Read Pochuri Naga KÜTHSÜKÜTSÜ 13 Bible Online

KÜTHSÜKÜTSÜ 13 - Pochuri Naga bible

KÜTHSÜKÜTSÜ 13

¹ Thinü asa kü sü juhküji lovü nüh shuküru hi nüh ngu. Jüma tü rütsü türake peh thi alü türü peh; rütsü rügi vü kajilüwe peh kheh, thi alüri rügi vü Saküüwuowa phraküümüsü anyo peh khe.

² Hi nüh küngu vü asawa tü amietüwa kümüjie ma mpha tü awie mpha kümüjie thi ma po tü amiewuowa apo kümüjie. Asawa nüh ma kükhra, ma kajipe, thi ma kükhra aküji vi ma tsü.

³Ma lü küsü tü müsamüna nü küsüra kümühie kümüjie hi nüh ngu, thitü kümüsamüna thsopowa tü sakümühiemüthuoh. Azhih aveh tü aküngo sanü asawa ase nyi.

⁴Anyi aveh nga müre anyih küsahzhuwa khurü, küpakenühnyunü ma nüh kükhra vi asawa tsükümüthuoh kenüh. Mari tü asawa nga khurü taji, thawa nü asawa kümüjie lo? Thawa nüh ma sie saluora na lo? ti küza.

⁵ Asawa vü tü Saküüwuowa müküchie phra na küsa kürhieza zhüri tsü, thi asah zürake nü künyi jüüta küsa kükhra vi ma tsümü.

⁶Ma nüh Saküüwuowa, ma nyo, ma nüh küpehpe, thi thajüwu vü küpehri aveh müzü.

⁷ Ma nüh Saküüwuowa nyiri sie saluo nü mari anyia vü cha na küsa kükhra tsümü, ma vü akuoh aveh vü, anyi aveh vü, azhü küpapa küphra aveh vü thi anyi kürho aveh vü kükhra tsümü.

⁸ Nyihzhüza fethekümüwa nyiri, kürho lasi lovü azhih müjie küsa vünüh anyo rhükümüri küchie nüh azhih vü kürho nyiri aveh thuoüji ma khurü naveh.

⁹“Khüna pehküvehri thuoüji künaluo!

¹⁰Thari nüh aküsi vü siewa naveh nüh jümari thuoüji aküsi vü wa wie naveh; thari nüh anyuchuwa nüh zothe naveh nüh mari thuoüji anyuchuwa nüh zothewie naveh. Hama tü Saküüwuowa nyiri küüzhike thi kütsotü kenüh küji,” ti küza.

¹¹Thinü azhih vünüh asa küpa küsü shuküru hi nüh ngu. Ma tü nyihzhü rütsü kümüjie rütsü künyi pe, thi asa mürewa kümüjie azhü phra.

¹²Ma tü asa apowa atüvü kükhra aveh vi. Ma nüh azhih thi jüla küpehri aveh wurie nü asa apowa, ma kümüsamüna sakümühie kümüwa küükhurü.

¹³Asa künyiawa nüh küükrükükra hozake sa; thajüwu vünüh anyih saküje nü nyiri aveh küngu vünüh azhih vü viteru.

¹⁴Asa apokhuwa atü vünüh sa üta tsükümü küükrükükra küüro sanü azhih vü kürho nyiri aveh ma nüh müra. Jütisanü anyuchuwa vünüh müsamüna tü müküsüwa küsiake vünüh ma tsorhe sa üta asawa nüh mari vü küza.

¹⁵Asa künyiawa tü apowa tsorhe saküsawa vü kürho rütho küsahke tsü, jütisanü tsorhewa tü azhüphra thi thari nüh ma mükhurü nüh sanaveh nüh jümari thuoüji ma nüh zothemü naveh.

¹⁶Asawa nüh wurie nü nyiri aveh: küza, küji, künyirhieri, kümükhuori, tühkha küsari thi müküsari aveh mari ake azhie wuovü nyutü mari atie vü athsoshi feke üti küza.

¹⁷Thsoshi hamaa: sawa nyo nyutü nyowa müthoh vünüh küürükhuh müküperi thuoüji zanyo küsü nyutü aküzhu müsara wie.

¹⁸Hama nüh aküthsü küji kenüh. Thari nüh zanyoküthsü pehveh ünüh jümari thuoüji asawa küürükhuh zhühnyowa kürüzhura naveh, küpakenühnyunü küürükhuhwa tü nyi küsü anyo peküveh kenüh. Ma küürükhuh thuoüji 66