Read Pochuri Naga 1 SAMUEL 28 Bible Online

1 SAMUEL 28 - Pochuri Naga bible

1 SAMUEL 28

¹Jüti küsa rülo vü Filistinri tü Israelri siesaluo nti mari rienyiri sazhuh. Thinü Akhish nüh David vü, “Noh thi noh nyiritü hi sie nü thopahiri vü wa nati küsa thsüluo,” ti küza.

²David nüh Akhish vü, “Mhie sheh, noh siepewa nüh mowa sara naveh ünüh noh tü thsüra naveh nü,” ti küza. Thinü Akhish nüh David vü, “Mhiesheh, hi nüh noh tü akürho ajü eh kühuowa küsanaveh,” ti küza.

³ Jüsevü Samuel tü süm nü Israelri aveh tü ma kenüh shükheketaji Rama vü ma mpa ma nyuji vünüh ma chohwum. Thi Saul nüh azhihwa vünüh tüshitümari thi amahzhieri zheja khehm.

⁴Jüti küsa vü Filistinri tü sezhuh nü ru taji Shunem vü kürünape sa; thi Saul tü Israelri aveh jizhuh nü Gilboa vünüh kürüna sa.

⁵Saul nüh Filistinra thopahiri künguvü ma tü krütewa nü ma luoveh tü khielohti küshühtewa.

⁶ Saul nüh VÜWA vü kürü tü amoh vü nga nüh, nyutü kümshira vü nga nüh, nyutü setsaküthsü vü nga nüh vi ma rüle mütsü nüh sam.

⁷Jüti küsa vü Saul nüh ma sieperi vü, “Eh kenüh tüshitümavühri küsü phahtsü nü hi tü ma vü wa taji küüna sa jie,” ti khuo. Ma sieperi nüh ma vü, “Halie, Endor vü tüshitümavühri küsü pehveh,” ti küza.

⁸Jükenüh Saul tü ma mpa nüh ma küthseh nü thsümnyi küpa thsetaji ma thi nyi künyi sie nü wa; thi mari tü nyimzawa vü arüzavü ru nü ma vü, “Sietse vünüh hi vü tü ma tsü nü hi nüh noh vü anyo ji kütsüri hi vü sieru luo,” ti khuo.

⁹Nyimzawa nüh ma vü, “Saul nüh mowa samthuoh ünüh, mokümjie ma nüh tüshitümari thi mahzhiri azhihwa vünüh zoriem nüh noh nüh thsütohveh. Thinü noh tü mokenüh eh kürholi kenüh aküsü viru nti küjurü thseveh lo?” ti küza.

¹⁰Thitü Saul nüh VÜWA vünüh küshie taji, “VÜWA nüh rhoküvehüta zanyo hama kenüh kümnomna küsü nga noh vü küruwa nyu,” ti küza.

¹¹Thinü nyimzawa nüh, “Noh kenüh thawa sieshuhru üti lo?” ti küna. Ma nüh, “Eh kenüh Samuel sieshuhru luo,” ti rületsü.

¹²Nyimzawa nüh Samuel küngu vü ajikhi zie kümsie sheh nü krie taji Saul vü, “Noh tü mokenüh hi müramizhiveh lo? Noh tü Saul nü,” ti küza.

¹³Kajiwa nüh nyimzawa vü, “Mükrütüm luo; noh tü mowa nguveh lo?” ti küna. Thinü nyimzawa nüh Saul vü, “Azhih vünüh nyiaza küsü shukütse hi nüh ngu,” ti rületsü.

¹⁴Ma nüh nyimzawa vü, “Ma tsonyie tü mokümjie küsa lo?” ti küna. Thinü nyimzawa nüh, “Nyimpa kükhruo küsü shuru; thi mampa akruzhu küriehzhuwa nüh küzhu,” ti rületsü. Jüti küsa vü jüma tü Samuel ta küsa Saul nüh thsüra nü ma tü azhih vü ma nyiehvü küngie tsuo taji siakesheh.

¹⁵Jüsevü Samuel nüh Saul vü, “Noh tü mokenüh hi sie shuhru nü hi saküjakünyahveh lo?” ti küna. Saul nüh, “Hi tü hozake müshe mnomnaveh; küpakenühnyunü Filistinri nüh hi sie arie saveh, thi Saküüwuowa tü hi vünüh kürele tewa nü setsaküthsü vü nga nüh satü nyutü amoh vü nga nüh satü hi vü rületsü müküveh wiethuoh kenüh; jükenüh hi mowasa üti nüh hi vü küüza na küsa kenüh hi nüh noh jisaveh lie,” ti küza.

¹⁶Thinü Samuel nüh, “Thinü VÜWA tü noh vünüh sühletewa nü noh mükünongüwa samthuoh üji mokenüh noh tü hi vü künaveh lo?

¹⁷Ma nüh hi vünüh küphrahte üta VÜWA nüh noh vü sathuoh; küpakenühnyunü VÜWA nüh noh ke vünüh kajipewa tü zokhrimü nü noh zhephruwa David vü tsükümthuoh kenüh.

¹⁸Küpakenühnyunü noh nüh VÜWA jikhi müküüna kenüh, thi ma nüh khielota arüküshu Amalek vü vimküwa kenüh, jükenüh nosü VÜWAnüh zanyo hama samthuoh ünüh.

¹⁹Jümpa mükünyu Israel nga noh sie nü VÜWA nüh Filistinra ke vü tsüm nathuoh; thi thuotü noh thi noh tsa nyimpari tü hi siepehnathuoh; VÜWA nüh Israel thopahiri nga vi Filistinra kevü tsümnathuoh nü,” ti küza.

²⁰Jüti küüzavü Samuel zhüri vünüh akükrü pro taji Saul tü küchuohküla nü azhih vü küluzehtewa taji ma vü akükhra küsü nga münyie nüh satewa, küpakenühnyunü arülo ajü thi rüza ajü zanyoküsü nga mükütsa kenüh.

²¹Jüti küsa vü nyimzawa tü Saul vü ru ünü ma tü sakümzhohküm nyimzawa nüh ngura, nyimzawa nüh ma vü, “Halie, noh siepevühwa nüh noh zhü künamthuoh; eh kürholiwa hi nüh eh kevü vimthuoh, thi noh nüh hi vü mowa küza nüh künamthuoh ünüh.

²²Jükenüh khinyi thuoüji noh nga noh siepevühwa zhü künaluo; tinü hi tü noh tüvü lohse küsü küüsanü tsataji noh leh vü küwa vü kükhra küngura sanaveh,” ti küza.

²³Thitü ma nüh mawie ta sataji, “Hi nü kütsawa nyu,” ti küza. Thitü ma sieperi nüh nyimzawa sie nü ma vü khri ünü ma tümari zhü küna. Jükenüh ma tü azhih vünüh sühra nü aze rügivü shupeh.

²⁴Jüti küsa vü nyimzawa tü azheh lovü mieshüzah küülie küsüpehveh ünü ma nüh jüma shiti fethe, thi ahie vi nü neh taji ahzhi müthse nüh jüma veh,

²⁵Jüti sanü nyimzawa nüh vi Saul thi ma siepera tüvü satsü taji mari tü tsa. Jüsevü mari tü sühra nü jüma rüza vü tewa.