Read Pochuri Naga 1 SAMUEL 20 Bible Online

1 SAMUEL 20 - Pochuri Naga bible

1 SAMUEL 20

¹Jüsevü David tü Rama vü Naiot ti küsa vü nüh azhü Jonathan tüvü küza taji, “Hi nüh mowa sam lo? Hi müküleh mowa lo? Thi noh pa tüvü eh kükhiemuo tü mowa nü ma tü eh kürholi phahvehlo?” ti sa.

²Thinü ma nüh ma vü, “Jüma tü jüüta küsawa nyu! Noh tü küsüwa nyu. Halie, eh pa tü hi vü müküthsü nüh zanyo küji nga thi küzah nga müsa; tinü eh pa tü mokenüh hi vünüh hama küthimna lo? Jümatü jüta nyu,” ti rületsü.

³Thitü David nüh, “Noh notha vü hi tü kütso pehveh ta küsa noh pa nüh thsü mhieveh; thi ma tü, ‘Jonathan luoveh thama saküümsü kenüh hama ma müküthsü tümluo,’ ta müsheveh. ThitüVÜWA thi noh kürholiwa rho tsa küveh nü hi thi aküsü azhievü lekha küsü pehveh,” ti rületsü.

⁴Jüti küsa vü Jonathan nüh David vü, “Noh nüh momowa küzavehünüh hi nüh noh kenüh sa wie naveh,” ti rületsü.

⁵ Thinü David nüh Jonathan vü, “Halie, thuotü tü asathethuoh, thi hi tü kajiwa sie nü shiekütsape vü müpeh üji mümhie; thitü rülo kücheawa münüleh küju hi mpa nüh ato vü küthi na küsakenüh hi raküzem luo.

⁶Mükütüküzü noh pa tü hi mütora nüh sam wie thuoüji, ‘David tü ma nyuji Bethlehem vü zhüwa nta hi vü khri nü tewathuoh; küpakenühnyunü tharuo aveh kenüh mahvi kürühzhu küsahthuo pehveh,’ ti küza luo;

⁷mükütüküzü ma nüh, ‘Mhie veh,’ ta küza thuoüji noh siepewa kenüh moküsamathuoh; thitü ma nüh arüshum thuoüji ma nüh kümsüwa kütekemthuoh ta küsa thsüluo.

⁸Jükenüh noh siepewa vü kümhie siesaluo, küpakenühnyunü noh nüh noh siepewa tü kümtse kütsathuowa vü sieru saküvehthuoh kenüh. Thitü mükütüküzü nüh hi vü müküleh pehveh üji hi rehthemluo; küpakenühnyunü noh tü mokenüh hi sie nü noh pa vü wanalo?” ti küza.

⁹Jüti küüzavü Jonathan nüh, “Jümatü noh vünüh letsuom luo! Mükütüküzü kümsüwa noh vü küüru nta eh pa nüh kütekeveh üji hi nüh noh vü müküzatüm naveh ülo?” ti rületsü.

¹⁰Jüti küsa vü David nüh Jonathan vü, “Mükütüküzü noh pa nüh azhümzhü nüh noh rüle thuoüji thawa nüh hi vü küza na lo?” ti küna le.

¹¹Thinü Jonathan nüh David vü, “Ra, ato vü tsezhuwa ünüh,” ti ji. Jüti sanü masü tü ato vü tsezhuwa.

¹²Jonathan nüh David vü, “VÜWA Israel Saküüwuowa nüh apohvüwa saluo! Thuotü hama tsotho vü nyutü jütü vü hi nüh eh pa künathuoüji, halie, mükütüküzü ma nüh David vü kümhie ta saküzem thuoüji hi nüh noh vü küpie müküze tüm naveh ülo?

¹³Thitü jüma tü noh sakümsü na küsa eh pa saküülozhe leh, VÜWAnüh Jonathan vü jüti küsawa saluo, thi jüma nyiehvü nga küsawasaluo, mükütüküzü hi nüh jüma vi noh vü müküpie nüh samnü noh küzem thuoüji noh tü kümhieti vünüh waluo. VÜWA nüh eh pa sieküru üta noh siekütsewa saluo.

¹⁴Hi müsü nüh sana küsa kenüh mükütüküzü hi tü rholawie üjiVÜWA künyitsasheh küümzewa vi hi kütsaluo;

¹⁵thi noh künyitsashehwa küsuokürho eh zheh vünüh vitemwa tümluo. VÜWA nüh azhih vünüh David mükünongüri küsüküsü nga vijamwie ketünga,

¹⁶Jonathan nyo thuoüji David tharuo vünüh vimküja tümluo. ThiVÜWA nüh David mükünongüri vü amüthoh küsawa saluo,” ti küza.

¹⁷Thi Jonathan nüh David küümze kenüh ma nüh ma küüshie le; küpakenühnyunü ma tü ma mpa ma küümze üta ma küümze kenüh.

¹⁸Jüsevü Jonathan nüh ma vü, thuohtü tü asathe thuohnü noh tükha samnathuoh, küpakenühnyunü noh pe tü rütsom na küvehthuohkenüh.

¹⁹Thi rülo kücheawa noh tü khaseshem nathuoh; tinü zanyo saküvehvü wa taji noh nüh küüthi azhievü aloh kümprohke (Ezel loh) kükiehtuozah vü pehla luo.

²⁰Hi nüh zanyo kümjü sanü lashüchu küche jüma nahto vü kaküze naveh ünüh.

²¹Thi halie, hi nüh vizawa küze taji, ‘Wa nü lashüchuri phahru luo,’ ta küza naveh ünüh. Mükütüküzü hi nüh vizawa vü, “Noluo, ashüchuri tü noh nato vü pehveh, jümari vi luo, ta küza thuoüji noh tü ru luo, küpakenühnyunü VÜWA nüh rhoküveh kenüh müsürothuoh thi kükrü mükünyiethuoh kenüh.

²²Thitü hi nüh vizawa vü, ‘Noluo, ashüchuri tü noh karitewathuoh ünüh,’ ta thuoüji waluo; küpakenühnyunü VÜWA nüh noh küze kümthuohkenüh.

²³Thi akero hisü nüh phrahte küsawa thuoüji, halie, VÜWA nüh hisü azhievü küsuokürho pehveh ünüh,” ti küza.

²⁴Jükenüh David tü ma mpa atovü küthi peh; thi asathewa ru ünü kajiwa tü ashie tsa nti tsuo shupeh.

²⁵Küpa tsothovü üta kajiwa tü azie kütuoh vü ma pe rügivü shupeh; Jonathan nüh ma wiejie nü peh thi Abner nüh Saul nato vüpeh, thitü David ape thuoüji rütsom.

²⁶Jüta wie ketünga jüma rülovü Saul tü zanyo küsü nga müphrahte wie; küpakenühnyunü ma nüh, “Zanyoküsü ma vü terumthuoh; ma tü mümtse, ma tü mümtse wiethuoh,” ta kümshekenüh.

²⁷Thitü rülo akünyiawa asathewa sevü David pewa tü rütsom. Jükenüh Saul nüh ma tsa Jonathan vü, “Mokenüh Jesse atsa tü luonyi nga nyutü nosü nga ru ashie mütsa lo?” ti küna.

²⁸Jonathan nüh Saul rüle taji, David tü Bethlehem vü wa nta hi vükhri nü khuo lie;

²⁹ma nüh, “Hi küzem luo; küpakenühnyunü hiri tharuo tü anyujiwavü küsahthuo küsü sana saküveh kenüh; thi eh jie nüh hi tü jüla pehla üta azhütsü naveh. Jükenüh khinyi hi tü noh notha küütso nguveh üji hi tü küzem nü eh jieri küünom luo, ta küza lie. Hama zhühnyo kenüh ma tü kajiwa shiekütsape vü müru nüh sam lie,” ti küza.

³⁰Thinü Saul rüküshu tü Jonathan vü juzhu ru nü ma vü, “Noh atsa künaphenawewa, nyimza küruoluowa noh mpa noh küzükrü thi noh zah nyiju küzükrü kenüh Jesse atsa rüka küsa hi nüh müthsü ülo?

³¹küpakenühnyunü azhih vü Jesse atsa kürho küju nü noh nga nyutü noh kajipe nga müvishura. Jükenüh anyi küze nü hi vü ma sieruluo, küpakenühnyunü ma tü sütsa wie naküvehthuoh kenüh,” ti küza.

³²Jüti küüzavü Jonathan nüh ma pa Saul vü, mokenüh ma tü küüsü na lo? Mowa ma nüh sam lo? ti rüle.

³³Thitü Saul nüh ma shünti ma vi ma vü wujake; Jükenüh ma pa tü David zothe na küsa kütekemthuoh ta küsa Jonathan nüh thsütera.

³⁴Thi Jonathan tü küzülanga arümshu nüh sanü ashiekütsape vünüh sühra taji rülo künyiawa ashie küsü nga mütsa, küpakenühnyunü ma pa nüh ma saküzükrüküm kenüh ma tü David kenüh amüshesü.

³⁵Arüne vü Jonathan tü David sie küteke küsawa kenüh viza küzahküsü sie nü ato vü wa.

³⁶Thi ma nüh ma sie kütse vizawa vü, “Wa nü hi nüh ashüchu kaküüzeri phah luo,” ti küza. Jütisanü vizawa kuozhüküwa vü ma nüh shüchu küsü ma vünüh kületsuovü kaküze.

³⁷Thinü vizawa tü Jonathan nüh ashüchu kaküze pe vü ru ünü Jonathan nüh vizawa ji shele taji, “Ashüchuwa tü tuwuovü pehmveh ülo?” ti küna.

³⁸Thi Jonathan nüh ma ji le nü, “Müküzhike tüm, shita, müpehtüm,” ti küza. Jükenüh Jonathan vizawa tü ashüchuri khuhzhunü ma vüwa vü teru.

³⁹Thitü vizawa tü zanyo küsü nga müthsü, Jonathan thi David masü mpa nüh akerowa küthsü wie.

⁴⁰Thi Jonathan nüh ma rietsokrüri vi ma vizawa tsüm taji ma vü, “Hamari vü nü anyujiwa vü tewaluo,” ti küza.

⁴¹Jüti küüza vü vizawa ketewa David tü aloh kümprohke nato vünüh sühra nü ma nyieh vü nü azhih vü kükiewa taji küchekeri küngiewanü David nüh müjie küüzhira küju nü masü küsü nüh küsüküme taji küsü nüh küsü vü krie.

⁴²Jüti küsa vü Jonathan nüh David vü, “Luoveh rüzih nü waluo, hisü khürü VÜWA nyo vünüh küzakele küshie taji, ‘VÜWA nüh hisü azhievü, eh küthsoküzhi thi noh küthsoküzhi azhievü küsuokürho peh naveh,’ ta saküsa kümjie sanaveh ünüh,” ti sa. Jüti sanü ma tü sühra nü tewa; thi Jonathan tü anyujiwa vü tewa.