Read Pochuri Naga KÜTHSÜKÜTSÜ 19 Bible Online

KÜTHSÜKÜTSÜ 19 - Pochuri Naga bible

KÜTHSÜKÜTSÜ 19

¹Zanyo hamari sevü thajüwu vünüh anyi ashieji jikhi müküzara nüh küsa kümüjie hi tü künara taji, “Saküüwuowa siakeluo! Küülole, küthohla thi kükhra tü hiri Saküüwuowa zhi!

²Zhütsa thi kümüsho vünüh ashih küsa tü ma! Ma küüphroküphrie vi nü azhih saküümünevühwa ma nüh müshemüsümüthuoh. Ma nüh ma sieperi zothekümü kenüh Saküüwuowa nüh kümnomna vi ma tsümüthuoh”, ti küza.

³ Mari tü ziele taji, “Saküüwuowa sieke! Nyuküjiwa tsoküveh nyihzhüwa nyikhu tü küsuokürho sehkhesehkhe küju rügi vü krükekuo wie naveh,” ti sa.

⁴Sierhü kükhruo mükeke nü müzüri thi asa rhoküveh müzüritü kükiatsuo Saküüwuowa, kajipe rügi vü küpehwa khurü, Mari nüh, “Amen! Saküüwuowa Siake luo,” ti küza.

⁵Jüsevü kajipe vünüh akhi küsü küzie ru taji, “Ma sieperi aveh, thi nyiri aveh, küji thi küza ma kükhurü aveh hiri Saküüwuowa siakeluo,” ti küza.

⁶Thi anyi shieji khi kümüjie, ajuhküli khi kümüjie, mükütuothuoh nüh atso khielo ta shiküveh kümüjie hi nüh künara. Mari nüh, “Saküüwuowa siakeluo! Küpakenühnyunü VÜWA, hiri aveh kükhratsah Saküüwuowa tü Kajiwa küsa kenüh!

⁷Hiri kürü lozhe thi alowie ünüh raluo! Küpakenühnyunü Nyihzhüza kümünyute tsotho tü tekütsethuoh kenüh, thi ma siekümünyutevühwa tü ma mpa nüh jüma kenüh küchevehthuoh.

⁸Thi ma tü alo külohzü nüh kütothsü kümtse küüria vivü üti ma tsü,” ti küza. (Alo külohzü nüh kütothsü tü Saküüwuowa nyiri küüro kümühie kenüh.)

⁹Thinü rügizhühlewa nüh hi vü, “Hama rhü luo: Nyihzhüza kümünyute kütsazhu vü jiküsari tü kümüngatsahri,” ti küza. Rügizhühlewa nüh küüzalehü, “Saküüwuowa zhüri tü zhütsa,” ti küza le.

¹⁰Hi nüh ma khurü nti ma jih vü künyiatsuo, thitü ma nüh, “Jüti müsatümü! Hi nga no sie nü kütsüküünari küsü wie, thi no füwie, Jisu nüh kütsaküngu kütsü küzhütsa küüjekeri sie küsü wie. Saküüwuowa khurü luo,” ti küza. Küpakenühnyunü Jisu nüh kütsaküngu kütsü küzhütsawa tü setsaküthsüri luoveh tsotsüveh.

¹¹Jüsevü thajüwuwa tü sa ünü rawu kümüji küsü hi nüh ngu. Ma rügi vü kütsewa tü Künyitsahwa thi Küzhütsawa tiji; ma tü kümüsho vünüh nyura shih sa thi ma arie vü saluo.

¹²Ma notha tü anyihzhü kümüjie, thi ma lü rügi vü kajilüwe hozake vü. Ma rügi vü anyo küsü rhükevü, thitü ma mpa nüh wie küchie nüh nyi küsü nga jüma müthsü.

¹³Ma nyo thuoüji “Saküüwuowa Zhü,” ta.

¹⁴Thajüwu vü arienyiri tü alo külohzü nüh kütothsü kümüjivü nü rawu kümüji rügi vü peh khe nü ma se nyitsa.

¹⁵ Ma po vünüh anyuchu kütu küsü shuru, thi jüma vi akuoh aveh cha naveh. Ma nüh mürü kütsüh vi mari anyia vü kaji naveh, thi ma nüh Saküüwuowa arü khielota küshu kha rhelivikütsüzhupeh vünüh rütsezhu naveh.

¹⁶Ma thsümünyi thi ma thüchi rügi vü anyo: “kajiri nyiavünüh Kajiwa thi vüwari nyia vünüh VÜWA,” ti rhükevü.

¹⁷Jüsevü rügizhühleri küsü rünyi rügi vü tsieküveh hi nüh ngu. Thinü ma nüh amüwa amürhü azhie vü prükütseri avehvü azhü zie taji, “Saküüwuowa kütsazhu küjiwa kenüh sehzhuluo!

¹⁸Ra nü kajiri asa, arienyi küjiri asa, arienyiri asa, rawuri asa, thi mari rügi vü kütseri asa, nyiri aveh asa, atühkhari asa, mükünyuri asa, anyi küji thi küza aveh asa tsaluo,” ti sa.

¹⁹Jüsevü hi tü asawa thi azhih vü kajiri thi mari rienyiri türawu rügi vü kütsewa thi ma rienyiri siesaluo nti sehzhu.

²⁰Asawa tü akürie setsaküthsüri ma tü vünüh küngothsoshiküsari sie aküsi lovü thsemü. (Küngo thsoshi jümari vi nü asawa thsoshi küvüri thi asawa tsorhe kükhurüri müra.) Asawa thi kürie setsaküthsüri tü kümürhomürho nyihsuozü zanyo arhekümüne nüh tsoküsa lovü thsemü.

²¹Mari rienyiri thuoüji rawu rügi vü kütsewa apo lovü nüh shuküru anyuchuwa nüh rehthe khehmü; thi amüwari nüh mari asa kütsara mükütsara tsa.