Read Pochuri Naga 1 SAMUEL 14 Bible Online

1 SAMUEL 14 - Pochuri Naga bible

1 SAMUEL 14

¹Rülo küsü Saul tsa Jonathan nüh ma senyusevi küvü vizawavü, “Ra, hisü Filistinra shiehku kühuo rienyiri tuwuovü wa ünüh,” ti ji. Thitü ma tü ma pa vünü müküza.

²Saul tü Gibeah alievü katohrhu kükhuvü, jüma tü Migron vü pehküveh vü anyiri ma siepehküvehri tü müza türo,

³thi Ahitub atsa Ahija, Ikhabod ajie, Finehas atsa, Eli atsa, Shilovü VÜWA navü kruzhu küvü. Thi anyiri nüh Jonathan tü tewathuohta küsa müthsü nüh sa.

⁴Alehtse kükari azhievü, Jonathan nüh Filistinra shiehku kühuo rienyiri vü wanta küphah navü, wuochuh wuovü alokrü küzhihotsu thi küpa wuovü nga lokrü ahotsu pehveh; küsüwa nyo thuoüji Bozez, thi küpawa nyo thuoüji Sene.

⁵Ahotsu küsüwa thuoüji Mikmash atüvü zhietü wuovü tokewaveh, thi küpawanü Geba atüvü zhieseh wuovü tokewaveh.

⁶Thi Jonathan nüh ma senyusevi vükütse vizawa vü, “Ra, hisü ahu mkütsi shiehku kühuo rienyiri hamari vü wa ünüh; VÜWA nüh hisü kenüh kürohtsü mhieveh ünüh; küpakenühnyunü VÜWA nüh anyi hozake wienga thi pike wienga külole na küsa tü zanyoküsü vü nga nüh kükhetewa nyu nü,” ti küza.

⁷Thinü ma senyusevi küvüwa nüh ma vü, “Noh müshe vü küpekeküveh aveh saluo; halie, hi tü noh sietse, tinü noh müshe tü ehmüshe wiethuoh,” ti küza.

⁸Jüti küsa vü Jonathan nüh, halie, hisü tü kari anyiri vü wa naveh, thi hisü mpa nüh hisü vi mari kütsanaveh.

⁹Mükütüküzü mari nüh hisü vü, “Hiri nüh nohsü vü müjieküru nü huola luo; ta thuoüji hisü tü hisü ape vü zota tsie naveh, thi hisü tü mari vü kükhruwa nyu.

¹⁰Thitü mükütüküzü mari nüh, Hiri vü raluo; ta thuoüji hisü tü khru naveh; küpakenühnyunü VÜWA nüh mari vi hisü akevü thsekümthuoh kenüh. Thi hama nüh hisü vü athsoshi sanaveh,” ti küza.

¹¹Jükenüh masü mpa masükhürü Filistinra shiehku kühuo rienyiri vü küngu; thinü Filistinri nüh, “Noluo, Ebriri tü mari mpa mari küüthipeküpie vünüh shutsethuoh,” ti küza.

¹²Thinü shiehku kühuo rienyiri thi anyiri tü Jonathan thi ma senyusevi küvüwavü zie ta ji, hiri vü shuhru luo, hiri nüh zanyoküsü nohsü vü kütsanaveh ünüh, ti küza. Thinü Jonathan nüh ma senyuseviküvüwa vü, “Eh sevü nüh shuhru luo; küpakenühnyunü VÜWA nüh mari vi Israelra ke vü thsemthuoh ünüh,” ti küza.

¹³Jüti küsa vü Jonathan tü rü vünü mürikhru, thi ma senyusevi küvüwa nüh ma sevü nüh müri khru. Thi mari tü Jonathan tüvü küluzehtewa, thi ma senyusevi küvüwa nüh ma sevü nüh mari fethem.

¹⁴Jonathan thi ma senyusevi küvüwa nüh kürehthe khu thuoüji anyi mükeke kümjie, azhuh zhuto küzhila shüvotsa mükhu nüh kükhahura rike azhievü nüh.

¹⁵Jüti küsa vü kürünape vü, azhuh vü thi nyiri aveh azavü ngothse tewa; arienyiri nga thi aküprüri nga amüngu kükhetewa; azhih nga küzhühtewa; jütisanü jüma tü ngothse shehtewa.

¹⁶Thinü Benjamin natonahuori Gibeah vü Saul rieh huori nüh noküzeünü; halie, ariehkhuowa tü ha wuovü thi tu wuovü ta luovehluo kheh.

¹⁷Jüti küsa vü Saul nüh ma se nyikütse nyiri vü, “Hiri vünüh thawatewathuoh ünüh kürüh noluo,” ti küza. Thi mari nüh küürühnovü, halie, Jonathan thi ma senyusevi küvüwa masü tü jüla münyie nüh samla.

¹⁸Thinü Saul nüh Ahija vü, “Saküüwuowa kütsathuozhü küthsekuhavü viru luo,” ti küza. Küpakenühnyunü Saküüwuowa kütsathuozhü küthseku tü Israel nyiri tsotho vü nyi teküwa kenüh.

¹⁹Thi Saul nüh navüwa vü siejühle küveh vü Filistinra kürünapevü kürüzarüpuowa tü küzhiküzhi sa wie; jüti küsa vü Saul nüh navüwa vü, “Noh ke vishelem luo,” ti küza.

²⁰Jüti küsa vü Saul thi ma senyikütse nyiri aveh sezhuh nü arie vüwa; thi halie, nyi küsüsü anyuchuwa tü ma mpa ma füwa sie saluotewa, jüti sanü hozake kürüza satewa.

²¹Ebriri jüma tüvü nüh Filistinri vü nyitekütseri thi mari vü nyi kürünape vü teküwari, mari wienga sühle Saul thi Jonathan vü nyipehküveh Israelri vü peh nti teru.

²²Jükümjie Efraim küzhiho anyu vü Israel nyiri küthiküveh aveh tü Filistinri tevehthuoh ta küünara vü mari nga arievü mari se nyiphohke tewa.

²³Jüti küsa vü VÜWA nüh jüma rülovü Israelri vizhutsü nü arie watü Bethaven kari küwa sa.

²⁴Jüma rülovü Israel nyiri tü münomna sheh; küpakenühnyunü Saul nüh anyiri vü küüshie sataji, “Hi nüh eh mükünongüri vü amüthoh müjie küvira nü münüleh müjie küju nü thawa nüh kütsaküzhu sanaveh ünüh müzü kümwa saluo,” ta phrahteküm kenüh. Jükenüh anyiri nyi küsü wie nga kütsaküzhu mümpo.

²⁵Thi anyiri aveh tü reza vü ru ünü azhih vü awejuh pehla.

²⁶Jüti küsa vü anyiri tü reza vü tu ünü, halie, awejuh tü rütsuopehla, thitü nyi küsü nga pa nü kümshe nga müsa; küpakenühnyunü anyiri tü küshie küsawa kükrü kenüh.

²⁷Thitü Jonathan thuoüji ma pa nüh küüshie vi nü anyiri vü azhühzho tsüküsa mükünara; jükenüh ma tü ma ke vü pehküveh ma kütsüh wa zhupo viwa awepha vü shü nü ma ke vikuo ma po lovü thse; thinü ma notha tü müza teru.

²⁸Jüti küsa vü nyi küsü nüh, “Noh pa nüh anyiri vü azhühzhoküüshie tsü nü, nosü thawa nüh ashietsanaveh ünüh kümzüwa saluo,” ta küza saveh ti küza. Thinü anyiri tü anoji tutewa.

²⁹Jüti küsa vü Jonathan nüh, “Eh pa nüh azhihwa saküsüromtüthuoh, noluo, eh notha tü küzakele nga müzamthuoh lo, küpakenühnyunü hi nüh awejuh hama pike kümpothuoh kenüh.

³⁰Nosü anyiri tü mari mükünongüra zhi küzhechiera mari nüh küngurari mari mükhe wie nüh kütsatüla küzakele nga mhie naveh ünüh; küpakenühnyunü khinyi thuoüji Filistinri azhievü rehthe kümri tü aküji nyu nü,” ti sa.

³¹Mari nüh Mikmash vünüh Aijalon küju Filistinri zothewa. Thi anyiri tü anoji tu sheh;

³²anyiri tü zanyo zhechieküsa nyiehvü wa nü anyihzhü, shüvotsa thi mieshüzah vi nü azhih vünüh rehthe khehm nü anyiri nüh jümari thi azüh nga ti tsam.

³³Jüti küsa vü mari nüh Saul vü, “Halie, anyiri tü azüh nga tsanü VÜWA vü khiemuo vehthuoh,” ti küza. Thinü ma nüh, “Nohri nüh zhukütsa müke samthuoh; aloh küji küsü hala hi vü küpri raluo,” ti küza.

³⁴Thi Saul nüh, “Nohri mpa anyiri aza vünüh vohrie tewa nü mari vü, nyi küsüküsü nga ma shüvotsa nyutü nyihzhü viru nü hala nüh fethe taji tsaluo; thi azüh tsanü VÜWA vü mükhiemuo tümü üti küza luo,” ti küza. Jükenüh anyiri küsüküsü nga papa shüvotsa viru nü jüma rüza vü jüla nüh rehthe.

³⁵Jüti küsa vü Saul tü kükhurüpe küsü sanü VÜWA tsü; ma nüh kükhurüpe sanü VÜWA kütsü jüma nüh apo.

³⁶Jüti sanü Saul nüh, “Hiri arüza vü Filistinra sevü tsuo nü rüne atholeh küju mari zorietsü ünüh raluo; mari nyi küsü wienga müküükhe tümluo,” ti küza. Jüti küüza vü mari nüh, “Noh vü mowa nü mhieveh ünüh saluo,” ti küza. Thitü navüwa nüh, “Hala nüh Saküüwuowa vü shehnyi wa ünüh raluo,” ti ji.

³⁷Thinü Saul nüh VÜWA vü, “Hi tü Filistinra sevü tsuo üti ülo? Noh tü mari vi Israelra ke vü thse naveh ülo?” ti kürü. Thitü ma nüh jüma rülovü ma rüle mütsü nüh sam.

³⁸Jükenüh Saul nüh, “Nohri anyiri sierhüri aveh havü ra nü mokümjie vünüh kükhiemuo hamatü nosü teruthuoh ünüh thsü thi no ti saluo.

³⁹Küpakenühnyunü Israel küülolewa VÜWA tü rhoküveh üta jüma tü eh tsa Jonathan vü pehwie ketünga ma tü sütsa wie naveh,” ti küza. Thitü anyiri aveh azavü nyi vehküsü wienga ma mürüle nüh sam.

⁴⁰Thinü ma nüh Israel aveh vü, “Nohri nüh wuochuhwuovü peh luo, hi thi eh tsa Jonathan hisü nüh küpa wuovü peh naveh ünüh,” ti küza. Jüti küüzavü anyiri nüh Saul vü, “Noh vü mowa nü mhieveh ünüh saluo,” ti küza.

⁴¹Jükenüh Saul nüh, O VÜWA Israel Saküüwuowa, mokenüh noh tü nosü noh siepewa rüle mütsü lo? Mükütüküzü nüh müküleh hamatü hi vü nyutü eh tsa Jonathan vü peh üji, O VÜWA, Israel Saküüwuowa küthsüra tsüluo; thitü mükütüküzü nüh müküleh hamatü noh nyi Israelri vü pehveh üji kümshira tsüluo; ti khuo. Thi Jonathan thi Saul thuoüji vitewa, thitü anyiri nü küthitewa.

⁴²Jüti küsa vü Saul nüh, “Aküzewa tü eh tsa Jonathan hisü azhievü jakenoluo,” ti küza. Thinü Jonathan nüh vitewa.

⁴³Jüti küsa vü Saul nüh Jonathan vü, “Noh nüh mowa sam nüh hi vü küza luo,” ti khuo. Thinü Jonathan nüh ma vü, “Hi nüh eh kevü pehküveh eh rühkütsüh awejuh zhupo vünüh awejuh pike müpomlie; hi hala pehveh, tinü hi nüh sü naveh,” ti rületsü.

⁴⁴Jüti küüzavü Saul nüh, “Saküüwuowa nüh jükümjie vünüh hi vü saluo thi jüma nyiehvü nga saluo; noh thuoüji sütsa wie nathuoh, Jonathan,” ti küza.

⁴⁵Jüti küsa vü anyiri nüh Saul vü, “Israel vü kükhrara küüroh küji küsa Jonathan hamatü süwie nathuoh ülo? Jüma vünüh küületsuom luo! VÜWA nüh rhoküveh üta ma lüsheh küsü nga azhihvü tsuotsa müküzera; küpakenühnyunü nosü küju Saküüwuowa sie nü küroh kütse kenüh,” ti küza. Jüti sanü Jonathan süna küsa vünüh anyiri nüh ma küloletsü.

⁴⁶Jüsevü Saul tü Filistinri zhetekhru; thi Filistinri tü mari mpa mari ape vü tewa.

⁴⁷Jüti sanü Saul nüh Israel nyiehvü kajikhuowa vike küvü vü ma tü ma mükünongüri aveh awuowuovü, Moab nga, Amon nga, Edom nga, Zoba kajiri vü nga thi Filistinri vü nga ti sie saluo kheh; ma nüh khiekhievü küprüke naveh ünüh mari vi kümsütsatsa vü thse.

⁴⁸Thi ma nüh luoveh jisheh nü Amalekri müwiethe khehm nü Israelri küzhechieri ake vünüh mari küloletsü.

⁴⁹Saul tsari tü: Jonathan, Ishvi thi Malkhishua; thi ma tsavüh künyianyo thuoüji küwuo khuwa nyo nü Merab thi kürünguowa nyo thuoüji Maikhal;

⁵⁰Saul vüvüh nyo nü Ahinoam, Ahimaz tsavühwa. Thi ma thopahiri sierhüwa nyo thuoüji Abner, Mer atsa, Saul püza;

⁵¹Kish tü Saul apa thi Mer tü Abner apa, Abiel atsa.

⁵²Saul tsotho aveh vü Filistinri sie arie kho shehke nü sasa ti, thi Saul nüh anyi kükhrari ngu nyutü luoveh küjiri ngu thuoüji ma nüh jümari tü vi nü ma nyiri sasati sa.