Read Pochuri Naga 1 SAMUEL 29 Bible Online

1 SAMUEL 29 - Pochuri Naga bible

1 SAMUEL 29

¹Jüsevü Filistinri tü mari rienyiri aveh Afek vü sezhuh khe; thi Israelri tü Jezreel vü ajuhküshupe vünüh kürünape sanü peh.

²Filistinri vüwari nüh müzaza thi anyienyie vünüh tsezhuwa, thitü David thi ma nyiri thuoüji Akhish sie nü asevü tse,

³Filistinra sierhüri nüh, “Ebri hamari tü hala mowa saveh lo?” ti küna. Thinü Akhish nüh Filistinri sierhüri vü, “Hamatü David, Saul Israelri kajiwa siepewa nyu ülo, ma tü rülo hozake mahvi hozake hisie nü ru, thi ma hi sie porietewaketünga nosü küju ma vü müküleh küsü nga hi nüh müngu,” ti küza.

⁴Thitü Filistinra sierhüri nüh ma vü arüshu nü ma vü, “Noh nüh khiela ma sanüh jüla küzemle naküsa kenüh anyiwa küzem le luo; ma tü ariepe vünüh hiri sie küwuluo müküsanüh sana küsa kenüh hiri sie nü ariepe vü mütsuora. Küpakenühnyunü anyi hama tü mokümjie vünüh ma mpa nüh ma vüwa sie kütsarüle sara na lo? Jüti ma tü anyi hala pehküveh alüri vü nyiküpehwa nyu ülo?

⁵ Hamatü David, akütsih vü mari nüh küsü nüh küsü vü azahrieke taji, Saul nüh ma anyienyie zothe, thi David nüh ma anyie türake zothe ta küsawa nyu ülo?” ti sa.

⁶Thinü Akhish nüh David ji taji ma vü, “VÜWA nüh rhoküveh üta noh tü müshom, thi hi vünüh thuoüji noh tü hi sie shuwa thi tsetu ti sawie ketünga azhümnyie; küpakenühnyunü noh nüh hi vü küru vünüh nosü küju hi nüh noh vü müküleh küsü nga müküngu kenüh. Jütawie ketünga mari tü noh mülo.

⁷Jükenüh khinyi sheletewaluo; thi luoveh rüzih nü waluo, jüti sanü noh tü Filistinra vüri külokhu müsa tümluo,” ti küza.

⁸Jüti küüzavü David nüh Akhish vü, “Hi nüh noh küüroh vü küturu rülo vünüh nosü küju noh tü noh siepewa vünüh mowangum nü hi tü wa taji eh vüwa kajiwa mükünongüri sie müsaluorati saveh lo?” ti küza.

⁹Thinü Akhish nüh David vü, “Noh tü eh notha vü thuoüji Saküüwuowa zhühleri küsü üta müshekümsü mükünyie hi nüh thsü; jütawie ketünga Filistinra sierhüri nüh, ‘Ma thuoüji hiri sie nü ariepe vü müwara,’ ta küza.

¹⁰Jükenüh khinyi thuoüji vüwa sieperi tü noh sieküruri nyi nü rünekümto küche taji aküwie keküngute vünüh tsetewaluo,” ti küza.

¹¹Jükenüh David tü ma nyiri sie nü Filistinra zhih vü sheletewanti rüne kümto tsezhutewa. Thitü Filistinri tü Jezreel vü tekhru.