Read Pochuri Naga KÜTHSÜKÜTSÜ 8 Bible Online

KÜTHSÜKÜTSÜ 8 - Pochuri Naga bible

KÜTHSÜKÜTSÜ 8

¹Nyihzhüza nüh küfete türüawa zokhuorie ünü thajüwu vü münühu küzhila kümüjie zohmti pehtewa.

²Thinü rügizhühle türüri tü Saküüwuowa atüvü tsieküvehhi nüh ngu, thi mari vü tütü türü tsü.

³ Rügizhühle küpa arheküüngu kütsoku suna nüh küsa küviriküsü ru nü kükhurüpe kütuovü tsie. Saküüwuowa nyiri nüh kükhuo küsavü thsephe na küsa kenüh thi kajipe atüvü suna nüh küsa kükhurüpe vü tsü na küsa kenüh arheküüngu hozakema vü tsü.

⁴Rheküüngu kütso nyikhu tü Saküüwuowa nyiri nüh kükhuoküsa masü rügizhühlewa ake vünüh Saküüwuowa atüvü tewa.

⁵ Thinü rügizhühlewa nüh arheküüngu kütsokuwa tü kükhurüpe vünüh anyih thseküpro nü azhih vü vehjaküze. Jütiküsavü kületsuo vünüh atsoküshikhi kümüjie thi mükütuo nüh ajirü küfe khi kümüjie atsoshi, atsorie sa, thi amükhrüküzhüh, ti sa.

⁶Jüsevü rügizhühle türüri atütü türü küviri tü khuluonti küche.

⁷Rügizhühle apowa tü ma tütü khu. Thinü arahzhi thi anyih azüh sanyie nü azhih vü küshoru. Jütiküsavü azhih küüsuoküche sanü küsü tsomü, thi jüvü küpeh athso aveh thi arekümüzhi aveh tsomü.

⁸Jüsevü rügizhühle künyiawa nga ma tütü khu. Thinü küzhiho kümüjie küsa anyih küju küsü juhküji lovü veja küze. Jütiküsavü juhküji küüsuo küche sanü küsü azühjetewa,

⁹thi ajuh lovü kütüri küüsuo küche sanü küsü sümü, thi ajuhie küüsuo küche sanü küsü zoriemü.

¹⁰ Thi jüsevü rügizhühle kücheawa tü ma tütü khu. Thinü wutsi aküji küsü anyih aküla kütso kümüjie ju nü rügivünüh arügu küüsuo küche sanü küüsuo küsü thi ajuhküshupe vü tsuotsaru.

¹¹ (Wutsiwa nyo thuoüji “Kükha”). Ajuh küüsuo küche sanü küsü khatewa, thi ajuh küzhu vünüh nyi hozake sümü, küpakenühnyunü ajuh tü khateküwa kenüh.

¹²Jütiküsa sevü rügizhühle müzüawa tü ma tütü khu. Thinü wa nü rünyi, asah thi wutsiri küüsuo küche sanü küsü vü ka. Jütiküsavü rünyi nga, asah nga thi wutsiri nga küüsuoküche sanü küsü aküwie ratewa; thi rülovü nga rüza vünga küüsuo küche sanü küsü aküwie ratewa.

¹³Thi hi nüh noküze ünü aluomü küjiwa tü rügi vünüh prünü zie taji, rügizhühle küpa küche nüh atütü khuthuoüji ma jikhi vünüh shuru thuoüji azhih vü rhoküpe anyiaveh tü küzakele nga küükrükükra sanaveh nüh, nohri amngukümsüri.