Read Pochuri Naga KÜTHSÜKÜTSÜ 6 Bible Online

KÜTHSÜKÜTSÜ 6 - Pochuri Naga bible

KÜTHSÜKÜTSÜ 6

¹Thinü küfete türü feke küsa pokhuwa Nyihzhüza nüh küfekhuorie hi nüh ngu, thinü rhoküveh asa müzü vü küsünüh azhü atsoküshi kümüjie zie taji, “Raluo,” ti küza.

² Hi nüh noh küze thinü arawuh kümüji küsü ngu. Rawu rügi vü kütsewa tü alawih vitse, thi kajilüwe vi ma tsü. Ma tü kükhrarari küsü nüh cha nta kütse kümüjie rawu rügivünüh kuowa.

³Jüsevü Nyihzhüzawa nüh küfeteküsa künyiawa zakhuorie ünü rhoküveh asa künyiawa nüh “Raluo,” ti küüza hi nüh künara.

⁴Rawu küpa kümüru küsü shuru. Nyiri tü küsü nüh küsü küüfetheluo naküsa kenüh ma vü kükhra tsümü. Ma vü anyuchu küji küsü tsü.

⁵Thinü Nyihzhüza nüh küfete kücheawa zokhuorie ünü rhoküveh asa kücheawa nüh “Raluo,” ti küüza hi nüh künara. Hi nüh noküze ünü rawu akünyi küsü ngu. Ma rügi vü küpehwa nüh ma ke vü zanyo küütovüh küsü vi tse.

⁶Thinü ajikhi kümüjie küsa rhoküveh asa müzüri azhie vünüh shuru nü küüza, “Rülo küsü ake vü ahiemütha küütoküsü, thi rülo küsü ake vü ahie küüto küche. Thitü Oliverhu thi rhelivi rhuri thuoüji müzorie tümü,” ti küza.

⁷Jüsevü Nyihzhüza nüh küfete müzüawa zokhuorie ünü rhoküveh asa müzüawa nüh “Raluo,” ti küüza hi nüh künara!

⁸Hi nüh noküze ünü rawu azüh mükütü kümüzhi ngu. Ma rügi vü kütsewa nyo tü Aküsü ti ji, thinü Nyihsuozü tü ma se vü tse. Mari vü tü arie sanü azhih küüsuo müzü sanü küsü vü kümükhuojih, küsaküna thi reza samüwa nüh küzothera kükhra tsü.

⁹Thinü küfete müngaawa Nyihzhüza nüh zokhuorie ünü kükhurüpe kükhu vü kürholi Saküüwuowa zhü küphrahtekenüh thi mari povü küsa vü küzhütsanyitsa kenüh zothekümüri hi nüh ngu.

¹⁰Mari tü zie kürügi she taji, “Kükhra VÜWA thuoüji mütse thi zhütsa! Noh tü küthake azhih vü nyiri ashihmüsanüh thi hiri küfetheri vü kümnomna mütsü nü peh nathuoh lo?” tiküzie.

¹¹Mari aveh vü thsümünyi kümüji tsü, thi mari kürü siepeküsari thi ma jienüri thuoüji mari üta müjie küfethe küjunü tsotho pike pehla üti mari vü küza.

¹²Jüsevü küfete türoawa Nyihzhüza nüh küzokhuorie hi nüh ngu. Thinü amükhrüküüzhüh kümüsütsatsa küsü ru, jütiküsavü arünyi tü nyi nü athsütuo künyi kümüjiesatewa, thi asah tü azüh kümüjie müruküchiechietewa.

¹³Thi wutsiri tü amürhü mürhüru nü ajichuo müküne ma rhurügi vünüh küzhühja kümü kümüjie tsuotsatekhehwa.

¹⁴ Thi rügi tü külulasi lükümü kümüjie münyie nüh satewa, thi küzhiho aveh thi azhih küshukeri aveh tü khaphrütewa.

¹⁵ Thi azhih vü kajiri, küjiri, thi arienyi küjiri, nyirhieri, kükhratsahri, anyi küpari aveh, sieperi thi mükünyuri tü küpie lovü thi küzhiho vü alopie vü küthi kheh.

¹⁶ Thinü mari tü küzhihori thi alokrüri vü, “Hiri vü tsuotsarunü kajipe rügi vü küpehwa vünüh thi Nyihzhüza rüküshuvünüh hiri küüthi luo.

¹⁷ Mari müküüzara arüküshu tü hala pehveh, thi thawa nüh jüma atüvü tsiera na lo?” ti sa.