Read Pochuri Naga 1 SAMUEL 19 Bible Online

1 SAMUEL 19 - Pochuri Naga bible

1 SAMUEL 19

¹Thi jüti sakümvü Saul nüh ma tsa Jonathan thi ma sieperi aveh vü küza taji David fethem üti sa. Thitü Saul tsa Jonathan tü khieloti David nolo.

²Jüti küsa vü Jonathan nüh David vü, “Eh pa Saul nüh noh zothe nta phahveh; jükenüh rüne vü noh mpa nüh azhüzhüluo, noh mpa nüh küüthira azhievü küthi peh luo;

³thi hi nüh alievü wa nü noh kütupe azhievü eh pa nato vü tsietaji eh pa vü noh zhü phrahte naveh; thi hi nüh mowa thsüra naveh ünüh noh vü küza naveh ünüh,” ti küza.

⁴Thi Jonathan nüh ma pa Saul vü David phra kümhietsü nü ma vü, “Kajiwa tü ma siepe David vü mükhiemuo tümluo; küpakenühnyunü ma tü noh vü kükhiemuo sam küsa kenüh, thi ma küürohri tü noh kenüh küüroh kümhie saküsa kenüh;

⁵küpakenühnyunü ma nüh Filistinwa küzothe vü ma kürhowa tü ma ke vü vi saveh, thi VÜWA nüh Israel aveh kenüh kükhrara küürohküji küsü viru. Noh nüh jüma ngu nü lozhethuoh; thinü mokenüh nohtü zanyoküsü nga samküsa David zothe nü kümsü samküsa züh sie saluo nü khiemuo nti saveh lo?” ti küza.

⁶Jüti küüzavü Saul tü Jonathan jikhi küna nü küshie taji, “VÜWA nüh rhoküveh üta ma tü küüsüwa nyuthuo,” ti küza.

⁷Thinü Jonathan nüh David ji nü Jonathan nüh zanyo hamari mavü kütsa kheh. Jüti küsa vü Jonathan nüh David sie Saul vü runü atükhuvü üta ma tüvü peh le.

⁸Jüsevü arie satewa le nü David tü alievü wa taji Filistinri siesaluo nü mari azhievü khieloti rehthem, jükenüh mari tü matüvü nüh tetewa.

⁹Thinü Saul tü ma zheh lovü ma kevü avi vi nü pehveh ünüVÜWA vünüh kümsü sietse ma vü turu; jüma tsotho vü David tütopito khu pehveh.

¹⁰Jüti küsa vü Saul tü ma vi vinü azie vü David müzhukem nti phah taji azie vü ma vi wujake; thitü ma nüh Saul karira nü ma nüh aviwa tü azie vü müzephohkem. Thi David tü zhütewa nü mürietewa.

¹¹Jüma rüza vü Saul nüh David küno nti azhühvüri ma zheh vü küze, jüti sanü arüne vü ma zothera naküveh kenüh. Thitü David vüvüh Maikhal nüh ma vü, “Mükütüküzü noh nüh sütavü noh kürho mükülole thuoüji noh tü thuohtü fethem nathuoh nü,” ti küza.

¹²Jükenüh Maikhal nüh mürhülehpie vünüh David rühshe küzenü zhü tewa taji mürie küzem.

¹³Jüti sanü Maikhal nüh anyiri atso küsa küsü vi aze rügi vü sanü ma lü vü nyihsü küneh vi alüche satsü taji athsü nüh hietemtü.

¹⁴Jüti küsa vü David sie üti Saul nüh zhühleri küze ünü nyimzawa nüh, “Ma nü naveh lie,” ti küza.

¹⁵Thinü Saul nüh David no üti azhühvüri küze taji, “Hi nüh ma zothe naküsa kenüh aze vünüh ma sie hi vü shuru luo,” ti küza.

¹⁶Azhühvüri azheh lovü tu ünü, halie, atso küsü ma lü vü nyihsüküneh nü alüche sanü aze vü pehla.

¹⁷Saul nüh Maikhal vü, “Noh tü mokenüh hakümjie hi müramizhitaji hi mükünongüwa küzem nü ma tü küümriem lo?” ti küza. Maikhal nüh Saul vü, “Ma nüh hi vü, ‘Hi küzemluo; mokenüh hitü noh fethe nalo?’ ta küza lie,” ti küza.

¹⁸David tü zhü tewa nü mürie taji Rama vü Samuel vü teru nü Saul nüh ma vü küsari aveh vi ma vü küza. Thi Samuel masü tü tewa taji Naiot vü pehtewa.

¹⁹Thinü jüma tü Saul vü küza nü, “Halie, David nü Rama azhie Naiot vü pehveh,” ti küza.

²⁰Jüti küüza vü Saul nüh David vü azhühvüri küze; jüti küsa vü mari nüh setsaküthsüri refüwa setsaküthsüzhü phraküveh künguvü, thi Samuel nüh mari nyiehvü alü sanü tsieküveh vü, Saküüwuowa sietse tü Saul azhühvüri vü ru nü mari nga setsaküthsüzhü küphra.

²¹Hama viwa nü Saul vü küza ünü ma nüh azhühvüri küpa küze le, thinü mari nga setsaküthsüzhü phrahte tewa le. Jüti küsa vü Saul nüh kücheawa azhühvüri küze lehü, thitü mari nga setsaküthsüzhü phrahte tewa lehü.

²²Jüsevü thuoüji ma tü ma mpa nüh Rama vü ru, thi ma tü Seku vü küpeh juhkhre küjiwa vü ru taji, “Samuel thi David tü khielapehveh lo?” ti küna. Thinü nyi küsü nüh, “Halie, masü tü Rama azhie Naiot ta küsa vü pehveh,” ti rületsü.

²³Jüti rülekütsü vü ma tü jüla nüh Rama azhie Naiot ti küsawavü wa; thinü Saküüwuowa sietse tü ma vü nga ru nü ma kuoküwavü ma tü azhie Rama Naiot vü müjie ru küju nü ma nga setsaküthsüzhü phrahte.

²⁴ Thi ma nga ma thsümnyi fom nü Samuel tüvü ma nga setsaküthsüzhü phrahte nü jüma rülo ajü thi jüma rüza ajü anyiju küprizeh. Jükenüh küüza, “Saul nga setsaküthsüri azavü pehveh ülo?” ta küza saveh.