Read Pochuri Naga 1 SAMUEL 27 Bible Online

1 SAMUEL 27 - Pochuri Naga bible

1 SAMUEL 27

¹Jüsevü David tü ma mpa ma luoveh vünüh, “Hi tü rülo küsü Saul ke vünüh kümie wie naveh; hi tü mürie nü Filistinra zhihvü teküwa nyiehvü eh kenüh kümhie küsü nga münyiewiethuoh; jüthuoüji Israelri rüshu vü Saul tü hi küphah küngulewa nyuwiethuoh, thi hi tü ma ke vünüh mürietewa nathuoh,” ti sa.

²Jüti sanü David tü sühra nü ma thi ma siekütse nyi müza türo ritü tse Gat kajiwa Maok atsa Akhish vü tewa.

³Thi David tü ma thi ma nyiri tü Gat vü pehtewa, David thi ma vüvüh künyi: Akhish zheh vü peh, thi ma nyiri nü papa tharuo sietaji rho.

⁴Jüti küsa vü David tü Gat vü zhütewathuoh ta küsa wuori nüh Saul vü küüza vü ma mphah nüh sam le.

⁵Thinü David nüh Akhish vü, “Mükütüküzü hi tü noh notha vü küütso pehveh üji anyu nyuji küsü vü azhie küsü hi tsü nü hi jüla küürho mo; küpakenühnyunü noh siepewa tü mokenüh anyuji küjiwa vü noh sie nü rho na lo?” ti küza.

⁶Jükenüh Akhish nüh Ziklag vi ma tsü nü nosü küju nga Ziklag tü Judah kajira zhi satse wieveh.

⁷Thi David nüh Filistinra nyuji vü kürho rülo küürüh mahvi küsü nü asa müzü.

⁸Jüti küsa sevü David thi ma nyiri tü khru nü Geshurri, Girziri thi Amalekri vü zhürüluo zhe; küpakenühnyunü azhih hala kürhori nüh khanavü nüh hamari tü Shur vünüh Egypt küju kürho kenüh.

⁹Thi David nüh azhihwa fe taji nyimpari nga nyutü nyimzari nga müküükhewiethuoh nüh sa, thitü nyihzhü, shüvotsa, rawuhri, Utri thi thsümnyiri ti vi nü Akhish vü sheleteru.

¹⁰Thinü Akhish nüh, “Nosü noh tü thawa zhürüluo küzhe sa lo?” ti küna. Jüti küüna vü David nüh, “Judah vü Negeb, nyutü, Jerahmeelri Negeb, nyutü Kenri Negeb,” ti rületsü.

¹¹Gat vü azhühwa wa vimküru nti küsa kenüh David nüh nyimpari nga thi nyimzari nga küsü nga müküürho wie. “Mari nüh hiri khukeküzam üsü,” ta kümshe kenüh, thi, David nüh jükümjie samwiethuoh nü, ti küza. Filistinri nyuji vü kürho küju nü David tü hakümjie vünüh sapeh huo.

¹²Thi Akhish tü David vü kütsotü peh, ma nüh kümshe, “Ma tü mampa ma nyiri Israelri nüh ma kükrejuküm samthuoh; jükenüh tsotho aveh vü ma tü eh siepe sanathuoh,” ti küza.