Read Pochuri Naga KÜTHSÜKÜTSÜ 7 Bible Online

KÜTHSÜKÜTSÜ 7 - Pochuri Naga bible

KÜTHSÜKÜTSÜ 7

¹Hama sevü azhih vü thi juhküji vü nyutü athso küsü vü nga amürhü müküümürhüke nta rügizhühleri nüh amürhümüzüri shoteküveh hi nüh ngu.

²Thinü rügizhühle küpa küsü tü rhoküveh Saküüwuowa küfete vi nü zhieshu vünüh küru hi nüh ngu. Thi ma nüh zienü Saküüwuowa nüh kükhra tsü küsa rügizhühle müzüriazhih thi juhküji zoriemü üti ji.

³Rügizhühlewa nüh, “Hiri nüh Saküüwuowa sieperi atie vü athsoshi müjie küsakera küju nü azhih nga, juhküji nga, nyutü athsori nga samükümüsü tümü,” ti küza.

⁴Thi Saküüwuowa küfete nüh atshoshi küsake aveh küsajithuoüji 144,000, ta hi vü küza. Mari tü Israelri kuotürakünyi vünüh,

⁵Judah vünüh nyi anyie türakünyi, Reuben vünüh nyi anyie türakünyi, Gad vünüh nyi anyie türakünyi,

⁶Asher vünüh nyi anyie türakünyi, Naftali vünüh nyi anyie türakünyi, Manase vünüh nyi anyie türakünyi,

⁷Simon vünüh nyi anyie türakünyi, Levi vünüh nyi anyie türakünyi, Issachar vünüh nyi anyie türakünyi,

⁸Zebulun vünüh nyi anyie türakünyi, Josef vünüh nyi anyie türakünyi, Benjamin vünüh nyi anyie türakünyi.

⁹Hama sevü hi nüh noküze ünü anyi küsü nga müküchierhüra küsa anyi riekhuo küji küsü ngu! Mari tü nyiri kürho aveh vünüh, akuoh aveh vünüh, nyiri aveh vünüh, thi azhü küpapaküphra aveh vünüh thsümünyi kümüji vü thi mari ake vü küzhiluophi tsuona vi nü ru kajipe atüvü thi Nyihzhüza atüvü tsie.

¹⁰Mari nüh zie taji: “Küülole thuoüji kajipe rügi vü küpehwa vünüh thi Nyihzhüza vünüh ru veh,” ti küza.

¹¹Rügizhühleri aveh, sierhü kükhruori, thi rhoküveh asa müzüritü kajipe mükieshe nü tsie. Thi mari tü kajipe atüvükünyiatsuo nü Saküüwuowa khurü

¹²taji, “Amen! Küsiake, küthola, küthsü, kümünakütsü, anyokümühie. Kükhra thi kümüzhori tü küsuokürho sehkhesehkhe küju Saküüwuowa zhi Amen,” ti phrahte.

¹³Sierhü kükhruori azhie vü nyi küsü nüh hi vü, “Thsümünyi kümüji vü nü pehküvehri tü thari lo, thi mari tü khie vünüh ru lo?” ti hi vü küna.

¹⁴ “Küjiwa, hi nü müthsü nü tü noh nü thsüveh,” ti hi nüh rüle tsü. Ma nüh hi vü, “Anyi hamari tü müküüzara kümnomna vünüh külole taji ru. Mari thsümünyi tü Nyihzhüza azüh nüh phrükümüji sa veh.

¹⁵Jükenüh mari tü Saküüwuowa kajipe atüvü tsie nü ma kükhurüzhe vü rülo thi rüza ma kütsükünaveh. Kajipe rügivü küpehwa nüh mari azhie vü peh nü mari rükiete pehveh.

¹⁶Mari tü kürüma le nyuthuoh, nyutü ajuh küürie le nyuthuoh; jü mpa mükünyu arünyi nyutü aküsa küsüküsü nga nüh mari kütsowa nyu thuoh;

¹⁷Küpakenühnyunü Nyihzhüza kajipe zhila vü küpehwa nüh mari kühuowa sanaveh, thi mari rükie kürhokütsü juh juwi küshuvü siewa naveh. Thi Saküüwuowa nüh mari notha vünüh arüthsü aveh neküüwetü naveh,” ti küza.