Read Pochuri Naga KÜTHSÜKÜTSÜ 1 Bible Online

KÜTHSÜKÜTSÜ 1 - Pochuri Naga bible

KÜTHSÜKÜTSÜ 1

¹Lasi hama tü zanyoküsa kürühke küsari Jisu Khrista nüh küthsükütsü. Saküüwuowa[1] nüh küthsükütsü hama ma kütsü thuoüji zanyo shita sateru na küsari vi ma sieperi kütsa üta tsü. Khrista nüh ma zhühlewa küze nü ma siepe Johan vü küthsükütsü,

²thi Johan nüh momowa ngu nüh aveh vi küza. Zhühke hama tü Saküüwuowa vünüh zhühle küruwa, thi Jisu Khrista nüh küzhütsawa vi küüthsüwa.

³Lasi hama küchieri thuoüji kümüngatsahri, thi setsaküthsüzhü zhühle hama küünari thi lasi hama lovü rhüküsa küünari thuoüji kümüngatsari! Küpakenühnyunü hamari sana küsa tsotho shehnyi kümüthuoh kenüh.

⁴ Asia azhih vü Johan nüh Nazizheh türü vü kütsü: Khinyi nga teküwa vü nga thi kürule vü nga küpehwa, ma kajipe atüvü sietse türü vünüh,

⁵ thi Jisu Khrista zhütsanü povüküsawa, aküsü vünüh viküüsüra pokhuwa, thi ma tü azhih vü kajiri nyia kajiwa Saküüwuowa vünüh küru küümze thi luoveh kürünyiwa tü nohri azhi küsawa saluo. Ma nüh hiri kümüzeveh, thi ma küsü vünüh hiri kükhiemuo lejatsüthuoh,

⁶ ma nüh hiri tü Saküüwuowa thi Pawa zhuh küüro nta kajipe tsari küsamüthuoh. Jisu Khrista vü küthohlathovü thi kükhra küsuokürho sehkhe küju saluo! Amen.

⁷ Halie, ma tü külu rügi vünüh tsethuoh! Nyiri aveh thi ma thatsuo küshüri nga ma ngu naveh. Azhih vü nyiri aveh ma külu naveh. Jüta sawie naveh! Amen.

⁸ “Hi thuoüji powa thi sehkhewa,” ta VÜWA Saküüwuowa Aveh kükhratsawa nüh küza veh, ma tü khinyi nga, khanavü nga, thi thuohtü vü nga küpehwa.

⁹Hi thuoüji Johan, nohri anü, thi Jisu sehnyi sanü hi tü ma Kajipe azhi küsari vü kümnomna kütse vü küzhikezhikhri nü nohri sie küsü küsawa. Hi nüh Saküüwuowa zhü thi Jisu nüh küzhütsa küüthsüwa zie küza ti küsa kenüh Hi tü Patmos azhihküshuke vü viwa sa.

¹⁰VÜWA rülo vü Sietsewa nüh hi rükietse ünü azhü küzie khi künara, jikhi jüma tü atütü khi kümüjie eh se vünüh künara.

¹¹Jüma nüh hi vü, “Noh nüh momowa ngu veh nüh rhü nü lasiwa vi anyu küji türü hamari Nazizheh vü küze luo: Efesari, Smirna, Pergamum, Thiatira, Sardis, Filadelfia thi Laodikia vü küze luo,” ti küza.

¹²Thawa nüh hi vü jüleveh nüh ti hi tü küzüle nü no, thinü latipe türü ngura,

¹³ thi mari azhie vü küsü thuoüji nyiri kümüjie, küüzhuvüh ajih küju thse, thi suna kütsekevüh nüh ma küso tse küzüle.

¹⁴ Ma sheh tü alo kümüji nyutü amüra kümüjie müji huothethe, thi ma notha tü anyih kümüjie wierake;

¹⁵ ma mpha tü asahwuo lü küsa nyutü shokümtse küsa kümüjie zihzih ta, thi ma khi tü ajuh küji khi kümüjie.

¹⁶Ma ke azhie wuovü awutsi türü vi, ma po vünüh anyu awuowuo kütu küsü shuru. Ma nyia tü rülo vü rünyi küwie kümüjie wierake.

¹⁷ Hi nüh ma no ünü, hi tü ma tüvü küsüri kümüjie küluzeh tewa. Ma ke azhie wuovü nüh hi pa taji, “Mükrütümü luo, hi thuoüji powa thi asewa.

¹⁸Hi thuoüji rhoküpehwa! Hi tü küsükeri sü, thitü khinyi thuoüji küsuokürho sehkhe küju rhovehthuoh. Hi aküsü nyia vü thi azhih küsüwa kükhra pehveh.

¹⁹Jükenüh noh nüh ngu küveh khinyi pehküvehri nga thi thuohtüvü sana saküvehri nga aveh rhü luo.

²⁰Noh nüh eh ke azhie wuovü wutsi thi suna latipe türü küthi küsa zhühnyowa wiethuoh. Wutsi türüri tü Nazizheh türü vü rügizhühleri wiethuoh, thi latipe türüri tü Nazizheh türüri wiethuoh.”