Read Pochuri Naga KÜTHSÜKÜTSÜ 11 Bible Online

KÜTHSÜKÜTSÜ 11 - Pochuri Naga bible

KÜTHSÜKÜTSÜ 11

¹Thinü zanyoküütevüh kümüjie küsa athso küsü hi tsü nü hi vü, “Wa taji Saküüwuowa kükhurüzhe thi kükhurüpe küteluo, thi thari nüh kükhurüzhe vü khurü veh nüh chie luo.

² Thitü kükhurüzhe alieri thuoüji müküte tümü, küpakenühnyunü jümari tü mükütsotüri vü tsümüthuoh, thi mari nüh asah zürake nü künyi Kümtse Nyuküjiwa ajih nüh nyi naveh.

³Hi nüh eh povüküsari nyi künyi anyi rüthsü küüzhu nü küzenaveh, thi masü nüh rülo 1,260 Saküüwuowa zhühle phrahtenaveh,” ti küza.

⁴ Povüküsari jü künyi tü Olive rhu künyi thi jümasü tü azhih vü VÜWA atüvü tsieküveh lati künyiawa.

⁵Nyi wuori nüh masü sakümnomna nta thuoüji masü apo vünüh anyih shuru nü masü mükünongüri zorie mümüti; hakümjie vünüh thari nüh masü sakümnomna nta sanaveh nüh zothe naveh.

⁶ Masü nüh tsomüküürü nta thajüwu kükhera kümühie kükhrapehveh, jüta thuoüji masü nüh Saküüwuowa zhühlewa phrahteküveh tsotho vü thuoüji tsokürüwa nyu. Masü tü ajuwishuküveh ajuhri nga azüh saküüjera kükhra pehveh, thi masü nüh shie khinyi mo tsotho vü azhih fe taji kümnomna tsüngüveh nüh kütsüra kükhra pehveh.

⁷ Masü nüh zhühlewa phrahte jura thuoüji asa kümüsüwa azhikrie küshe tsahtsah lo vünüh shuru nü masü sie saluonaveh. Ma nüh masü chamü nü masü zothemü naveh,

⁸ thi masü kümo tü mari VÜWA küzeke azhie nyuküjiwa lekhujivü sanaveh. Anyu ma nyo küthse küji jüma thuoüji Sodom, nyutü Egypt.

⁹Nyiri aveh nüh, akuoh aveh nüh, zhü küpapa küphra aveh nüh thi nyiri kürho aveh nüh rülo küche nü küzhila masü kümo nonaveh, thi masü kümo müküüchowu nta sanaveh.

¹⁰Azhih nyiri tü hamasü küsü kenüh lozhe naveh. Mari tü hamasü küsü kenüh tsotho kümühie vünüh viküze naveh thi kütsüküsuo nga kütsüluo sanaveh, küpakenühnyunü setsaküthsü hamasü nüh nyiri vü kümnomna hozake viküru kenüh.

¹¹ Rülo küche nü küzhila vü kürho kütsü rütho Saküüwuowa vünüh masü vü turu, thinü masü tü te süra tsie; thi masü künguri aveh tü krü sheh.

¹² Jütiküsavü setsaküthsü künyi tü thajüwu vünüh jikhi masü vü zie küru küünara vü, “Havü teküru luo,” ti küza. Jütisanü masü mükünongüri nüh masü no küveh vü masü tü akülu vünüh thajüwu vü tekuo.

¹³Jütsotho khem ti küsa vü khieloti amükhrüküzhüh; thinü nyuküjiwa küüsuo türake sanü küsü zoriemü, thi nyi anyietürü zothemü. Thi anyi küpari thuoüji khieloti krü sheh, thi thajüwu vü Saküüwuowa küji siake.

¹⁴Kümnomna künyiawa tewathuoh, thitü kümnomna kücheawa shita ru naveh.

¹⁵Thinü rügizhühle türüawa tü ma tütü khu, jütiküsavü thajüwu vü jikhi khielota sanü, “Azhih nyia vü kaji na küsakükhra khinyi thuoüji hiri VÜWA thuoh thi ma Messiah thuoh, thi ma nüh küsuokürho sehkhesehkhe küju kaji nathuoh,” ti küza.

¹⁶Thinü sierhü kükhruo mükeke nü müzüri Saküüwuowa tüvü mari kajipe vü pehküvehri tü mari nyia kükiatsuo nü Saküüwuowa khurü nü;

¹⁷küüza: “VÜWA Saküüwuowa Kükhratsahwa, khinyi nga thi khanavü nga thi thuohtüvü nga küpehwa! Noh nüh no kükhra küjiwa vi nü kaji na saküvehthuoh kenüh hiri noh müna sheh!

¹⁸ Mükütsotüri tü khieloti müküüzara sanü arüshu, küpakenühnyunü mari arüküshu tsotho rupehküvehthuoh kenüh, aküsüri ashih sana küsa tsotho tü rupehküveh thuoh kenüh. Nohri sieperi, setsaküthsüri thi noh nyiri aveh, noh kühukrüri aveh, küji thi küzah aveh zarike vünüh jisuo tsüna küsa tsotho rupehküvehthuoh kenüh. Azhih küzorieri zorie na küsa tsotho ru pehvehthuoh,” ti küza.

¹⁹ Thajüwu vü Saküüwuowa kükhurüzhe tü samü tü, thi jüla Kütsathuoh Ku nga ngu. Jütiküsavü atsoküürie, jikhi küsa, thi tsoküshi khi, mükhrüküüzhüh, thi razhi khielota tsuotsa ru.