Read Pochuri Naga 1 SAMUEL 22 Bible Online

1 SAMUEL 22 - Pochuri Naga bible

1 SAMUEL 22

¹David tü jüla nüh tsetewa nü Adulam lopievü mürietewa; jüti küsa vü ma jieri thi ma pa zhehlori nüh jüma küthsüra vü mari tü jüla ma vü wa.

²Thi anyi rhokho küvehri, nyura shewi küvüri, rholorü küvehri aveh ma vü sezhuh khe nü ma nüh mari nyiehvü azhezhiwa sa. Jüti sanü ma vü nyi küpeh anyi müza müzü peh.

³Thi David tü jüla nüh Moab vü Mizpe ti küsa vü tewa; ma nüh Moab kajiwa vü, “Noh vü khuoveh, tinü VÜWA nüh eh kenüh mowa sanaveh ünüh müjie küthsüra küju nü eh pa thi eh zah tü noh vü nyi küpehla jie,” ti khuo.

⁴Jüti sanü ma nüh masü vi Moab kajiwa vü sam taji David tü lopieku lovü kütü küju nü masü tü ma vü nyipeh.

⁵Thinü Gad setsaküthsüwa nüh David vü, “Lopie lovü müpeh huotüm nü Judah zhih vü tewaluo,” ti küza. Jükenüh David tü jüla nüh shu nü Heret reza vü tewa.

⁶Jütiküsa vü David thi ma siekütseri tü ngu savehthuoh ta Saul nüh künara. Saul tü Gibeah vü küzhiho athso rhu kükhu vü avi ma kevü küjehke nü peh, thi ma sieperi aveh nüh ma mükieshe nü tsiepeh.

⁷Thi Saul nüh ma sieperi ma mükieshe nü tsieküvehri vü, “Khinyi künaluo, nohri Benjaminri; Jesse atsanüh nohri aveh vü azhuh thi rhelivizhuh tsü naveh ülo, ma nüh nohri aveh tü anyienyieri khazhu thi müzazari khazhu küüsanaveh ülo,

⁸jüti sanü nohri aveh tü küjurhü vünüh hi sie saluo na savehülo? Eh tsanüh Jesse atsa sie küharü saküsa nyi küsü nga hivü müküpie, nohri nyi küsü nga eh kenüh luoveh küna müsa, nyutü eh tsanüh eh siepewa küke nü hi sie küsaluo nta nosü hakümjie hi kühuola hi vü müküpie,” ti küza.

⁹ Jüti küüzavü Edomri Doeg, Saul sieperi kütuoh vü kütsiewa nüh, “Jesse atsa tü Nob vü, Ahitub atsa Ahimelek vü küru hi nüh nguthuoh,

¹⁰thi ma kenüh VÜWA vü kürü nü ashie vi ma tsü, thi Goliath Filistinwa anyuchuwa vi ma tsü,” ti rületsü.

¹¹Thitü kajiwa nüh zhühle küze nü Ahitub atsa navüwa Ahimelek, Nob vü küpeh navüri ma pa zhehlori aveh juzhuh, thi mari aveh tü kajiwa vü ru kheh.

¹²Jüti küsa vü Saul nüh, “Khinyi künaluo, Ahitub atsa,” ti küza. Jüti küüzavü ma nüh, “Hi hala pehveh, eh vüwa,” ti küza.

¹³Thinü Saul nüh ma vü, “Noh tü mokenüh küüzhe vünüh hi siesaluo veh lo, Jesse atsa nohsü, jüla noh nüh alohse thi anyuchuwa tsü, thi ma kenüh VÜWA vü kürü taji nosü hakümjie hi huo nü sühra taji hi siesaluo veh ülo?” ti küza.

¹⁴Thinü Ahimelek nüh kajiwa vü, “Thi noh sieperi aveh azhievü thawa nüh David, kajiwa tühmuo, thi noh kühuora nyiehvü azhezhiwa sa, thi noh zheh vü küsiake vüveh lo?

¹⁵Ma kenüh hi nüh VÜWA vü küürü nosü nüh apo ülo? Nyu! Kajiwa tü zanyoküsü nga ma siepewa vü nyutü eh pa zhehlori aveh vü küphrake müsa tümluo; küpakenühnyunü noh siepewa tü zhiluo nyutü zülaluo zanyoküsü nga müthsü nü,” ti rületsü.

¹⁶Thinü Kajiwa nüh, “Ahimelek, noh thi noh pa zhehlori aveh tü sütsa wie nathuoh,” ti küza.

¹⁷Jüti küsa vü kajiwa nüh ma kütuoh vü tsieküveh ariehuowa vü, “Sühlewa nü VÜWA navüri zothem luo; küpakenühnyunü mari ke nga David vü pehveh, thi mari nüh ma tü zhütewathuoh ketünga vi hi vü müküpie,” ti küza. Thitü kajiwa sieperi tü mari ke thsuoküzenü VÜWA navüri rügivü müthse nüh sa.

¹⁸Thinü kajiwa nüh Doeg vü, “Noh tü sühle nü navüri vü akethse luo,” ti küza. Jüti küüzavü Doeg Edomwa tü küreleru taji navüri rügivü ma ke thsuoke nü ma nüh jüma rülovümürilothsü navükruzhu küvü nyi zerake nü münga zothem.

¹⁹Thi Nob, navüra nyujiwa vü ma nüh anyuchuwa thsem; nyimpa nga thi nyimza nga, kürünguori thi tühnükünüri, shüvotsa, rawuhri thi nyihzhüri vü anyuchuwa thsem.

²⁰Thitü Ahitub atsa Ahimelek tsari küsü ma nyo Abiathar tü mürienü David sevü zhütewa.

²¹Jüti küsa vü Saul nüh VÜWA navüri zotheküm Abiathar nüh David vü küza.

²²Jüti küüzavü David nüh Abiathar vü, “Doeg Edomwa nüh jüla pehküveh vü ma nüh Saul vü küzatsawie na ti hi nüh jüma rülovünüh thsümthuoh. Noh pa zhehlo vü anyiri aveh küsü tü hi nüh atsotho sa wiethuoh.

²³Hi vü nyipeh luo, mükrü tüm; küpakenühnyunü eh kürholi phahküvehwa tü noh kürholi phah küveh kenüh; hi vü nyiküpeh nüh noh küülole vü pehra naveh ünüh,” ti küza.