Read Pochuri Naga 1 SAMUEL 26 Bible Online

1 SAMUEL 26 - Pochuri Naga bible

1 SAMUEL 26

¹ Jüti küsa vü Zifri tü Saul vü Gibeah vü ru nü, “David tü ma mpa nüh Hachila küzhiho ti küsa Jeshimon zhiehshu wuovü küthimüveh ülo?” ti küna.

²Jükenüh Saul tü sühra nü Israelri kürüka anyi anyie küche sietaji Zif reza vünüh David phah nti tsuo.

³Thi Saul tü lehkhuji natovü Jeshimon zhiehtu vü Hachila küzhihovünüh kürünape sanü peh. Thitü David tü reza vü peh wie; thi ma nüh Saul tü reza vü ma sevü kütse küngu vü,

⁴David nüh küriehziri küze ünü Saul tü rupehveh ta küsathsütohra.

⁵Thinü David tü sühra nü Saul nüh kürünape sataji pehküvehvü ru nü Saul thi Ner atsa Abner ma thopahiri sierhüwa masü küzehpe ngura; Saul thuoüji kürünape alovü zehveh, thi thopahiri nü kürünape sanü ma mükielepeh, ti sa.

⁶Jüsevü David nüh Hitwa Ahimelek thi Joab anü Zeruia atsa Abishai vü, “Thari nüh hi sie nü Saul kürünape vü tsuo na lo?” ti küna. Jüti küüna vü Abishai nüh, “Hi nüh noh vü nyitsuo naveh,” ti rületsü.

⁷Jükenüh David thi Abishai tü arüza vünüh thopahiri vü wa ünü Saul tü kürünape lovü ma vi ma lü wuovü azhih vü shoke nü zehpeh la; thi Abner thi thopahiri tü ma mükieshe nü zehpehveh.

⁸Jüti küsa vü Abishai nüh David vü, “Nosü Saküüwuowa nüh noh mükünongüwa noh ke vü thsemthuoh; tinü khinyi thuoüji eh vi vinü küsükeri vünüh azhih vü ma kümzetem luo, hi tü künyikeri nga ma küshüwa nyu,” ti küza.

⁹Thitü David nüh Abishai vü, “Ma müzothe tüm; küpakenühnyunü thawa nüh ma ke thsuoküze nü VÜWA nüh thsekümwa sie saluo taji müzih nüh sanaveh lo?” ti küza.

¹⁰David nüh shele, “VÜWA nüh rho küveh üta VÜWA nüh ma zothe naveh; nyutü ma rülo tü aküsü vü ru naveh; nyutü ma tü arie vüwa nü kümieküm sanaveh.

¹¹ Eh ke thsuowa nü VÜWA nüh thsekümwa sie saluo na küsa VÜWA nüh khem; thitü ma chelüvü pehküveh aviwa thi ajuh leh huowa vi nü tewa ünüh raluo,” ti küza.

¹²Jükenüh David nüh aviwa thi ajuh leh huo Saul chelü vü pehküvehwa vi nü mari sie taji tewa. Nyi küsü nga nüh jüma müngu nyutü müthsü, nyutü nyi küsü nga müsühra; küpakenühnyunü VÜWAvünüh mari vü küzehmophohke thseküm kenüh mari aveh tü zehphoketewa.

¹³Jüti sanü David tü küpawuovü tewa taji kületsuovü aküzhi rügivü masü azhievü kükiehtuo hothake vü tsie;

¹⁴thi David nüh thopahiri thi Ner atsa Abner ji taji, “Abner, noh tü thama rülethuoh ülo?” ti sa. Thinü Abner tü rüle taji, “Kajiwa jiküveh noh tü thawa lo?” ti sa.

¹⁵Jüti küsa vü David nüh Abner vü, “Noh tü anyiri küsü nyu ülo? Israel vü thawa nüh noh kümjie lo? Thinü noh tü mokenüh noh Vüwa kajiwa huompeh nüh sam lo? küpakenühnyunü anyiri nyi küsünüh kajiwa noh Vüwa zoriem nta küturuthuoh kenüh.

¹⁶Zanyo hama noh nüh sakümwa tü mümhiethuoh. VÜWA nüh rhoküveh üta noh tü küsülehthuoh, küpakenühnyunü noh nüh VÜWA nüh thsekümwa noh Vüwa huom küpeh kenüh. Thi khinyi thuoüji kajiwa avi, thi ajuh leh huo ma lüche wuovü küpehwa tü khiela pehveh ünüh noluo,” ti küza.

¹⁷Saul nüh David jikhi thsüra nü, “Hama tü noh jikhi thuoh ülo, ehtsa David?” ti küna. Thinü David nüh, O kajiwa, ti rületsü.

¹⁸Ma nüh shele, “Eh vüwa tü mokenüh ma siepewa se zhetse lo? Hi nüh mowa sam lo? Mowa kükhieh eh kevü pehveh lo?

¹⁹Jükenüh khinyi eh vüwa kajiwa tü ma siepewa zhü künaluo. Mükütüküzü VÜWA nüh noh sieküre nü hi sie saluoveh üji matü tsüküvehwa vi luo; thitü mükütüküzü nüh jüma tü anyiri nüh thuoüji mari tü VÜWA tüvü müzüküm saluo, küpakenühnyunü mari nüh nosü hi zheja nü VÜWA aka vü hi tü ehsuope müküüpeh nta küsa kenüh, ‘Wa nü nyiaza küpa kütsü saluo,’ ta küüza kenüh.

²⁰Jükenüh khinyi thuoüji, eh züh tü VÜWA tüvü nüh azhihvü tsuohtsa küüze müsa tümluo; küpakenühnyunü Israel kajiwa tü ehkürho phah nta shuküru kenüh, aküzhi vü akakhu küzheri nüh zhekütse kümjie küsa kenüh,” ti küza.

²¹Jüti küüza vü Saul nüh, “Hi nüh müküleh samthuoh, shelem luo, eh tsa David, küpakenühnyunü nosü noh notha vü eh kürho tü amekürhe kenüh; halie, hi nüh aküzhe küüroh savehthuoh, thi sazihshemthuoh,” ti küza.

²²Thinü David nüh rüle taji, “Aviwa hala pehveh, O kajiwa! Vizari küsü küze nü jüma küüvi luo.

²³VÜWA nüh nyi küsüküsü nga ma künyitsa thi ma küzhütsa nyitsa kenüh jisuo satsütsüti; küpakenühnyunü nosü VÜWA nüh noh vi ehke vü thsekümthuoh kenüh, thitü hi nüh eh ke vi VÜWA nüh thsekümwa rügi vü küthsewa nyu.

²⁴Halie, nosü noh kürholi tü eh notha vü amekürhe kenüh eh kürhonga VÜWA notha vü amekürhe küsawa saluo, thi ma nüh hi tü kümnomna küji vünüh küvizhuwa saluo,” ti küza.

²⁵Thinü Saul nüh David vü, “Noh tü kütsia küviwa saluo, eh tsa David! Noh tü zanyo hozake sanaveh thi mari vünüh küsara sanaveh,” ti küza. Jüti sanü David tü ma lehkhuji vü tewa, thi Saul thuoüji ma pe vü shele teru.