Read Pochuri Naga 2 JOHAN 1 Bible Online

2 JOHAN 1 - Pochuri Naga bible

2 JOHAN 1

¹Kükhruowa vünüh: Küümüze Nyimzawa thi ma tsari hi nüh küümze tsahri vü rhükütsü. Hi mpa nüh nyu nü thari nüh küzhütsawa thsüveh nüh nohri kümüzeveh,

²küpakenühnyunü küzhütsawa tü hiri vü pehveh thi jümatü hiri vü pehwawie naveh.

³Saküüwuowa[1] Pawa thi Jisu Khrista, Pawa Tsanüh hiri vü küümze, künyihwa, thi kürünyiwa vi hiri kütsüwa saluo; jümari tü küzhütsa vünüh thi akülo vünüh hiri zhi küsawa saluo.

⁴Pawa nüh azhü hiri vü kütsü kümüjie noh tsari tü küzhütsa vü rhoküveh hi nüh ngura nü küzakele nga hi tü lozhe nüh.

⁵ Jükenüh hi nüh noh Nyimzawa vü khuoküveh thuoüji: hiri küsü nüh küsü kümüze luo. Hi nüh rhü noh tsüküveh hama thuoüji azhükütsü kürüthe nyu; azhükütsü jümatü atükhu vünüh hiri nüh pehtekütsewa wiethuoh.

⁶Hi nüh küümze zhühnyo küphrahte hama thuoüji Saküüwuowa nüh azhükütsüri küna nü rho na küsa wiethuoh. Azhükütsü atükhu vünüh nohri aveh nüh küünarawa thuoüji nohri küümze vünüh mürho ji mümühie ti küsawa wiethuoh.

⁷Anyi kümürari hozake azhih aveh vü kuowathuoh, Jisu Khrista tü nyiri sazüh vünüh ru ta sanü müküphrahteri hozake azhih vü kuotewathuoh. Anyi jüüta küsari tü nyiri kümürari thi Khrista Mükünongüwa.

⁸Jükenüh nohri küriezi vü peh luo, jütathuoüji hiri nüh mowa küro tse nüh jüma küümiewa nyu nü ajisuowa aveh ngu naveh.

⁹Thawa nüh Khrista nüh küsosie vü müpeh nüh küluotewa naveh nüh ma thuoüji Saküüwuowa pehmüveh. Thawa nüh küsosiezhü jüma ma vü pehveh ünüh ma thuoüji Pawa nga Tsawa nga ma vü pehveh.

¹⁰Jükenüh mükütüküzü anyi wuori nüh küsosiezhü hama müvi nüh ru thuoüji nohri azheh vü müsieketümü luo; jü mpa nyu nü, “Azhü kümühie nga ma vü müphratümü,” luo.

¹¹Küpakenühnyunü anyi küsüküsü nga azhü kümühie phra nü ma mütu thuoüji ma nüh mokümjie kümüsü satse nüh jükümjie nyi satseveh.

¹²Hi tü zanyo hozake noh vü kürhü leh pehveh, thitü lasi vünüh thi lasijuh vünüh müsanüh küümpha pehveh, hi mpa nüh ru nü no kümütu luozhe veh thi künyitoh noh sie küjüle müshe veh, jütathuoüji hisü tü lozhejura naveh.

¹³Noh küümze noh Nüvühwa tsari nga mari külozhezhü tsüveh.