Read Pochuri Naga KÜTHSÜKÜTSÜ 5 Bible Online

KÜTHSÜKÜTSÜ 5 - Pochuri Naga bible

KÜTHSÜKÜTSÜ 5

¹Kajipe rügi vü küpehwa ake azhie wuovü külulasiwa hi nüh ngu; rhü nü küsa akie nüh awuowuo küzhute thi küfete türü nüh feke saveh.

²Thinü hi nüh rügizhüle kükhra küsü ngu ünü ma nüh akhizie kürügi she taji, “Ma thuoüji fete küsawa küfekhuotsewathi külulasiwa küsatsewa,” ti küza.

³Thitü thajüwu vü nga nyutü azhih vü nga nyutü azhih kükhuvü nyi küsü nga külulasi jüma küsa thi ma lovü künoramüsara.

⁴Nyi küsü nga lasi jüma küsa nyutü alovü künokütse hi nüh müküngu kenüh hi tü khieloti krie.

⁵Thinü sierhü kükhruori küsü nüh hi vü, “Mükrietümü, halie! Judah kuo vü amiewuowa thi David küshuküra Küjiwa tü khra thuoh thi ma nüh fete küsa türüri zokhuora naveh thi lasiwa sara naveh,” ti küza.

⁶ Thinü asa rhoküveh müzü nüh thi sierhü kükhruori nüh Nyihzhüzawa tü mükieshe thi ma tü kajipe zhila vü tsiepehküveh ngu. Nyihzhüzawa tü fethekümü kümüjie, thi matü arütsü türü pe thi notha türü pe, jümari tü Saküüwuowa sietse türüri azhih aveh vü küüzeri.

⁷Nyihzhüzawa nüh wa taji kajipe rügi vü küpehwa ake azhiewuovü nüh külulasiwa vi.

⁸Ma nüh wa nü küvi vü asa rhoküveh müzüri thi sierhükükhruori mükeke nü müzüri tü Nyihzhüzawa atüvü künyiatsuo zeh tewa. Mari aveh nga mürüli hozake huke nü kükhuwa vi thi arheküüngu suna küfü küpro vi peh, jümaritü Saküüwuowa nyiri nüh kükhuo küsa.

⁹Mari nüh aza kürüthe küsa: Noh tü külulasi küvikütsewa thi ma nüh fete küsawa küsatsewa. Küpakenühnyunü noh tü zothemü, thi noh nüh sahthuoh küsü vünüh Saküüwuowa kenüh akuoh aveh, azhü küpapa küphra aveh, nyiri aveh, nyiri kürho aveh sümüthuoh.

¹⁰Noh nüh Saküüwuowa zhuhküüro nta kajipe levüri küüsamüthuoh, thi mari nüh azhih vü kaji naveh, ti reihi.

¹¹Thi hi nüh no le hü ünü rügizhühleri anyie türake ti küsa anyie türake thi anyienyie zake jikhi künara! Mari tü kajipewa, asa rhoküveh müzüri thi sierhü kükhruori mükieshenü tsiepeh,

¹²thi mari tü zie nü rihi taji: “Nyihzhüza fethekümüwa tü kükhra, künyirhie, aküthsü thi kümüzho, küsiake, küthohla, thi anyo kümühie vü tseveh,” ti sa.

¹³Thinü thajüwu vü samüwa aveh, azhih vü samüwa aveh, azhih kükhuvü nga, juhküji vü, azhih thi thajüwu azhie vü zanyoküthuoh pehküveh aveh vü samüwa pehküvehri aveh nüh aza rihitaji: “Kajipe rügivü pehküvehwa thi Nyihzhüzawa tü anyokümühie thi küsiake, küthohlathuohvü thi kükhra küsuokürho sehkhe, sehkhe küjuküsawa saluo,” ti rihi.

¹⁴Rhoküpeh asa müzüri nüh rüle taji, “Amen,” ti sa. Thi sierhü kükhruori nüh künyiatsuo khurü.