Read Pochuri Naga KÜTHSÜKÜTSÜ 14 Bible Online

KÜTHSÜKÜTSÜ 14 - Pochuri Naga bible

KÜTHSÜKÜTSÜ 14

¹ Jüsevü hi nüh noküze ünü, Nyihzhüzawa tü ma nyiri 144,000 mari atie vü ma nyo thi ma Pa nyo ti rhüke nü Zion Küzhiho rügi vü sie tsieküveh ngu.

²Jütiküsavü thajüwu vünüh ajikhi ajuh külikhi thi mükütuowiethuoh nüh küsa atsoküshi khi kümüjie küsa hi nüh künara. Jikhi jüma tü aza küsari nüh mürüli hu nü khu nü aza küsa khi kümüjie.

³Anyi 144,000 tü kajipe, rhoküveh asa müzüri, thi sierhükükhruori atüvü tsie; mari tü aza kürüthe mari mpa nüh küthsüra mpa sa. Nyiri kürho aveh vü mari mpa kürhesa wie.

⁴A nyi nyimpa hamari tü nyimzari küsü nga sie nü küpehküzehmüsanüh mütse, mari tü müküüwuosari Nyihzhüza nüh khiekhievü wa naveh nüh ma se nyimüzhe. Mari tü nyiri aveh vünüh kürhesari thi mari tü Saküüwuowa thi Nyihzhüza masü atüvü kütsükhuri.

⁵ Mari tü azhükürie phrahte na küsa müthsü wie; mari tümüküle münyie.

⁶Thinü rügizhühleri küsü rügi vünüh küsuokürho zhühlewa vi nü kütse hi nüh ngu, ma nüh zhühlewa vi azhih vü kürhonyiri kürho aveh vü, akuoh aveh vü, azhü küpapa küphra aveh vü thi nyiri aveh vü küthsükütsü nta prüru.

⁷Ma nüh zie nü, “Saküüwuowa krü luo thi ma küji siakeluo! Küpakenühnyunü nyiri kürho aveh ashih sa nta küsa tsothotekütsethuoh kenüh. Jükenüh thajüwu, azhih, juhküji, thi ajuwiküshuri küsawa khurü luo,” ti küza.

⁸ Thinü rügizhühle küpa küsü apowa asenyi ru nü, “Babilon Nyuküjivühwa külumüthuoh! Ma nüh nyiri aveh ma kha kümüzo küüphroküphrie kümüngu küüzhu kümüthuoh kenüh,” ti küza.

⁹Rügizhühle kücheawa tü apo künyi ase vü ru nü zie taji, “Thari nüh asawa thi ma tsorhewa khurü naveh thi ma thsoshiwa atie vü nyutü ake vü fekevü naveh nüh,

¹⁰ ma thuoüji Saküüwuowa nüh khielota arüküshu akhawa zhunaveh, jümatü ma nüh kükhra aveh küshozhuru nü ma rüküshuhuo lovü küthsewa! Hama küsari aveh thuoüji rügizhühleri kümtse atü vünüh thi Nyihzhüzawa atü vünüh anyih thi aloh amekükhrawa tso nü anyikhu kümüzhi küshu vünüh sakümnomna naveh.

¹¹ Mari saküümünomüna nyikhuwa tü küsuokürho sehkhesehkheküju rügi vü krükekuo peh huo naveh. Anyi küsüküsü nga manyo thsoshi peh nü ma thi ma tsorhe kükhurüri thuoüji rülo thi rüza küsü nga kürüzih münyie,” ti küza.

¹²Hama tü Saküüwuowa nyiri, thari nüh Saküüwuowa nüh azhükütsüri küna thi Jisu vü zhütsanyitsa nüh jümari küüzhike kenüh küji.

¹³Thinü hi tü thajüwu vünüh jikhi küünara vü, “Hama rhüluo: Thari nüh VÜWA küüro kenüh khinyi vünüh sü naveh nüh kümünga tsari,” ti küza. Zhütsa wiethuoh! ti Sietsewa nüh rüle. “Mari tü mari küüro vünüh loküra kümünyie sanaveh, küpakenühnyunü mari küüro rühle küshu tü mari vü nyiwa naküveh kenüh,” ti küza.

¹⁴ Jüsevü hi nüh noküze ünü akülu kümüji küsü ngu, akülu jüla nyiri kümüjie küsa ma lü rügi vü suna lüwe vü thi ma ke vü ahira akütu küsü vi ti küsa ngu.

¹⁵ Thinü rügizhühle küpa küsü kükhurüzhe lo vünüh shurunü akülu rügi vü pehküvehwa vü zie taji, “Noh hira vi nü mahwie luo, küpakenühnyunü tsotho jukümüthuoh kenüh; azhihwatü nenü mahwie mühievehthuoh,” ti küza.

¹⁶Thinü akülu vü pehküvehwa tü ma hira vi azhihwa wie nü azhih kümahwie sara.

¹⁷Jüsevü nga rügizhühle küpa küsü nüh thajüwu vü kükhurüzhe vünüh ahira kütu küsü küjeke nü shuküru ngu.

¹⁸Jütiküsavü rügizhühle küpa, anyih kühuowa kükhurüpevünüh ru. Ma nüh rügizhühle ahira akütu viküvehwa vü ziekürügi she taji, “Noh hira vi nü azhih vü rhelivi zhuh vünüh rheliviri rethuoh vi luo, küpakenühnyunü rheliviri tü neküvehthuoh kenüh,” ti küza.

¹⁹Thinü rügizhühlewa nüh ma hira vi azhih vü wie nü rhelivirhu vünüh rheliviri rehthuoh vi nü Saküüwuowa arü khieloti küshu akhakütsüzhuku lovü thse.

²⁰Jütisanü rheliviri tü anyuküji alie vünüh akhah kütsüzhukulovü nüh tsü zhu, thinü akhakütsüzhuku lovü nüh azüh juhküji kümüjie shuru nü, lehkhuji küüte aloh küshie müzaküche litewa thi ma küsheh thuoüji ale künyi kümüjie sheh.