Read Pochuri Naga KÜTHSÜKÜTSÜ 9 Bible Online

KÜTHSÜKÜTSÜ 9 - Pochuri Naga bible

KÜTHSÜKÜTSÜ 9

¹Jüsevü rügizhühle müngaawa tü ma tütü khu. Thinü wutsi küsü tsuotsa azhih vü wa nü jüma nüh azhikrie küsheh küsaravüh tsümü.

² Wutsiwa nüh azhikrie küsheh sajamütsü, thinü amo tso nü nyikhu shuküru kümüjie khielo ta shuru; thinü nyikhu jüma nüh rünyi thi amürhü aveh saküzomü.

³ Jütiküsavü nyikhu vünüh shumathu kükhra zarike kümüjie küsa ashukrie azhih vü küze.

⁴ Mari tü aprari nyutü athsori nyutü are küpa küsü nga samümüsütümü nü anyi thari nüh mari atie vü Saküüwuowa thsoshikhuh küfeke thsoshi mükünyieri sakümnomna üti mari vü küza.

⁵Anyi hamari zothe na küsa kenüh ashukrie hamari tü mütsü thitü asah münga mari sakümnomna üti kütsü wie. Thi shumathu nüh mütoküüna kümüjie ashuhkrie hamari nüh saküümünomüna nga zarike wie.

⁶ Asah münga tsotho vü mari tü aküsü khuo naveh tü müngura; mari tü sü ngü naveh tü aküsüwa tü mari vünüh letsuotewanaveh.

⁷ Shuhkrieri tü arawuh arie vü wa nta küüche kümüjie; mari alü rügi vü suna kajilüwe kümüjie küsa vü, thi mari anyiatü nyiri anyia kümüjie.

⁸ Mari ashe tü nyimzari ashe kümüjie, thi mari aha tü amiewuowa aha kümüjie.

⁹ Mari tüso tü amürü nüh hiete kütse kümüjie, thi mari küsa küprü khi tü arawuh nüh rawugari shoh nü hozake arievü wa nakütse kümüjie.

¹⁰Mari tü anürü pe, thi shumathu kümüjie müto, thi mari nürü nüh akükhra peh nü asah münga nyiri sakümnomna.

¹¹Mari nyia vü kükaji küsü peh, thi jüma thuoüji azhikrie kühuote rügizhühlewa. Ma nyo Ebriri zhü vünüh thuoüji Abadon; Greek vünüh thuoüji Apollion (Mazhühnyo thuoüji, “Küzoriewa”).

¹²Kümnomna pokhuwa tü tewathuoh; hama sevü nga kümnomna künyi küruleh pehüveh.

¹³Jüsevü rügizhühle türoawa tü ma tütü khu. Thinü Saküüwuowa atüvü suna nüh küsa kükhurupe toke küveh jükehmüzü vünüh jikhi shuküru hi nüh künara.

¹⁴Jikhi jüma nüh rügizhühle türo vü, “Eufrates rügu küjiwavü rügizhühle müzü phehteküsari lejamü luo,” ti küza.

¹⁵Thinü rügizhühle müzüri tü lejamü; hama maviwa asah thi hama sah rühlowa thi hama rühlowa tsotho vü nyiri küüsuoküche sanü küsü küüzothe nti hamari tü saküveh wiethuoh.

¹⁶Arienyiri rawu rügi vü kütse küzake nüh hi vü küza: jümari tü million müza künyi.

¹⁷Hi nüh kümohtsa küsa vü rawu thi mari rügi vü kütseri hi nüh ngu: mari nüh amürü atüsokühiete vü kütseri tü anyih kümüjie müruküchiechie, aloh amekükhrawa kümüzhi kümüjie müzhiküthuohthuoh, thi zanyo arhekümüne kütsovüh awazhikümüjie wazhike. Rawu lüri tü amiewuowa alü kümüjie, thi mari apo vünüh anyih, anyikhu, thi zanyo arhekümüne kütsovüh shuru.

¹⁸Jütiküsavü nyiri küüsuo küche sanü küsü kümnomna jü küche: anyih, anyikhu thi aloh amekükhrawa kümüzhi kümüjie müzhiküthuohthuoh nü küsawa rawu po lovü nüh shuküruwa nüh zothamü.

¹⁹Küpakenühnyunü rawu kükhra tü mari apo lovü thi mari anürüvü küpeh kenüh. Mari anürü tü müre kümüjie alü pe, thi mari nüh jümari vü nyiri sakümnomna.

²⁰ Kümnomna hama nüh anyi müzothe nüh pehküveh küpari mari nüh mowa sanüh jümari vünüh khaphrüle temüwa. Mari tü mükütuo wiethuoh nüh zanyo müküngu, müküünara, nyutü alemükütsera sietse kümüsüri, nyutü suna nüh küsatsorheri, aloh amekükhrawa nüh küsa tsorheri, amürü asahwuowa nüh küsa tsorheri, aloh thi athso nüh küsa tsorheri khurüpehwie.

²¹Nyutü mari tü anyi küfethe vünüh, mari kütüma vünüh mari satsazüh küüphroküphrie vünüh nyutü kürühu vünüh mükhaphrü wiethuoh.