Read Pochuri Naga KÜTHSÜKÜTSÜ 18 Bible Online

KÜTHSÜKÜTSÜ 18 - Pochuri Naga bible

KÜTHSÜKÜTSÜ 18

¹Hamase vü thajüwu vünüh rügizhühle küpa küturu ngu. Matü kükhra peh she, thi ma küwie nüh azhih aveh wieke kheh.

²Ma tü zia taji, “Ma tü külumüthuoh! Babilon küjiwa tü külumüthuoh! Ma thuoüji sietse kümüsüri thi mükümtse sietseri ape samüthuoh; zanyo mükümtseri thi akükre amüwari tü ma vü rho veh.

³Küpakenühnyunü akuoh aveh ma sazüh kümüngu ma kha kümüzowa nüh müshe khehmüthuoh. Azhih vü kajiri tü asazüh muomuokürho ma sie samüthuoh, thi azhih vü asüküsari tü ma kümüngu müküüzhikera vünüh nyirhie müthuoh,” ti küza.

⁴Jüsevü hi tü jikhi küpa thajüwu vünüh küünara vü, Shuteraluo, eh nyiri! Nyimzawa vünüh shuteraluo! Nohri tü ma kükhiemuo vü küsü nyi müsatümü; nohri tü ma kümnomna nyi küüsuovüh nyu!

⁵Ma kükhiemuori tü müjuke nü thajüwu kümüsie thake thuoh, thi Saküüwuowa nüh ma kükhiemuori müshe veh.

⁶Ma nüh mokümjie nohri vü sanüh jükümjie nohri nga ma vü satsüluo; ma nüh momokümüjie sanüh jüma nyia vünüh ma vü thuohtsüle luo. Ma nüh küzake küche nü nohri küzhu nüh jüma nyia vünüh kümüzo künyikeri ma huo saküpro tsüluo.

⁷ Ma nüh ma mpa küzakele küthohla thi loküra sanüh jüzake kümnomna thi lokürü vi ma tsüluo. Küpakenühnyunü ma mpa nüh ma küzaküpeh huo thuoüji: “hi tü kaji vüh küsü, hi tü hala shupeh veh! Hi tü tühnyivühri nyu! Hi tü piketü lokürü künguwa nyu,”

⁸Hakümjie küsa kenüh rülo küsü ma tü kümnomna ma kanaveh. Küsaküna, lokürü, thi kümükhuojih ma vü ru naveh. Thi ma tü anyih nüh tso naveh, küpakenühnyunü VÜWA, Saküüwuowa ma müshekümüsüwa tü khra sheh kümü kenüh, ti küza.

⁹ Azhih vü kajiri thari nüh ma sie küüphroküphrie thi kümüngu sanüh ma kütso nyihzhu vünüh nyikhu ngu thuoüji nyuküjiwa nyia vü krie thi külu naveh.

¹⁰Mari tü kületsuo vü tsietewa naveh, küpakenühnyunü mari tü ma kümnomna küüsuo kükrü kenüh, Mari nüh, “Küzakelenga küngo, thi küükrükükra nüh! Babilon kümüzho thi küjihama tü! Münühu küsü vünüh noh tü kümnomna ngumüthuoh nü,” ti küza.

¹¹Azhih vü asüküsari nga ma kenüh krie thi külu, küpakenühnyunü nyi küsü nga mari zanyo müküsürhuotüthuoh kenüh;

¹² nyi küsü nga nüh mari suna, aloh amekükhrawa, aloh amekükhrari, thi anga vünüh küngu amekükhrari; alori, küsümo thsüri, alo külozüri, thi kümüru; thi athso shie khinyi shita müküngurari aveh, thi aruoha nüh küsa zanyori, thi athso amekükhrari, asahwuo, amürü, thi marble,

¹³athsosa, ahiechu, athsomüchuh tsoküünguvüh, athsorhe küüngu, thi zanyo arheküüngu; akha thi avüjuh, ahie thi hiemütha, mieshü rüli thi anyihzhü, arawuh, zanyoküshohvü, atühkhari, jü mpa mükünyu nyiri kürhowie nga müküsütü thuoh kenüh.

¹⁴Asüküsari nüh ma vü, “Noh nüh küvingü zanyori tü aveh münyiethuoh, thi no künyirhie thi no küzü aveh tewathuoh, thi notü jümari müngura le wiethuoh,” ti küza.

¹⁵ Anyu jüla nüh asü sanü künyirhierari tü kületsuo vü tsietewa naveh, küpakenühnyunü mari tü ma kümnomna nyiküüsuo kükrü kenüh. Mari nüh krie thi külu taji,

¹⁶“Nyuküjiwa kenüh küzakele nga aküngo thi küükrükükra nüh ma tü ma mpa nüh alo külohzü nüh küto athsü küsümo nüh küto athsü, thi kümüru nüh kütori vi ma saküzüzüti, thi suna nüh küsa zanyori thi aloh amekükhra zanyori thi anga vünüh küngu amekükhrari, vi ma küzhuzhuti!

¹⁷ Thitü münühu küsü vünüh ma tü künyirhie hamari aveh kümiemüthuoh.” Juhie vü sierhüri aveh thi jülo vü kütseri aveh thi juhiekühieri aveh thi küpari juhküji vünüh mari avo phatsakütseri aveh kükietuo vü tsietewahuo,

¹⁸ jütisanü ma kütso nyihzhu vünüh nyikhu shuküru ngu ünü mari tü zia nü: “Nyuküji hakümjie küsa küpa küsü nga münyie,” ti sa.

¹⁹ Mari tü mari alü rügi vü azhih vi mülo nü krie thi külutaji, “Nyuküjiwa kenüh küzakele nga küngo thi küükrükükra nüh! Ma tü juhküji vü juhie küpehri nüh ma künyirhie vünüh ma tü zanyo aveh kümiemüthuoh,” ti küza.

²⁰ Ma zorie kümü kenüh thajüwu lozheluo! Saküüwuowa nyiri, thi povüküsari, thi setsaküthsüri lozheluo! Küpakenühnyunü ma nüh nohri vü mowa sanüh jüma kenüh Saküüwuowa nüh ma müshe müsümüthuoh!

²¹Thinü rügizhühle kümüzho küsü nüh aloh zanyoküürenyahvü aloh rike juhküji lovü khajake taji, “Hakümjie vünüh Babilon nyuküjiwa tü wurie vehjamü naveh thi piketü küngulewa nyuthuoh.

²² Mürüli hurü nü aza kükhuvüh khi, thi nyiri jikhi thi pilechu kükhukhi, thi tütü kükhu khi no vünüh küünaralewanyu thuoh! Küüro küsari rühle küsüküsü vünüh nga sa tüno vünüh küngulewa nyuthuoh; zanyoküürenyahvü alo khiwa tü piketü küünaralewa nyuthuoh!

²³Noh vünüh anyih küwie piketü küngulewa nyuthuoh; no vünüh kümünyutevüh thi kümünyutepa jikhi küünaralewa nyuthuoh. Nohsü küsari tü azhih vü kükhratsahri, thi no küriekümüsemüshih vünüh azhih vü nyiri aveh müramüthuoh,” ti küza.

²⁴Babilon tü kümnomna tsümü, küpakenühnyunü setsaküthsüri thi Saküüwuowa nyira züh tü nyuküjiwa vünüh küngura kenüh; ah, azhih vünüh küfetheri aveh azüh jüla nüh ngura.