Read Pochuri Naga KÜTHSÜKÜTSÜ 2 Bible Online

KÜTHSÜKÜTSÜ 2 - Pochuri Naga bible

KÜTHSÜKÜTSÜ 2

¹Efesa vü rügizhühlera Nazizheh vü rhükütsü: zhühle hamatü ma ke azhie wuovü wutsi türü viküvehwa nüh kütsü, thi ma tü suna latipe türü aza vü tsewatseru tiküsawa.

²Noh nüh mowa samüthuoh nüh hi nüh thsüveh; noh nüh küzakelekükhra thse nü küro thi küzakele nga küzhikezhikhri ru nüh hi nüh thsüveh. Noh nüh anyi kümüsüri vü müküüzhikera hi nüh thsüveh, thi thari nüh mükünyu vünüh povü küsari tasatse nüh jümari nga noh nüh mütethuoh, thi mari tü akürierita nga thsürathuoh.

³Noh tü küzhikezhikhri, eh kenüh noh tü münomünathuoh, tü müjawie.

⁴Thitü hi nüh noh vü luoveh mükümühie pehveh: jüma thuoüji notü atükhuvü kümüjie hi mükümüze nüh samü.

⁵Noh küthake külu nü letsuotewa thuoh ünüh müshe nonoluo! Noh kükhiemuo vünüh khaphrüle teru nü atükhu vü mowa sanüh jüma saluo. Noh nüh noh kükhiemuo vünüh müshele thuoüji hi nüh noh vü ru nü noh latipewa ma küsape vünüh vitewa naveh.

⁶Thitü noh nüh no kümüshe vü hama pehmü: hi nüh küzakelekre veh nüh jüzake Nikolaitanri nüh saküvehri noh tü kremü.

⁷Noh khüna pehveh üji Sietsewa nüh Nazizhehri vü mowaküzaveh nüh künaluo! Kükhrari thuoüji Saküüwuowa Phahri vü shoküveh kürho thsovi küütsara tsü naveh.

⁸Smirna rügizhühlera Nazizheh vü rhütsüluo: Zhühle hama tü apo thi asewa, sümü nü rhole küvehwa nüh kütsü.

⁹Noh kükho hi nüh thsüveh; noh tü mükhuomü ta küsa hi nüh thsüveh tü noh tü nyirhiemü Judahri ta küsari nüh kümüsüno vü phratsü veh ta saveh, thitü nyu ta küsa hi nüh thsüveh; mari tü Tsuore[2] riekhuo vü küpehri refü!

¹⁰Nohri nüh münomüna saküveh zanyo küsüküsü nga mükrütümü. Künaluo! Kümüsüwa nüh nohri anyi wuori küsizhe vü thse nü nohri müte naveh thi nohri kümnomna tü rülo türake sanaveh. Noh hi vü akükhra thse luo, sü ntawie ketünga no kükhra thse luo, jüüta thuoüji noh nüh kükhrara jisuo akürho no tsü naveh.

¹¹Nohri khüna pehveh üji Sietse nüh Nazizhehri vü mowaküzaveh ünüh künaluo! Kükhrari thuoüji aküsü akünyiawa nüh saküümünomünawanyu thuoh.

¹²Pergamum vü rügizhühlewa Nazizheh vü rhütsüluo: Zhühle hama tü anyu awuowuo kütuwa nüh kütsü.

¹³Hi nüh thsüveh noh küpehpe tü Tsuore kajipe vü. Noh tü hi vü nyitsanü eh povü sakütsewa Antipas Tsuore küpehpe vünüh zothemüwie ketünga noh kütsotü tü müja wie.

¹⁴ Thitü hi nüh noh vü zanyo wuori mükülo pehveh: nohri azhie vü anyi wuori Balaam küsosiezhü müzhe veh, Balak sosie taji mokümjie Israelri küchü nü tsorhe kükhurü vü zanyotsüküsari kütsa thi küüphroküphrie küüro sanü saküükhiemuo naveh nüh ta küsa vi ma sosie.

¹⁵Jükümjie nohri azhie vü Nikolaitanri küsosiezhü kümüzheripehveh, jümari tü hi nüh mülo.

¹⁶Noh kükhiemuo vünüh khaphrü luo! Noh nüh jüüta nyu thuoüji hi nüh noh vü shita ru nü eh polo vünüh anyu shuküruwa vinü anyi jümari siesaluo naveh.

¹⁷Khüna küpehri thuoüji Sietse nüh Nazizhehri vü mowaküzaveh nüh künaluo! Kükhrarari thuoüji küthi küsa manna hi nüh tsü naveh. Jümpa mükünyu aküviri küchie nüh müküthsüra anyokürüthe kürhüke aloh kümüji mari nyi küsüsü vü tsünaveh.

¹⁸Thiatira vü rügizhühlewa Nazizheh vü rhütsüluo. Zhühle hama tü Saküüwuowa Tsanüh kütsü, ma notha tü anyih kümüjie wierake, thi ma mphari tü asahwuo saküüzih küsa kümüjie.

¹⁹Noh nüh mowa sa veh nüh hi nüh thsüveh. Hi no küümzewa, noluoveh kütsaza, noh küüro, thi noh küüzhikezhikhriri hi nüh thsüveh. Noh nüh khana nyia vünüh khinyi nüh küüzhi küroküveh hi nüh thsüveh.

²⁰Thitü hi nüh noh vü hama mükülo pehveh. Ma mpa nüh Saküüwuowa zhühle küphrahtewa ta ji kütse Jezebel müshemümüsü nüh ma vü küzhike küveh kenüh noh vü eh lomüküra pehveh. Ma küsosie vünüh eh sieperi küchü nü küüphroküphrie sa thi tsorhe vü zanyo vi khurü küsari tsati sa veh.

²¹Ma kükhiemuo vünüh khaphrü naküsa kenüh hi nüh tsotho vi matsüthuoh, thitü ma tü ma küüphroküphrie vünüh shelemürungü nüh samü.

²²Jükenüh hi nüh ma aze küsü rügi vü vehjake nü ma thi ma sieküüphroküphrie küsari tü küümünomüna sheh naveh. Mari nüh ma sie nü kümüsü saküveh vünüh mükhaphrü thuoüji hi nüh khinyi hama sanaveh.

²³Hi nüh ma sehnyiri nga zothe naveh, jütathuoüji Nazizheh aveh nüh hi tü nyiri aveh kümüshe luoveh küthsüwa ta thsü naveh. Nohri nyi küsüsü nüh momowa sa thuoh nüh hi nüh thuohle naveh.

²⁴Thitü nohri Thiatira vü küpeh küpari thuoüji kümüsü küsosie mümüzhe; nohri thuoüji küpari nüh “Tsuore zhüküshehri ta küjiri müthsü.” Hi nüh küüza thuoüji hi nüh nohri vü akhuo küüzho küpa küthsewa nyuthuoh.

²⁵Thitü hi müjie küru küju nü nohri nüh mowa vi veh ünüh küjehphoke pehla luo.

²⁶Kücharari thi eh küüro sehkhe küju küsari thuoüji akuoh nyiavü hi nüh kükhra tsü naveh,

²⁷mari nyia vü amürü kütsüh vi kaji naveh, thi hi nüh Pawa vünüh kükhra küngura kümüjie zhihküfüri kümüjie mari fekhuorie naveh.

²⁸Hi nüh mari vü rüne wutsi nga tsü naveh.

²⁹Khüna küpehri thuoüji Sietsewa nüh Nazizhehri vü mowaküza veh nüh künaluo.