Read Pochuri Naga KÜTHSÜKÜTSÜ 3 Bible Online

KÜTHSÜKÜTSÜ 3 - Pochuri Naga bible

KÜTHSÜKÜTSÜ 3

¹Sardis vü rügizhühlewa Nazizheh vü rhütsüluo: zhühle hama tü sietse türü küpeh Saküüwuowa thi wutsi türü küpehwa nüh kütsü. Noh nüh mowa saveh nüh hi nüh thsüveh; noh tü sümüwiethuoh ketünga akürho küthohla pehküvehhi nüh thsüveh!

²Jükenüh müjie süjike teküwa vünüh no mowa pehveh ünüh süra nü sakükhraluo. Noh nüh mowa sanüh jümatü Saküüwuowa notha vü müjie küju hi nüh ngura.

³Jükenüh müsheluo, noh nüh mowa sosie thi mowa künara nüh; jüma müzhe nü noh kükhiemuo vünüh sühle teraluo. Noh nüh müsüra thuoüji hi nüh noh vü kürühuri kümüjie ru naveh, thi hi nüh mowa tsotho vü ru naveh nüh noh tü müthsüra.

⁴Thitü Sardis vü nohri pike mpa nüh thsümünyi mütse küvehwie. Nohri tü thsümünyi kümüji thse nü hi sie tse naveh, küpakenühnyunü nohri nüh jüma küsatse kenüh.

⁵Thari nüh khrara naveh nüh hakümjie thsümünyi kümüji vü naveh, thi kürho lasiphawa vünüh hi nüh mari anyo viküjawanyu. Eh Pa atüvü thi ma zhühleri atüvü mari tü eh zhi taküsa müküthi nüh phrahzhu naveh.

⁶Khüna pehküvehri thuoüji Sietsewa nüh mowa Nazizhehri vü küzaveh nüh künaluo!

⁷Filadelfia vü rügizhühlera kümühüzhe vü rhütsüluo: Zhühle hama tü kümtse thi küzhütsawa vünüh. David kükhetevühwa[3] ma nüh vi veh, thi ma nüh amükhiewa samüthuoüji nyi küsü nga nüh mükhetera le wiethuoh, thi ma nüh khetemüthuoüji nyi küsü nga nüh müsara le wiethuoh.

⁸Noh nüh mowa saveh nüh hi nüh thsüveh; noh kükhra pike pehveh taküsa hi nüh thsüveh; noh tü hi nüh küsosie müzhethuoh thi hivü zhütsanyitsathuoh. Nyi küsü nga nüh müküsara amükhieküsü hi nüh noh tüvü satsüthuoh.

⁹Künaluo! Tsuore azhi sanü kütseri refü Judahri nyutü Judahrita rie kütseri, hi mari saküüru taji no ji vü ru küükhotsünaveh. Hi nüh nokümüzeveh ta küsa mari aveh nüh thsüveh.

¹⁰Küpakenühnyunü noh nüh eh zhü vi nü küüzhikera kenüh azhihvü nyiri aveh müte nta azhih vü kütse kümnomna vünüh küülole nta noh nyuote naveh.

¹¹Hi tü shita tetsethuoh. Noh nüh viküvehwa kümühie ti küjehphoke luo, jütathuoüji noh nüh kükhrara vünüh küngura jisuo kajilüwewa nyi küsü nga nüh rühutemüwara.

¹²Kükhrarari thuoüji hi nüh ma vi eh Saküüwuowa kükhurüzhevü atovüh küüsanaveh, thi ma tü piketü jüma küjawanyuthuoh. Ma vü hi nüh eh Saküüwuowa nyo, thi Jerusalem kürüthe eh Saküüwuowa nyuküjiwa ma vü rhüke naveh, jüma tü eh Saküüwuowa nüh thajüwu vünüh ru naveh. Ma vü eh nyokürüthewa nga rhüke tü naveh.

¹³Khüna pehküvehri thuoüji Sietsewa nüh mowa küzaveh nüh künaluo!

¹⁴Laodikia vü rügizhühlewa Nazizheh vü rhütsüluo: Zhühle hama tü Amen ta küsa kütsotüra thi küzhütsapovüwa nüh kütsü, ma tü zanyo saküsa aveh rühtsowa.

¹⁵Noh nüh mowa saveh nüh hi nüh thsüveh; noh tü küüji nga müküji thi küzhe nga müzhe. Hi nüh eh kümüshe thuoüji notü hamasü küsü sa thuoüji mühie naveh!

¹⁶Thitü noh nüh küzhehza kenüh, müzhetsa thi müküjitsa tiküsa kenüh hi nüh eh po vünüh noh kürhozhuja naveh!

¹⁷Noh nüh küüza, “Hi tü nyirhiemü thi küzhilewa; hi nüh müvijimükümühie aveh pehveh,” ta küzaveh. Thitü noh tü küzakele nga loküzhe münyie thi khoveh nüh müthsü! Noh tü mükhuomü, rütsomü, thi küjumü.

¹⁸Jükenüh hi nüh noh vü küüza thuoüji, noh nyirhie na küsakenüh hi vünüh suna, suna kümütsüh küsa sü luo. Thi noküzükrü satsa kürütso noh mpa nüh küzhute na küsa kenüh thsümünyi kümüji nga sü luo. Thi noh ngu na küsa kenüh noh notha küüne notha nahzi nga sü luo.

¹⁹Hi nüh küümzeri aveh thuoüji hi nüh phra thi kümnomnatsü veh. Jükenüh noluoveh tsaza nü noh kükhiemuo vünüh khaphrüle luo.

²⁰Halie! hi nüh mükhie vü tsie nü kütüveh, nyi wuori nüh ehjikhi künaranü mükhie satsü thuoüji hi nüh ma zheh vü runü ma sie ashietsanaveh, thi ma nga hi sie ashietsanaveh.

²¹Kükhrarari thuoüji hi nüh khrara nü khinyi thuoüji eh Pa kütuo vü ma kajipe rügi vü pehküveh kümüjie eh kajipe rügivü eh kütuo vü küpehra satsü naveh.

²²“Khüna pehküvehri thuoüji sietsewa nüh Nazizhehri vü mowaküzaveh nüh künaluo,” ti küza.