Read Pochuri Naga LESARI 8 Bible Online

LESARI 8 - Pochuri Naga bible

LESARI 8

¹Jüsevü Efriam nyiri nüh ma vü, “Noh nüh wa nü Midiari siesaluo nta küsa vü hiri müji nüh nohri tü hiri vü hatü mowa samthuoh lo?” ti sa. Thi mari nüh ma phrakümsü sheh.

²Thinü ma nüh mari vü, “Nohri nüh saküm vikümjie naküsa hi tü mowa sam lo? Efriam rhelivü mahse küphah tü Abiezer rhelivi küla nyieh vünüh mümhie ülo?

³Saküüwuowa nüh Midiari kajira tsa künyi, Oreb thi Zib masü noh kevü müthse ülo, nohri sie kümjiera hi nüh mowa sara na lo?” ti küza. Ma nüh hama küüza vü mari nüh ma vü rüküshuwa tü kriehtewa.

⁴Gideon thi ma siekütse anyi müza kücheri tü Jordan vü ru nü karitewa, mari tü chakemthuoh tü zhewa wie.

⁵Jükenüh ma nüh Subhot nyiri vü, “Hi nüh nohri vü khuoveh, tinülohse vi eh se nyi kütseri vü tsüluo; küpakenühnyunü mari tü chake kümthuoh kenüh, thi hi thuoüji Midiari kaji künyi Zeba thi Zalmunna zhe tseveh,” ti küza.

⁶Thinü Subhot küjiri nüh, “Hiri nüh lohse vi noh rienyiri vü küütsü na küsa kenüh Zeba thi Zalmunna tü noh ke vü pehmthuoh ülo?” ti küna.

⁷Jüti küüna vü Gideon nüh, “Jütathuoüji, VÜWA nüh Zeba thi Zalmunna vi eh kevü thsemthuoüji hi nüh reza vü arüzhü thi tsuonari vi nü nohri satsa kürhie naveh,” ti küza.

⁸Thi jüla nüh ma tü Penuel vü wa nü mari vü jükümjie vünüh küza; thi nüh Penuel nyiri tü Sukkoth nyiri nüh kürüle üta mavü rületsü.

⁹Jüti rülekütsü vü ma nüh Penuel nyiri vü, “Hi nüh eh müsherüzih nü shele ru thuoüji hi nüh khajie hama phrüjam naveh,” ti küza.

¹⁰Jüti küsa vü Zeba thi Zalmunna masü tü masü rienyiri anyie türamnga kümjie küsa Zhiehshu anyi rienyiri küükheri aveh sie nü Karkor vü peh; küpakenühnyunü anyuchuwa küvi nyiri anyie müzake nü mükeke tü zotheküm kenüh.

¹¹Thi Gideon tü Moba thi Jogbeha zhiehshu küzeh kütsera leh vü tekhru nü arienyiwa siesaluo; küpakenühnyunü arienyiwa tü ariemühuo nüh küpehla kenüh.

¹²Zeba thi Zalmunna tü te thi ma tü mari zhewa taji Midiari kajikünyi Zeba thi Zalmunna masü rera, jüti sanü ma nüh arienyiri aveh tü sakümzho kheh.

¹³Jüti küsa sevü Joash atsa Gideon tü arie vünüh shele nü Heres vü kükhru wuo vünüh teru.

¹⁴Thi ma nüh Subhotri viza küsü re nü ma küna taji Sukkoth vü küjiri thi kükhruori rürake nü türü ma kenüh rhü taji vi.

¹⁵Jüti sanü ma tü Sukkoth nyiri vü ru taji, “Halie Zeba thi Zalmunna masü tü nohri ake vü küpehm nü masü kenüh hi phraküzükrüm nü noh nyiri müno taji kütseri vü hi nüh lohse vinü tsü üti la,” ti küza.

¹⁶Jüti küza nü ma nüh anyujiwa kükhruori sie thi reza rüzhü thi tsuona ti hamari vi taji Sukkoth nyiri sosie.

¹⁷Thi ma nüh Penuel khajie zochiemtü thi anyujiwa nyiri rehthe khehm.

¹⁸Jüti küsa vü ma nüh Zeba thi Zalmunna masü vü, “Noh nüh Tabor vünüh anyi kürehtheri tü khievü tewathuoh lo?” ti küna. Thinü masü nüh, “Mari nga noh kümjie wiethuoh, mari aveh nga kajitsari üta wiethuoh,” ti rületsü.

¹⁹Jüta rüle kütsüvü ma nüh, “Mari tü eh zah tsari eh jienüri khehwiethuoh; VÜWA nüh rhoküveh üta, noh nüh mükütüküzü mari küloletsü nü küürho tüla hi tü nohri küzothewa nyunü,” ti küza.

²⁰Thinü ma nüh ma tsa küwuo khuwa Jether vü, “Sühra nü mari zothem luo,” ti küza. Thitü vizawa nüh ma nyuchuwa mükhake nüh sam; küpakenühnyunü ma tü rünguom thi krüküm kenüh.

²¹Jüti küsa vü Zeba thi Zalmunna masü nüh, “Noh mpa nüh sühra nü zhüru hisü vü vehke taji zothem luo; küpakenühnyunü anyiri tü mokümjie ünüh ma kükhra nga jüüta küsa wiethuoh kenüh,” ti küza. Jüti küüza vü Gideon tü sühra nü Zeba thi Zalmunna masü rehthem nü masü ut akuri vünüh mürü khalozhori vitewa.

²²Jüti küsa vü Israel nyiri nüh Gideon vü, “Noh nga, noh tsa nga thi noh zhüri nga hiri nyieh vü takrü saluo; küpakenühnyunü noh nüh Midiara ke vünüh hiri vizhu kütsüthuoh kenüh,” ti küza.

²³Thitü Gideon nüh mari vü, “Hi nga thi eh tsari nga nohri nyiehvütakrü küsawa nyu, tü VÜWA nüh nohri nyiehvü takrü sanaveh,” ti küza.

²⁴Jüsevü nga Gideon nüh mari vü, “Hi nüh nohri vü küzhieke sanaveh, tinü nohri nyi küsüküsü nga arie vünüh zheküvira athorüri hivü tsüluo,” ti khuo. (Küpakenühnyunü mari tü Ishmaelri küsakenüh suna thorü peh khe).

²⁵Thinü mari nüh, “Hiri tü müma wiethuoh nüh jümari tsü naveh,” ti rületsü. Jüti sanü mari tü athsü shieke taji mari nyiküsüsü wie nga arie vünüh zheküvira athorüri jüma lovükhojake kheh.

²⁶Thi suna thorü ma nüh kükhuori tü ma küüzho küüto mükeke; mürükhalozho, azhoka, Midia kajiri thsümnyi küsümo thi mari ut aku vü kükheke tsokrüri müküchieke nyie.

²⁷Jüti sanü Gideon nüh navüra küüzhuvüh jüma vünüh sanü manyuji Ofra vü sanü Israelri aveh tü jüma vünüh Gideon thi matharuo tü küjurü küsü satewa.

²⁸Jüti sanü Midiari tü Israelri tüvü sakürüpuo phakem nü mari alü mükü toke lera samtü. Thi Gideon tsothovü azhihwa tü mahvizührake münyiera.

²⁹Joash tsa Jerubal tü wa nü ma mpa ma zheh vü peh.

³⁰Jüti küsa vü Gideon tü ma tsatori atsa nyimpari rürake peh, küpakenühnyunü ma tü vüvüh hozake küpeh kenüh.

³¹Thi ma müsüvüh Shekhem vü küpehwa nga nyimpari küsü wuo matsü nü ma nüh ma nyo Abimelek ti thoh.

³²Thi Joash tsa Gideon tü khruo shehüchih nüh süm nü Abiezri Ofra ma pa Joash rüku vü chohwum.

³³Jüsevü Gideon sümünü Israel nyiri tü küprüle tewa nü Balri vi mari nyiaza satewa.

³⁴Thi Israel nyiri tü VÜWA mari Saküüwuowa, mari mükünongüri awuowuo vünüh mari külolekütsüwa mümshe nüh satewa;

³⁵jüti sanü mari tü Jerubal (jüma tü Gideon) tharuo vü ma nüh Israelri vü zanyo kümhie küütsa le müsanüh satewa.