Read Pochuri Naga 1 SAMUEL 17 Bible Online

1 SAMUEL 17 - Pochuri Naga bible

1 SAMUEL 17

¹Jüsevü Filistinri tü arie kenüh sezhuh khe; mari tü Sokoti küsa Judah zhih vü sezhuh kheh nü Soko thi Efes-damim vü Azeka masü azhievü kürünape sanü peh.

²Thi Saul thi Israel nyiri tü sezhuh nü Ela anyuo vü kürünape sataji Filistinri siesaluo na küsa kenüh arie küche nü ripeh.

³Jüti sanü Filistinri nüh aküzhi wuochuhwuo küsü vü tsie thi Israelri nüh aküzhi wuochuhwuo küsü vü tsie ti sanü masü azhievü anyuo küsü peh.

⁴Jüti küsa vü Filistinra kürünape vünüh anyi küsaratsa Gatri ma nyo Goliath ti küsa küsü shuhru, ma kru kümsie apie türakünyi nü khaküsü.

⁵Ma tü ma lü rügi vü sahwuo thehku vü, ma tü mürükruzhukasazhe asahwuo nüh küsa ma küüzho küüto tünyieke nü türü vü.

⁶Ma rünyie künyi vü sahwuo kürietevüh vü, thi avi asahwuo nüh küsawuküjara küsü ma safü azhievü kha.

⁷Thi ma vihkuoh tü atakha kümjie, ma vitsawa mürü küüzho tü küütotürü; thi ma joh huo kükhawa tü ma tüvü tse.

⁸Ma nüh tsie nü Israelri küri aveh vü zieküze taji, “Nohri tü mokenüh arie sa nti shuhru tsieveh lo? Hi tü Filistinri thi nohri tü Saul sieperi nyu ülo? Nohri kenüh nyi küsü rüka nü ma tü hivü küüturu luo.

⁹Mükütüküzü ma nüh hi sie saluora thi hi zothera ti thuoüji hiri tü nohri sieperi sanaveh; thitü hi nüh ma siesaluo nü chara thi ma zothera thuoüji nohri nüh hiri siepe sanü hiri kütsü sanaveh,” ti küza.

¹⁰Jüti küüzavü Filistinri nüh, “Hi nüh nosü Israel küriri vü nyieveh; tinü hiri saluo na küsa kenüh hi vü nyi küsü tsüluo,” ti khuo.

¹¹Saul thi Israel aveh nüh Filistinri azhü hamari küünara vü mari tü luoveh zahtewa nü khielohti krütewa.

¹²Jüti küsa vü David tü Judah kuoh Bethlehem vü Efrari ma nyo Jesse ti küsawa tsa, ma tü atsa nyimpari tüze peh. Saul tsotho vü anyiwa tü khruo thi mahvi zhiküm sa.

¹³Jesse atsa nyimpa kükhruo küche thuoüji arievü Saul se nyiwa; thi ma tsa arie vü nyiküwa küchera nyo tü hamari: Elib, küwuokhuwa, thi ma sewa Abinadab, kücheawa nü Shama.

¹⁴David thuoüji ariehpewa; kükhruo küche nü Saul senyitewa,

¹⁵thitü David thuoüji Saul vünüh shelesheza Bethlehem vü wa nü mapa nyihzhü no.

¹⁶Rülo zürake, arüne thi münüleh kürüzhu Filistinri tü atüvü tsezhuru nü ma kütsiepe vü tsietsieti.

¹⁷Thi Jesse nüh ma tsa David vü, “Noh jieri kenüh atha küveh thi tieshu türake hama vi nü shiti kürünape vü noh jieri vü waluo;

¹⁸jümpa mükünyu tünüjuhjühre türake hamari viwa mari anyienyiehwa vü tsüluo. Noluo, noh jieri mokümjieveh ünüh, thi marivünüh küphrahzhu viru luo,” ti küza.

¹⁹Jüti küsa vü Saul, mari thi Israel nyiri aveh tü Ela anyuo vü pehnü Filistinri siesaluo pehveh.

²⁰Thi David tü rüne kümto sühra nü anyihnyihri tü akühuori küsü vü sam nü Jesse nüh azhükütsü üta ashie vü nü tewa; ma tü shiejiwa nüh zie nü arie khi sanü kuotsezhuteküwa kürünape vü wa.

²¹Jüti sanü Israelri thi Filistinri tü arie küsa kenüh shenyiluowa nü thopahiri küsü nüh thopahiri küsü sie saluo.

²²Thi David tü chükhu künote ashuwa vü azanyori sam nü arie küsarivü wa nü ma jieri aleh no peh.

²³Ma nüh mari sieküjüle vü halie, anyi küsarawa, Gatwa Filistin ma nyo Goliath tü Filistinri arie küsari azavü nüh tsezhuru nü atükhuvü azhü üta phra. Thinü David nüh künara.

²⁴Israel nyiri aveh anyiwa ngu ünü khielohti krü nü ma vünüh te.

²⁵Thi Israel nyiri nüh, “Nohri tü anyi küshuhruwa ngu ünü nyu lo? Ma tü Israelri nyie nta tsewiethuoh; thi anyi ma küfetherawa tü kajiwa nüh künyirhieri vi ma sakünyirhie tsü nü ma tsavühwa vima tsü nü Israel vü ma pa zheh tü rüzih nü rho naveh,” tisa.

²⁶Jüti küsa vü David nüh anyi ma kütuoh vü tsieküvehwa vü, “Filistin hama küfethe anyiwa kenüh mowa sanü Israelri vünüh saküüzükrüwa vija na lo? küpakenühnyunü ahu mkütsi Filistin hama nüh rhoküveh Saküüwuowa thopahiri nyie nti ülo?” ti küza.

²⁷Jüti küüza vü anyiri tü jükümjie vünüh ma rületsü taji, “Thawa nüh ma fethe naveh ünüh anyi jümawa vü jüti vünüh saluo,” ti küza.

²⁸Thinü ma jie Eliab tü ma nüh anyiri vü küzaküveh künara nü David vü ma rü küshuwa tü juzhutewa taji ma nüh, “Noh tü mokenüh turu lo ti? Thi noh tü thawa vü nyihzhü pike jümari reza vü sam nü tse Lo? Hi nüh noh kükuoti thi noh luoveh kümsüthsüveh; küpakenühnyunü noh tü arie küsa no nta turu nü,” ti küza.

²⁹Jüti küüzavü David nüh, “Hi nüh khinyi mowa samthuoh lo?” tisa.

³⁰Jüti sanü ma tü ma vünüh kürele küpavü tewa nü jü üti vünüh küza le thi anyiri tü atükhuvü kümjie rülehü.

³¹David nüh azhü küüzawa tü künatewa kheh nü mari nüh jümari Saul tüvü küza le; thi ma nüh ma kenüh anyi küze.

³²Jüti küsa vü David nüh Saul vü, “Ma kenüh nyi küsü nga luovehküthasü müsa tüm; noh siepewa nüh wa nü Filistin hama siesaluo naveh ünüh,” ti küza.

³³Thinü Saul nüh David vü, “Noh tü wa nü Filistin hama sieküsaluo müsara; küpakenühnyunü noh tü ah thuoh, thitü viza küvehkenüh, thi ma thuoüji ma küviza vünüh arie küsa nyi küsüsatekütsethuoh kenüh,” ti küza.

³⁴Thitü David nüh Saul vü, “Noh siepewa tü ma pa nyihzhühuohuoti; thi jüta küsa vü amiewuowa nyutü awie ru nü anyihnyihza vünüh nyihzhüzah vitewa thuoüji,

³⁵hi nüh ma se zhewa nü ma po vünüh küloletsütsüti; thi mükütüküzü ma nüh sühra nü hi vü joke thuoüji hi nüh makhane vünüh shoh nü fe taji zothetheti.

³⁶Noh siepewa tü amiewuori nga thi awieri nga zothethuoh; jümari üta ahu mkütsi Filistin hama nga ma nüh rhoküveh Saküüwuowa thopahiri künyie küngu kenüh satsü naveh,” ti küza.

³⁷David nüh shele, “Amiewuowa müzeh thi awie müzeh vünüh hi küvizhu VÜWA nüh Filistin hamawa ke vünüh hi vizhuwie naveh,” ti küza. Jüti küüzavü Saul nüh David vü, “Waluo, thi VÜWA nüh noh siekütsewa saluo,” ti küza.

³⁸Jüti sanü Saul nüh ma rietsokrüri David vike küüvü; ma nüh sahwuothehku vi ma lüwe satsü, thi mürükruzhu küsazhe thsetsü.

³⁹Thi David nüh ma nyuchuwa vi ma rietsokrü lovü thse nü wa nti satü müsara nüh sam, küpakenühnyunü ma tü jümari müküviphiekenüh. Jükenüh David nüh Saul vü, “Hi tü hamari vü nü müwara; küpakenühnyunü hi tü hamari müküviphie kenüh,” ti küza. Jüti sanü David nüh jümari fosam.

⁴⁰Thi ma nüh ma rühkütsüh ma ke vü vi nü akuzawa vünüh alohküüzhu münga rüka nü khuhvi taji ma nyihzhü kühuo chükhunyutü zetsechükhu lovü thse; ma thumkavüh nü ma ke vü vi ti sanü Filistinwa vü shehnyiwa.

⁴¹Thi Filistinwa tü ma joh huo küviwa sie nü David tüvü tseshehnyiru.

⁴²Jüti küsa vü Filistinwa tü noküze nü David küngu vü ma noküzahke; küpakenühnyunü ma tü ah thuoh thitü vizari küsü, mürumwuo thi atsonyie tü züküm kenüh.

⁴³Thinü Filistinwa nüh David vü, “Hi tü ashuh nü noh tü akütsüh vi nü hi vü tse ülo?” ti küza. Thi Filistinwa nüh ma nyiaza nyo vünüh David müzü.

⁴⁴Filistinwa nüh David vü, “Hi vü raluo, hi nüh noh sa vi nü amürhü vü prükütse müwari thi azhuh vü asari vü tsü naveh ünüh,” ti küza.

⁴⁵Jüti küüzavü David nüh Filistinwa vü, “Noh tü anyuchuwa, avi thi aviphrü vi nü hi vü tse; thitü tu nü noh nüh kükhratsari VÜWA, Israelri thopahiri Saküüwuowa nyo vünüh noh vü tseveh.

⁴⁶Nosü VÜWA nüh noh vi nü eh kevü thsemnathuoh, thi hi nüh noh vehküzehm nü noh lü zahthuom nathuoh; thi Israel vü Saküüwuowa pehveh ta küsa azhih aveh nüh küthsü na küsa kenüh Filistinri shiejiwa küsü kümori nosü vi nü amürhü vü prükütse amüwari thi asari vü tsüm naveh,

⁴⁷thi jüta küsa vünüh VÜWA tü anyuchuwa thi avi vünüh ma nyiri külole müsa ta kümhu aveh tü thsü naveh; küpakenühnyunü ariewa tü VÜWA zhi thi nohri vi nü hiri ke vü thse naküveh kenüh,” ti küza.

⁴⁸Jüti küsa vü Filistinwa nüh sühra nü David mütu nti shehnyiwa ünü David tü Filistinwa mütu nti ariepe vü kukuti zhüwa.

⁴⁹Thi David nüh ma ke chükhu lovü küzheküze nü aloh küsü vizhutaji ma thumkavüh ka küze nü Filistinwa tie vekhuoja nü alohwa tü ma tie lovü tetu, thi ma tü azhih vü shoa tewa.

⁵⁰Jüti sanü David nüh thumkavüh küsü thi aloh küsü nüh Filistinwa kaküzeh nü ma zothe taji chara; senyusevi küsü nga David kevü müvi.

⁵¹Thi David tü zhüwa nü Filistinwa rügi vü tsie taji ma suochi vünüh ma nyuchuwa shozhu nü ma lü thuomtü taji zothem. Filistinri nüh mari anyi küsarawa süküm künguvü mari tü zhütewa.

⁵²Thi Israel thi Judah nyiri tü sühra nü zie taji Filistinri zhe Gat thi Ekron kheriri küju wa, jüti sanü Filistinri kümsamnaritü lehkhujikhuji tsuotsa Sharaim vünüh Gat thi Ekron küjuwa.

⁵³Jüti sanü Israelri tü Filistinri zhe küwa vünüh sheleteru nü mari kürünape phrüvitewa.

⁵⁴Thi David nüh Filistinwa lü thuo nü Jerusalem vü viteru, thitü ma rietsokrüri thuoüji ma juhthsüzheh lovü samtü.

⁵⁵David nüh Filistinwa siesaluo nta kuoküwa Saul nüh künguvü ma nüh thopahiri sierhüwa Abner vü, “Abner, viza hamatü thawa tsa lo?” ti küna. Thinü Abner nüh, “Noh kürholi rhoküveh üta, O kajiwa, hi tü müküzara,” ti rületsü.

⁵⁶Kajiwa nüh, “Vizawa tü tha tsawa nüh küna nyinü,” ti küza.

⁵⁷Thi David nüh Filistinwa küfethe vünüh sheleteküru vü ma ke vünüh Filistinwa lü soh nü ma sie Saul tüvü ru.

⁵⁸Thinü Saul nüh ma vü, “Noh tü tha tsawa lo, vizawa?” ti küna. Jüti küüna vü David nüh, “Hi tü noh siepewa Jesse Bethlehem wa tsa lie,” ti rületsü.