Read Pochuri Naga 1 SAMUEL 21 Bible Online

1 SAMUEL 21 - Pochuri Naga bible

1 SAMUEL 21

¹Jüsevü David tü Nob vü navüwa Ahimelek vü ru; thi Ahimelek tü khekhe ti küshüh nü David mütu nti ru taji ma vü, “Mokenüh noh mpa lo, mokenüh nyi küsü nga noh siemtse lo?” ti küna.

²Jüti küsa vü David nüh Navüwa Ahimelek vü, “Kajiwa nüh zhühnyo küsü vi hi tsü nü azhühzho tsü küsa, ‘Hi nüh noh küüze zhühnyowa thi hi nüh noh vü azhühzho kütsü zhühnyowa nga ti nyi küsü vü nga müküthsü tümluo,’ ta küza. Hi nüh vizari siejükümjie küsa kenüh nga thi azhie küsü kenüh nga ti küütekeküsü samthuoh.

³Khinyi thuoüji jükenüh noh ke vü mowa pehveh lo? amüsa küveh lohse münga nyutü hala mowa pehveh ünüh hi tsüluo,” ti khuo.

⁴Thinü navüwa nüh David vü, “Hi tü kümtse lohse küchie nüh muomuo kütsa lohse khinyi münyiethuoh; mükütüküzü vizari tü nyimzari vünüh kükhe nü pehveh üji,” ti rületsü.

⁵Jüta kürüle vü David nüh navüwa rüle taji, “Hi tseshu teküwavü künyitsavühri küsü vünüh tsotho aveh vü nga hiri vünüh kiehtuo tse wie; vizara zanyo ku tü muomuo letse vü nga müthatse wieveh; tinü nosü küju thuoüji mari ke tü küzakele nga mütha nalo?” ti küza.

⁶Thinü navüwa nüh lohse vi ma tsü; küpakenühnyunü jülatü jüma tsothovü VÜWA tüvü kümtse lohse küchie nüh lohse küpa mükünyiekenüh, jüma tü jüma rülo kenüh lohse aküsa sale na küsa kenühVÜWA tüvü nüh küüjiwa vim.

⁷Jüma rülovü Saul sieperi nyi küsü VÜWA tüvü thuote nü saveh; ma nyo thuoüji Doeg, Edomri, Saul nyihzhü kühuori azhievü nüh lehvü wa.

⁸Jüti küsa vü David nüh Ahimelek vü, “Thi noh tü khinyi hala avi küsü nyutü anyuchuwa küsü nga münyie ülo? küpakenühnyunü hitü eh nyuchuwa nga nyutü senyusevi küsü nga hi vü vimkütsekenüh, küpakenühnyunü kajiwa küüroh tü aküpre vünüh müsaji mükümhie kenüh,” ti küza.

⁹Thinü navüwa nüh, “Goliath Filistinwa, noh nüh Ela nyuo vünüh küfethewa nyuchuwa hala pehveh, halie, athsü nüh küzhu nü navükruzhuwa asevü saveh; mükütüküzü noh nüh jüma vi nta thuoüji vi luo, küpakenühnyunü hala jüma wie küchie nüh küsü nga mükünyieluo kenüh,” ti küza. Jüti küüzavü David nüh, “Küpa jüküthse münyie luo; tinü jüma hi tsüluo,” ti khuo.

¹⁰Jüti sanü David tü sühra nü jüma rülovü Saul vünüh zhü Gat kajiwa Abhish vü tewa.

¹¹ Thi Abhish sieperi nüh ma vü, hamatü azhih hama kajiwa David anyu ülo? Akütsih vü mari tü küsü nüh küsü vü azah mürieke ülo, “Saul nüh ma anyienyieri rehthethuoh, thi David nüh ma tieh türakeri rehthethuoh ta müsa ülo?” ti sa.

¹²Jüti küsa vü David tü azhü hamari vi ma luoveh lovü thsepeh huotewa nü Gat kajiwa Abhish krü sheh.

¹³Jükenüh ma tü mari tüvü ma khuke khaphrütewa nü mari ke vü küzhehphro rienyi sataji amükhie kheri vü müzü thi ma mütse tü ma khüne vü liküze, ti sa.

¹⁴Thinü Abhish nüh ma sieperi vü, “Halie, anyiwa tü zhehphromthuoh; tinü noh tü mokenüh ma sie hi vü tse lo?

¹⁵Hi tü küzhehphrori zülaveh nü eh tüvü küzhehphrori saküüzhienti sietse ülo? Anyi hama tü eh zheh lovü küüturu nti ülo?” ti küza.