Read Pochuri Naga LESARI 9 Bible Online

LESARI 9 - Pochuri Naga bible

LESARI 9

¹Jerubal atsa Abimelek tü Shekhem vü ma zah vü wanü marivü thi ma zah tharuo jünüri vü,

²“Shekhem nyiri aveh khüna lovü küzathse luo, Jerubal tsa rürake aveh nüh nohri nyiehvü takrü küsanüh kümpha ünü nyi küsünüh takrü küsanüh kümpha nüh, ti küsa küza luo. Hi tü nohri arü thi nohri satsa ti küsa nga müsheluo,” ti küza.

³Jüti kü zavü ma zah küshukürari nüh azhü hamari aveh vi Shekhem nyiri khüna lovü ma müthoh vünüh küzathse kheh tü; thinü mari luoveh tü Abimelek senyi nti küsa vü küpeketewa, küpakenühnyunü mari nüh, “Ma tü hiri azhü küsa kenüh,” ti küza.

⁴Jüti küsa vü mari nüh Balberit zheh vünüh rakasa akre rürake vi ma tsü thi Abimelek vü jüma vi nü anyi momaküsari thi azhümküzhüri ake sü nü ma seküünyi.

⁵Thi ma tü ma pa zheh Ofra vü wa taji Jerubal atsa ma jienü nyirürake aloh küsü rügi vünüh ma nüh rehthe khehm; thitü Jerubal atsa riehpewa Jotham thuoüji ma nüh küthi küm kenüh ma müfethera nüh kükhem.

⁶Jüti küsa vü Shekhem nyiri aveh thi Betmilo aveh kürü wa nü Shekhem vü nguzhe tovüh vünüh Abimelek tü kaji küsam.

⁷Jüma vi Jotham vü küüza vü ma tü Gerizim Küzhi rügivü kuotsie nü zie kümsie sheh taji mari vü, “Saküüwuowa nüh nohri zhü küüna na küsa kenüh Shekhem nyiri eh zhü künaluo.

⁸Küsükeri athsohri tü mari nyieh vü küükaji na küsa kenüh kajiküsü avüjuh nüh küne nti wa, thinü mari nüh Olive thsohwavü, ‘Hiri nyiehvü takrü saluo,’ ti küza.

⁹Thitü Olive thsoh nüh mari vü, ‘Hi tü eh küthü, jüma vi nü nyiaza nga thi nyiri nga saküüsiakewa jam nü wa athsohri vü küthuo peh naveh ülo?’ ti küza.

¹⁰Thinü athsohri nüh wa nü ampah thso vü, ‘Ra nü hiri nyiehvü takrü saluo,’ ti küza.

¹¹Thitü müpah rhuwa nüh mari vü, ‘Hi tü eh kümnge thi eh vi kümhiejam nü wa athsohri vü küthuo peh naveh ülo?’ ti küza.

¹²Jüti küüza vü athsohri nüh rhelivirhuri vü, ‘Ra nü hiri nyieh vü takrü sa jie,’ ti küza.

¹³Thitü rhelivi rhu nüh mari vü, hi tü eh khah, nyiazari thi anyiri kütho kütsewa jam nü wa athsohri vü küthuo peh naveh ülo? ti küza.

¹⁴Thinü athsohri aveh nüh khümirhu vü, ‘Ra nü hiri nyiehvü takrüsa jie,’ ti küza.

¹⁵Thitü khümirhu nüh athsohri vü, mükütüküzü nohri nüh kütsotü kümhie vünüh hi küne nü nohri nyiehvü kükaji nta thuoüji ra nü eh küükhevü münyi luo; thitü jütanyu thuoüji khümi rhu vünüh anyih juzhuru nü Lebanon vü athsohrhe küüngu avehtsoküüraluo,” ti küza.

¹⁶Jükenüh khinyi thuoüji, mükütüküzü nohri nüh Abimelek vikaji küsa vü nohri kütsotü mhie thi küsiake vünüh sathuoüji, thi nohri nüh Jerubal thi ma zhehlori vü zanyo kümhie sa, thi ma küürohri künguküzü üta vünüh ma vü satsü thuoüji,

¹⁷küpakenühnyunü eh pa tü nohkeri nüh saluotsü thi ma kürho tsünü Midiari ake vünüh nohri küloletsü;

¹⁸thitü nosü thuoüji nohri tü sühra nü eh pa zhehlo siesaluo nü ma tsa rürake aloh küsü rügi vünüh rehthem nü ma siepevühwa Abimelek, ma tü nohri küshukürawa küsa kenüh ma vi nü Shekhem nyiranyiehvü kaji küsamthuoh,

¹⁹mükütüküzü nohri nüh Jerubal thi ma zhehlori vü kütsotümhie thi siake ti thuoüji Abimelek vü lozheluo thi ma nga nohri vü küülozheluo;

²⁰thitü jüüta nyuthuoüji, Abimelek vünüh anyih juzhuru nü Shekhemthi Betmilo anyiri tsotheküm saluo; thi anyih tü Shekhem thi Betmilo nyiri vünüh shuru nü Abimelek tsothem luo, ti küza.

²¹Jüti sanü Jotham tü ma jie Abimelek kükrü kenüh zhü nü te Bir vü wa taji jüla rhotewa.

²²Abimelek tü mahvi küche Israelri nyiehvü takrü sa.

²³Thi Saküüwuowa nüh kümsü sietse küsü Abimelek thi Shekhem nyiri azhievü küze nü Shekhem nyiri tü Abimelek mürü sheh;

²⁴Jümatü mükünyu sanü Jerubal atsa rürake fetheküm kenüh mazühri shewi wa vi mari anü Abimelek mari küfethewa thi ma ke sakükhra tsü nü ma jieri küzothe Shekhemri vü thse na küsakenüh.

²⁵Thi Shekhem nyiri nüh ma sie wuluo nü aküzhi rügivü anyiküruri wu na küsa kenüh anyiri sanü lehkhuji jüla küruri aveh azhi prüviviti sa; thi jüma tü Abimelek vü küzateru.

²⁶Thinü Ebed atsa Gal tü ma küshukürari sie nü Shekhem vü wa; thi Shekhem nyiri tü ma vü kütsotü luoveh tsü.

²⁷Jüti küsa vü mari tü azhuh vü wa nü rhelivi rhu vünüh rhelivi vizhuh nü ma juh rütsezhu taji akhu sa, thi mari tü mari nyiaza zheh lovü tu nü jüla nüh tsa thi zhu ti sanü Abimelek phramsü.

²⁸Thinü Ebed atsa Gal nüh, “Abimelek tü thawa lo, thi Shekhem nyiri nüh thari nü hiri tü ma kütsü sana lo? Jerubal tsa thi Zebul ma küjiri tü Shekhem pa Hamor kütsü müsa ülo? Thinü mokenüh hiri tü ma kütsü sana lo?

²⁹Anyi hama nüh eh kevü peh thuoüji hi nüh Abimelek vijam naveh nü. Hi nüh Abimelek vü, ‘Noh rienyi saküzhi nü shuhru luo,’ ta küza mhieveh,” ti küza.

³⁰Jüti küsa vü nyuji jüma takrüwa Zebul nüh Ebed atsa Gal zhüri küünara vü ma rüküshu tü juzhuteru.

³¹Thi ma nüh Aruma vü Abimelek vü zhühvüri küze taji, “Halie, Ebed atsa Gal thi ma küshukürari tü teru Shekhem vü peh nü noh sieruohluo taji anyujiwa kükekümsü vehthuoh.

³²Jükenüh khinyi nohri arüza vünüh noh nga thi anyi noh siekütseringa ti wa nü azhuh vü küthi zeh taji huoküpeh saluo.

³³Jüti sataji arüne vü rünyi keküshute vünüh kümto sühra nü anyujiwa vü zhütu luo, thi ma thi anyi ma siekütseri tü shuhru nü nohri sie saluo thuoüji jüma rülo vü küzake sanaveh ünüh marivü satsüluo,” ti küza.

³⁴Jüti küsa vü Abimelek thi anyi ma se nyikütseri tü arüza vünüh sühra taji küriehkhuo müzü sanü Shekhemri huopeh.

³⁵Thinü Ebed atsa Gal tü wa nü anyujiwa kheri lehpie vü tsiepeh; thi Abimelek thi ma siekütseri tü mari kühuope vünüh shuhru.

³⁶Jüti küsa vü Gal nüh anyiri ngu nü Zebul vü, “Noluo, anyiri tü aküzhi rügivü nüh tsetsethuoh ünüh,” ti küza. Thinü Zebul nüh ma vü, “Noh tü anyiri kümjie aküzhi rüzhe nguveh,” ti küza.

³⁷Gal nüh küza le taji, “Noluo, anyiri tü azhih zhila vünüh tsethuoh, kürefü küsü thuoüji kütüma Nguzhe wuovü nüh tse,” ti küza.

³⁸Thinü Zebul nüh ma vü, “Abimelek tü thawa nü hiri tü ma kütsü sana lo? ta küüzawa noh po tü khiela pehveh lo? Anyi hamari tü noh nüh kürükümri nyu ülo? Khinyi nü wa taji mari siesaluoluo,” ti küza.

³⁹Jüti küsa vü Gal tü Shekhem nyira tüvü wa nü Abimelek siesaluo.

⁴⁰Thi Abimelek nüh ma zhe thi ma tü ma tüvü te taji anyi hozake wienga kheri lehpie küju müsamnam.

⁴¹Jüti sanü Abimelek tü Aruna vü pehtewa, thi Zebul nüh Gal thi ma küshukürari zheja khehm nü mari tü Shekhem vü mükürhora satsü.

⁴²Rülo jüma sevü anyiri tü ato vü wa. Thinü jüma vi Abimelek vü küza.

⁴³Ma nüh ma nyiri vi nü mari riehkhuo küche küsuo taji azhuh vünüh küühuopeh; jüti küsa vü ma nüh noküze ünü anyiri tü anyujiwa vünüh shukütse ngu, thinü ma tü sühra taji mari sie saluo nü mari rehthe khehm.

⁴⁴Abimelek thi riehkhuo ma siekütsewa tü atüvü zhüwa nü anyujiwa kheri lehpievü tsie kheh, jüti sa küvehvü riehkhuo künyiri tüzhü azhuh vü wa nü mari rehthe khehm.

⁴⁵Jütisanü Abimelek tü rülo jüma nyihsho mari sie nü saluo taji anyujiwa vira thi jülovü kütü anyiri zothe khehm nü ma nüh anyujiwa feriem taji amütsü vi nü zhuhmtü.

⁴⁶Shekhem küloju rügivü küpeh anyiri nüh jüma thsüra nü Elberit azheh kümzhowa lovü tetu.

⁴⁷Jüti küsa vü Shekhem küloju rügi vü küpeh nyiri tü sezhuhvehthuoh ta küsa vi Abimelek vü küza.

⁴⁸Thinü Abimelek thi ma sie kütseri aveh tü Zalmon Küzhi vü tekhru; thi Abimelek tü ma kevü amüvü küjehke nü athsohkükho küsü mürieh taji vi ma safü rügi vü sa. Jüti sanü masie kütse nyiri vü, “Hi nüh mowa sanü nohri nüh ngu thuoh ünüh jükümjie nohri nga shiti saluo,” ti küza.

⁴⁹Jükenüh anyiri nyi küsüsü wienga ma mpa ma thsoh kükho küsüsü mürieh nü Abimelek se nyiwa taji küpiekümzhowa vü kürühngake nü jümari nyiehvü nüh küpiekümzhowa vü anyih tsoküze taji Shekhem küloju vü küpeh nyiri tü nyimpari thi nyimzari anyie küsü kümjie süm.

⁵⁰Jüsevü Abimelek tü Thebez vü wa nü jüla kürünape sataji jüma zhe nü vira.

⁵¹Thitü anyujiwa lovü külojuke kümzho küsü peh thi nyuji jüma nyiri aveh nyimpari nga thi nyimzari nga te jüla tu nü kheketewa; mari tü külojukewa azhu küju vü teküwa sa.

⁵²Jüti küsa vü Abimelek tü külojukewa vü ru nü mari sie saluo taji külojukewa mükhie vü ru nü anyih vi taji jüma tso nti sa.

⁵³ Thinü nyimzari küsü nüh aloh küsü Abimelek lü rügivü vehjake küze nü ma lürü vehkhuom.

⁵⁴Jüti küsa vü ma nüh ma rietsokrü vükütse vizawa ji taji mavü, “Hi tü nyimzari nüh fethe ta nyiri nüh thama küüphrahte kenüh noh nyuchuwa shozhu nü hi shüthem luo,” ti küza. Jüti küüzavü vizawa nüh ma shükükhariem nü ma tü süm.

⁵⁵Thi Israel nyiri tü Abimelek sümthuoh ta küsa küngu vü mari tü papa zheh vü tewa kheh.

⁵⁶Hakümjie vünüh Abimelek nüh ma pa vü müküleh sanü ma jieri rürake küfethe Saküüwuowa nüh mavü satsü le;

⁵⁷thi Saküüwuowa nüh Shekhem nyiri nüh khukekümsü küsa aveh malüri vü thse, thi mari vü Jerubal tsa Jotham kümzüwa teru. Ashewiwa vi mari anü Abimelek mari küfethewa, thi ma ke sakükhra