Read Pochuri Naga KÜTHSÜKÜTSÜ 17 Bible Online

KÜTHSÜKÜTSÜ 17 - Pochuri Naga bible

KÜTHSÜKÜTSÜ 17

¹Thinü rügizhühle türü vü küsü akhu türü küpehwa tü hivü ru nü, “Raluo, küüphroküphrie küthohlavühwa tü mokümjie kümnomna tsü naveh nüh hi nüh no kütsanaveh, anyuküji jüma tü arügu hozake kütuo vü sa saveh.

²Azhih vü kajiri tü asazüh küüphroküphrie ma vünüh mütenü thsüra, ma küüphroküphrie akha küzhu vünüh azhih vü nyiri tü müshe,” ti küza.

³Sietsewa nüh hi sie rükie nü reza vü sietewa. Thinü ma rügivü Saküüwuowa nyo phraküümüsü kürhüke kheh asa kümüru küsü hi nüh ngu; asawa tü alü türü pe thi arütsü türakepe.

⁴Nyimzawa tü ma thsümünyi küsümo thi müruküchiechie, thi suna nüh küsa, aloh amekükhra, thi aloh amekükhrawa nüh vi sa. Ma ke vü suna huo küsü küüphroküphrie mükümtse kümüshe thi akükre nüh küprovi, mazhühnyo thuoüji ma küüphroküphrie müke.

⁵Ma tie rügi vü anyo küsü mazhühnyo küsheh, “Babilon Küjiwa, küüphroküphrieri aveh azawa thi azhih saküümüsüwa,” ti rhükevü.

⁶Thinü nyimzawa tü Saküüwuowa nyiri azüh nüh thi Jisu nyiri küsa kenüh fethekümüri azüh nüh müshe küveh hi nüh ngu. Hi nüh ma küngu vü küzüla müngo

⁷“Noh tü mokenüh ngo lo?” ta rügizhühlewa nüh hi küna. “Hi nüh nyimzawa kenüh azhüküsheh thi asa, alü türü thi rütsü türake küpewa nyimzawa vü kütsewa zhühnyo küshehküza naveh.

⁸Asa jüma tü küsükeri nü rho, thitü mürhorathuoh; ma tü azhikrie lovü nüh shuru nathuoh thi zothekümüvü tewanathuoh. Azhih hama müjie küsa vü nyi thari anyo kürho lasipha lovü müjie rhüke nüh mari nüh asawa küngu vü ngo naveh. Jümatü küsükeri rho, thitü khinyi thuoüji rho müvehthuoh, tü ngu le naveh.

⁹“Hama nüh aküthsü thi kümüshi küji kenüh. Alü türüri tü nyimzawa nüh shuküpe küzhiho türüri. Jümari tü kaji türüri nga wiethuoh:

¹⁰müngari thuoüji külutewathuoh, küsü thuoüji khinyi nga kaji wieveh; thi küpa küsüwa thuoüji müjie ru; ma ru thuoüji matü tsotho pike mpa kaji naveh.

¹¹Thi asa küsükeri rhothuohtü khinyi rho müküvehwa tü kaji tüzeawa thitü ma nga türüawa azhi wiethuoh thi ma tü küzorievü tewa nathuoh.

¹² “Rütsü türake noh nüh künguri tü kajiri türake müjie rukükajiri, thitü asawa sie nü münühu küsü küükaji nta kükhra tsü naveh.

¹³Türake hamari aveh tü kürü kümüshe küsü wie, thi mari tümari kükhra thi kaji kükhra vi asawa tsü.

¹⁴Mari tü Nyihzhüzawa sie saluo naveh; thitü Nyihzhüza nüh ma nüh ji kasari thi rüka küsari thi ma sehnyiri sie nü mari chamü naveh, küpakenühnyunü ma tü vüwari nyia vünüh VÜWAthi kajiri nyia vünüh Kajiwa küsa kenüh,” ti küza.

¹⁵Rügizhühlewa nga nüh hi vü, “Küüphroküphrievühwa nüh ajuhri rügivü shupehküveh noh nüh ngu küveh thuoüji, akuori, nyiri, anyi kürhori, thi azhü küpapa küphrari.

¹⁶Noh nüh ngu küveh arütsü türake, thi asawa masü nüh küüphroküphrievühwa mürhü naveh; jümari nüh ma zhi aveh vitewa nü kürütso ma ja naveh; jümari nüh ma satsa tsanaveh thi anyih vi ma zoriemü naveh.

¹⁷Küpakenühnyunü mari kürü ma kümüshewa küüsa nta küsakenüh kümüshe küsü küsa mari müshe lovü thsemütü thi Saküüwuowa zhüri müjie küju nü asawa nüh küükaji nta mari kükhra tsümü.

¹⁸“Nyimzawa noh nüh künguwa tü nyuküjiwa azhih vü kajiri anyia vü kaji küvehwa,” ti küza.