israel vü anyie zührake azhievü joh huo nyutü avi ngu naveh ülo?

⁹Eh luoveh tü Israel sierhüri vü shutewa, mari tü anyiri azavü lozhe nü mari mpa mari tsü. VÜWA siakeluo.

¹⁰Jüma küza luo, nohri rawuh kürühwuo rügi vü kütseri, nohri ajih küshiethsü küsawa rügi vü shuküpehri thi nohri lehkhuji müzhe nü kütseri.

¹¹Ajuhküzü azhieri vü azah jikhi, jüla nüh mari tü VÜWA kükhrari küza peh huo, Israel nyiri kükhrara. Jüti sanü VÜWA nyiri tü akheri lahvü tsetsuo.

¹²Sühraluo, Sühraluo, Debora! Sühraluo, sühraluo, azah küsü sa! sühraluo, Barak noh küsi küsari sietsetewaluo, O Abinoam atsa.

¹³Jüti sanü kümto anyi zanyoküthsüri tseturu, VÜWA nyiri tü kükhrari sie saluo nta tseturu.

¹⁴Mari tü Efraim vünüh anyuo vü tsezhuwa, noh senyi taji, Benjamin, noh küshukürari sie; Sierhüri tü Mokhir vünüh tsetsuo, thi küjira kütsüh küviri tü Zebulun vünüh tseturu;

¹⁵Issachar kajitsari tü Debora sie nü ru, thi Issachar tü Barak vü nyitsa; mari tü ma senyi anyuo vü tsuo. Reuben jünüra zavü luoveh zanyo kümsheri ji shemthuoh.

¹⁶Noh tü mokenüh nyihzhüzah vü kuopehtewa lo, nyihzhüzah kenüh pilechu kükhu küna nti ülo? Reuben jünüri azhievü luoveh zanyo kümsheri ji shehmthuoh.

¹⁷Gilid tü Jordan tuwuovü pehtewa; thi Dan, ma tü mokenüh ajuhieri vü nyi peh tewa lo? Asher tü juhküji nato vü zo ta shupehtewa, ma kuzari kütuoh vü tsuo pehtewa.

¹⁸Zebulun thuoüji mari kürhori aküsü kükrü anyi küsü, Naftali nga, ariepe kümsieri vünüh.

¹⁹Kajiri tü ru, mari tü saluo; Kanan kajiri tü jüti sanü saluo, Tanak vünüh, Megiddo juhri vünüh; mari tü rakasa zheküvira müngu.

²⁰Atülü vünüh awuhtsiri tü saluo, mari lehkhuji vünüh mari tü Sisera siesaluo.

²¹Kishon juhküjiwa nüh mari chivütewa, Kishon juhküjiwa, waluo, eh kürholi, kükhra thse taji!

²²Rawuhri jo nü küzhü vünüh atüwuohri kükha kükhu, ma rawuhri tü jozhü.

²³“Meroz müzüm luo,” VÜWA zhühlewa nüh küza, ma kürhoperi müzü kümsü shehm luo, küpakenühnyunü mari tü VÜWA küükra vü müküru kenüh.

²⁴Kümngatsawa tü nyimzawa Jael saluo, Kenwa Heber vüvüh, juhthsüzheh lovü kürho nyimzari aveh nyiehvü kümnga tsawa.

²⁵Ma nüh ajuh khuo thitü nyimzawa nüh tünüjuh tsü, nyimzawa nüh kahlekhu vünüh tünüjuh küsuori viru.

²⁶Nyimzawa nüh ma ke vi juhthsüzheh kümchiwa küjeh, thi ma ke azhie wuovü nüh küürohwa athsohtsüvü küjehke; nyimzawa nüh ake vi Sisera toh, nyimzawa nüh ma lü tohkhuom, nyimzawa nüh ma lohkrie kürhie thi shüphiem.

²⁷Ma tü reteru, ma tü külutewa, ma tü nyimzawa ampha vü fephohke tewa; ma tü nyimzawa jih vü retetu, ma tü külutewa; khiela nüh retetu nüh, jüla nüh tsuotsanü sütewa.

²⁸Mürhülehpie vünüh kümazü nü nyimzawa nüh noh Sisera azah nüh akhra mürhülehpie vünüh nophohke: “mokenüh ma rawuhkheka tü küru suomthuoh lo?” Mokenüh ma rawuhkheka tühwuoh kü khatü letewathuoh lo?

²⁹Ma vüvüh kümütsatsari nüh ma nyiehpha sakümza, nyu, ma mpa ma nyiehpha sakümza,

³⁰mari tü zanyo zheküvirari ngura nü müküsuo ülo? Nyimpari küsüsü vü rülavü küsü anyuji künyi; Sisera kenüh athsü asarie küsa zheküvira, ake nüh kükhe athsü asarie küsa zheküvira, ake nüh kükhe asarie küsa künyi eh ku küüzhu zheküvira künyi nyu ülo?

³¹“Jükenüh noh mükünongüri tü pokahmluo, O VÜWA! Thitü noh füri thuoüji ma kükhra vünüh küsühra vü rünyi kümjie saluo,” ta reihi. Jüti sanü azhih jüla tü mahvi zürake münyiera.