Read Pochuri Naga KÜTHSÜKÜTSÜ 21 Bible Online

KÜTHSÜKÜTSÜ 21 - Pochuri Naga bible

KÜTHSÜKÜTSÜ 21

¹Jüsevü hi tü thajüwu kürüthe thi azhih kürüthe ngu. Thajüwu apowa thi azhih apowa tü münyie nüh satewa, thi juh küjiwa nga ratewa.

²Jütiküsavü kümünyutevüh küsü nüh thsümünyi sanü kümünyutepawa mütu nta kütse kümüjie Kümtse Nyuküji, Jerusalem kürüthewa tü küche thi lieke nü thajüwu vü Saküüwuowa vünüh küturu hi nüh ngu.

³ Thinü kajipe vünüh azhü zie küphra hi nüh künara: “Khinyi thuoüji Saküüwuowa azhe tü nyiri vü pehvehthuoh! Ma tü nyiri vü rho nathuoh, thi mari tü ma nyiri sanathuoh. Saküüwuowa mampa nüh mari siepeh nathuoh, thi ma nüh mari Saküüwuowa sanathuoh.

⁴Mari notha vünüh ma nüh mari rüthsü aveh nemütü naveh. Jüla aküsü, külorü, kükrie thi küna münyiethuoh. Zanyo kürüwiri tü münyiethuoh.”

⁵Thinü kajipe rügi vü küpehwa nüh “Khinyi thuoüji hi nüh zanyo aveh sakürüthe nathuoh,” ti küza. Ma nüh hi vü küzalehü taji, “Hama rhü luo, küpakenühnyunü azhü hamari tü zhütsa thi tsotüra naveh,” ti küza.

⁶Jüsevü nga ma nüh, “Jumthuoh! Hi tü apowa thi asewa, atükhuwa thi asehkhewa. Thari nüh ajuhkürie tse nüh juwiküshu kürho juwi ame müsanüh küüzhu na küsa tsüra naveh.

⁷Thari nüh khrara naveh nüh ma thuoüji hi vünüh hama ngu naveh. Hi tü ma Saküüwuowa sanaveh thi ma tü eh tsa sanaveh.

⁸Thitü luoveh küzari, kütsotü mükünyieri, müküle vü teküwari, nyuri küfetheri, küüphroküphrieri, kütümari, tsorhekükhurüri, thi zhükürieri aveh, hamari aveh thuoüji asuozü anyih juküveh thi aloh amekükhrawa tso nü nyikhu kümüzhi shuküvehwa tü mari ape, jümatü küsü künyiawa,” ti küza.

⁹Rügizhühle türü vü küsü akhu türü küviwa tü kümnomna türü pro nü küpehwa nüh hi vü ru taji, “Raluo, hi nüh kümünyutevühwa Nyihzhüza vüvüh noh kütsanaveh,” ti küza.

¹⁰Thinü Sietsewa nüh hi rükie nü hi sie nü küzhiho kümüsietsah küsü vü wa. Jerusalem, Kümtse Nyuküjiwa thajüwu vünüh Saküüwuowa vünüh küturu vi hi kütsa.

¹¹Thi jümatü Saküüwuowa küthohla nüh wie. Nyuküjiwa tü aloh amekükhrawa kümüjie, aloh atso küpapa küsa ame kükhrawa kümüjie wierake, anyikünovüh kümüjie aloh küüzih kümüjie mütsehuothethe.

¹²Ma shieku aküji thi kümüshie, akheri türakünyi pie thi rügizhühleri türakünyi nüh akheri jüri huo. Akheriri vü Israelri akuoh türakünyiri anyo rhüke.

¹³Awuowuo vü akheri kücheche pie: küche zhieshu wuovü, thi küche zhieseh wuovü, küche zhietü wuovü, küche zhietuwuovü,.

¹⁴Nyuküjiwa zethuoh tü küloju loh türakünyi rügivü sa, jüma rügi vü Nyihzhüza povüküsa türakünyira nyo rhüke saveh.

¹⁵ Rügizhühle hi küjülewa tü nyuküjiwa, ma kheri, thi mashieku külojuke küüte kenüh suna nüh küsa küütevüh ma kevü pehveh.

¹⁶Nyuküjiwa tü ma küji nga thi küsuo nga zarike. Rügizhühlewa nüh ma zhi küütevühwa nüh nyuküjiwa küte: thinü ma küjinga, küsuo nga thi kümüsie nga kilomiter 2,400.

¹⁷Rügizhühlewa nüh ma shieku külojukewa nga küte, thinü jümatü miter rorake müsie, jüma tü küütevüh ma nüh vi küvehwaküüte kümüzhe wie.

¹⁸ Ashieku külojuwa tü aloh amekükhra atsoküzüwa nüh vi loju, nyuküjiwa thuoüji suna kümütsüh, anyikünovüh kümüjie kümüla nüh vi küsa.

¹⁹Anyuküjiwa shieku küloju lohri tü aloh amekükhrari nüh viküteh. Küloju loh apokhuwa thuoüji aloh kümüru nüh, künyiawa thuoüji aloh amekükhra akhremü nüh, kücheawa thuoüji aloh kükhratsahwa nüh, müzüawa thuoüji aloh atso akhremü thi kümüzhi küpe nüh,

²⁰müngaawa thuoüji aloh amekükhra kükhrüpuo, türoawa thuoüji ashünyi thi zanyo zihzih ta küsanüh, türüawa thuoüji suna küngura loh nüh, tüzeawa thuoüji aloh kümüzhi, tüguwa thuoüji aloh awazhi nüh, türakewa thuoüji aloh kümüji nüh, türaluokewa thuoüji akhremü kümüla nüh, türakünyiawa thuoüji aloh küüzih kümüru thi akhremü nüh.

²¹Akheri türakünyiri tü aloh amekükhra küüzihwa; akheri küsüsü vü aloh amekükhra küüzihwa küsüsü nüh sa. Nyuküjiwa lekhuji tü suna kümütsüh nüh sa thi anyikünovüh kümüjie künophiera.

²²Nyuküjiwa vü hi tü kükhurüzhe müngu, küpakenühnyunü jüla kükhurüzhe tü VÜWA Saküüwuowa Aveh kükhratsahwa thi Nyihzhüza wie.

²³ Nyuküjiwa wie na küsa kenüh rünyi küwie nyutü asah küwie müviketünga azhümünyie, küpakenühnyunü Saküüwuowa küthohla nüh ma vü wie veh, thi Nyihzhüza nüh ma latiwa.

²⁴ Azhihwa anyi külolekümüri tü ma küwie vünüh kütsuokükhrusanaveh, thi azhih vü aküjiri tü mari kümühie thi küsiakejüla viru naveh.

²⁵Nyuküjiwa kheriri tü rülo aveh vü mükhe nüh sa sanaveh, küpakenühnyunü jüla tü rüza mükünyie kenüh.

²⁶Akuori küji thi künyirhie tü nyuküji jüla viru naveh.

²⁷Thitü mükümtse küsü nga nyuküji jüla kütuwanyu, nyutü küzükrü küüro küsari thi kürie küphrahteri tü jü lovü mütura. Nyihzhüza kürho lasipha lovü anyo rhüküsari mpa nüh jü lovü tu naveh.