Read Pochuri Naga 1 SAMUEL 25 Bible Online

1 SAMUEL 25 - Pochuri Naga bible

1 SAMUEL 25

¹Jüti küsa vü Samuel tü süm; thi Israelri aveh tü sezhuh nü shükheke taji Rama vü ma zheh vünüh ma chohwum. Thinü David tü sühra nü Paran reza vü tetsuo.

²Jüti küsa vü Maon vü nyi küsü peh, ma küüroh thuoüji Karmel vüpeh. Anyi hama tü nyirhie sheh; ma tü nyihzhü anyie küche thi nyihsü anyie küsü ti peh. Ma tü Karmel vünüh ma nyihzhü künehte.

³Anyi jüma nyo thuoüji Nabal, thi ma vüvüh nyo thuoüji Abigail. Nyimzawa tü zanyoküthsütüra peh thi zü, thitü nyimpawa nü kütekürüh thi küsükürie; ma tü Kalebra jünü.

⁴Nabal tü ma nyihzhü küneh tehveh ta küsa David tü reza vünüh künara.

⁵Jükenüh David nüh viza türake küze nü mari vü, “Karmel vü wanü Nabal vü eh nyo vünüh ma rühluo luo.

⁶Jükümjie vünüh ma küze nü, luoveh kürüzih noh vü thi noh zhehlori vü thi noh zhi küpeh aveh vü küpehwa saluo.

⁷Hi nüh küünara noh tü nyihnyih künehte pehveh ta; halie, noh nyihzhükühuori tü hi vü nyitse thi hiri nüh mari vü kümsüküsü nga müsa, thi mari tü zanyoküsü nga müküse, tsotho avehvü nga mari tü Karmel vü peh wie.

⁸Noh küvizari vü künaluo, mari nüh noh vü küza naveh. Jükenüh eh vizari tü noh notha vü küütso künguwa saluo; küpakenühnyunü hiri tü akhu küsü rülowa vü kütse kenüh. Nohvü khuoveh, tinü noh nüh noh vü momowa pehveh ünüh noh sieperithi noh tsa David tsüluo,” ti küza üti küzaküze.

⁹Jüti sanü David vizari tü ru ünü David anyo vünüh Nabal vü hamari aveh küza kheh nü mari tü huopeh.

¹⁰Thinü Nabal nüh David sieperi vü, “David tü thawa lo? Jesse atsa tü thawa lo? Sütathuotü asieperi hozake mari avüri vünüh teküwa pehkhem.

¹¹Eh nyihzhü küneh küderi kenüh saküveh eh lohse, eh juh thi eh safethe küsa vi nü khievü nüh tse nüh müküthsü nyiri vü tsünaveh ülo?” ti rületsü.

¹²Jükenüh David vizari tü sühle tewa nü sheleru ma vü hama aveh küza kheh.

¹³Thinü David nüh ma nyiri vü, “Nyi küsüküsü nga ma nyuchuvikepe luo,” ti küza. Jüti küüza vü mari küsüküsü nga papanyuchuwa vikepe; jüti sanü anyi müza müzü kümjie küsa David senyiwa, thi anyi müza künyi thuoüji achükhuri nopeh.

¹⁴Thitü vizari nyi küsü nüh Nabal vüvüh Abigail vü, halie, David nüh hiri Vüwa küze üta reza vünüh azhühvüri küzeveh; thinü ma tü mari müsamnyi.

¹⁵Tü nyiri tü hiri vü mhie sheh, thi hiri nüh samkümnomna, hiri nüh atovü küpeh vü nga hiri nüh mari vü nyi küwa küju nü zanyo küsü nga müküse;

¹⁶hiri nüh mari sie nyihzhü kühuo küju rüzavü nga thi rülo vünga mari tü hiri vü azie küsü satsü.

¹⁷Jükenüh khinyi thuoüji hama thsü nü nohri tü mowa küsalehünüh thsüluo; küpakenühnyunü kümsüwa tü hiri küsosiewa vünga thi ma zhehlo aveh vü nga kütekemthuoh, thi ma tü arhuohkümsü shehri saküm kenüh nyi küsü nga ma vü azhü müküüzarariküsü.

¹⁸Thinü Abigail tü prelepreza nü tiehshu müza künyi, akhah lehhuo künyi, nyihzhü münga shuküüne, atha küüto türatürü küveh, athsohvi aju küsa akhrü müza küsü, thi ampah ahieküve müza künyi vi nü rawuh rügi vü sa.

¹⁹Jüti sanü nyimzawa nüh ma vizari vü, “Eh tüvü teshu luo; halie, hi nüh nohri se nyiru naveh ünüh,” ti küza. Thitü nyimzawa tü ma vüpa Nabal vü müküza.

²⁰Thi nyimzawa nüh rawuh rügi vünüh wa nü aküzhiwa kütotekükhu vü tseturu ünü, halie, David thi ma nyiri tü ma wuovü tseturu nü nyimzawa tü mari mütu.

²¹Jüti küsa vü David nüh, müjuju vünüh reza vü anyi hama nüh küpeh aveh hi tü huoteru savehthuoh, jükenüh ma ke vü küpeh zanyoküsü nga müküse; thi kümhie müthoh vünüh ma nüh kümsüviru hi tsüthuoh.

²²Mükütüküzü arüne vü nyimpari ma kevü küpeh aveh azhievü küsü wienga hi nüh kükhemthuoh üji, Saküüwuowa nüh jüüta vünüh thi jüma nyiehvü nga nüh David vü sakütsüwa saluo.

²³Abigail nüh David künguvü prelepreza nü rawuhwa rügi vünüh turu ma nyieh vü küngie azhihvü tsuo.

²⁴Nyimzawa nüh ma jih vü küluze taji, “Hi vü mpa nüh, eh vüwa, müküleh küüru luo; noh vü khuoveh, tinü noh siepevühwa tü noh khüna vü raküüzathsemo, thi noh siepevühwa zhüri künatsüluo.

²⁵Eh vüwa tü küüsükürie anyi Nabal hama vü amüshe müthse tümluo; küpakenühnyunü ma nyo mokümjie ünüh ma tü jüüta wiethuoh küsa kenüh; ma nyo tü Nabal (mazhünyo aküzhe), thi aküzhe ma vüpehm; thitü noh siepevühwa tü eh vüwa vizari noh nüh küüzerimüküngu.

²⁶Jükenüh khinyi thuoüji, eh vüwa, VÜWA thi noh kürholi nüh rhoküveh üta, VÜWA nüh noh tü müküleh azüh vünüh thi noh mpa noh ke vünüh amüthoh VÜWA nüh noh kheküm küngu kümjie noh mükünongüri thi eh vüwa vü zanyo kümsü sa nta küphahri tü Nabal kümjie küsaluo.

²⁷Thi noh siepewa nüh eh vüwa vü aküte vikütsewa tü viza eh vüwa se nyikütseri vü raküütsüluo.

²⁸Noh siepevühwa nüh vürie küm nojatsü üti khuoveh; küpakenühnyunü VÜWA nüh eh vüwa tü azheh küsü satsütsa wie naveh, eh vüwa nüh VÜWA arieri siesaluo kütse kenüh; thi noh kürhoküju kümsüwa tü noh vü künguwa nyu.

²⁹Mükütüküzü anyiri nüh sühra nü noh zhe nta thi noh kürholiphah nta thuoüji eh vüwa kürholi tü VÜWA nohri Saküüwuowa kürhoküüjehte aküshih vünüh küükhote luo; thi noh mükünongüri akürho tü thumkavüh vünüh aloh kaküüze üta kaküze naveh.

³⁰Thi noh kenüh ma nüh kümhie küphrahte aveh VÜWA nüh eh vüwa vü satsü, thi Israel nyiehvü noh kaji küsa küteketsü ti thuoüji,

³¹azhühnyo münyie nüh azüh küthüküm nyutü eh vüwa kenüh ma mpa amüthoh küvi kenüh eh vüwa tü amüsheküna küpehwa nyu, nyutü zhürüluo kümshe ase küpehwa nyu. Thi VÜWA nüh eh vüwa vü kümhie sa thuoüji noh siepevühwa müsheluo,” ti küza.

³²Thinü David nüh Abigail vü, “Hi kümtu nta nosü noh küüze Israel Saküüwuowa VÜWA tü akütsia küvüwa saluo!

³³Müküleh azüh vünüh thi hi mpa eh ke vi nü amüthoh küsa vünüh hi külolekütsüwa noh kelie tü akütsia thi noh tü akütsia küvüwa saluo.

³⁴Küpakenühnyunü VÜWA Israel Saküüwuowa rho tohküveh üta, hi nüh noh sakümnomna naküsa vünüh hi khetetsü nü noh tü pre taji hi mükümtu tüla thuohtü rüne thuoüji nyimpari küsü wienga Nabal kenüh kümtowa nyuthuoh nü,” ti küza.

³⁵Thinü David tü nyimzawa nüh ma vü mowa viru nüh vitaji nyimzawa vü, “Luoveh kürüzih ti noh zheh vü waluo; noluo, hi tü noh jikhi künamtüthuoh, thi hi nüh noh kükhuo satsümtüthuoh ünüh,” ti küza.

³⁶Thi Abigail tü Nabal vü ru nü halie, kajiri küsü kümjie ma tü ma zheh vünüh akhu küsü sapehveh. Jüti küsa vü Nabal luoveh tü ma lovü nüh lozhelokuveh, küpakenühnyunü ma tü müshe sheh kümthuohkenüh, jükenüh arüne müjie kütho küju nü nyimzawa tü ma vü zanyoküsü nga müküza.

³⁷Arüne vü Nabal vünüh kümshewa raküm vü ma vüvüh nüh ma vü zanyo hamari küza, thi ma luoveh tü ma lo vünüh sütewa nü ma tü aloh küsü kümjiesatewa.

³⁸Jüti küsa vü rülo türake kümjie küsa sevü VÜWA nüh Nabal fetsü nü ma tü süm.

³⁹Nabal tü sümthuoh ta David nüh küünara vü ma nüh, “Hi nüh Nabal ke vünüh müküchie küngu amüthoh sakütsüwa, thi kümsüwa vünüh ma siepewa khete kütsüwa VÜWA tü kütsia küvüwa saluo; Nabal nüh kümsü küsa VÜWA nüh ma lü rügivü thsem letüthuoh,” ti küza. Jüti küsa vü David nüh Abigail vi ma vüvüh sana küsa kenüh wuori küze nü ma hi.

⁴⁰David sieperi tü Karmel vü Abigail vü ru ünü mari nüh ma vü, “David nüh noh vi ma vüvüh sana küsa kenüh noh sie ma vü ru üta hiri noh vü küzeveh lie,” ti küza.

⁴¹Jüti küüzavü nyimzawa tü ma nyieh azhihvü vü küngietsuo taji, “Halie, nohri siepevühwa tü eh vüwa sieperi jih kükhrü siepewa,” ti küza.

⁴²Thi Abigail tü pre nü sühra taji rawuh küsü rügivü kuo nü ma rülavü münga ma vü siewa; nyimzawa tü David zhühleküvüri vü nyiwa nü ma vüvüh satewa.

⁴³David nüh Jezreelvühwa Ahinoam nga za nü masükhürü nga mavüvüh sa.

⁴⁴Saul nüh ma tsavühwa Maikhal, David vüvüh vi Laish tsa Palti tsüm, ma tü Gallimri.