Read Pochuri Naga 1 SAMUEL 4 Bible Online

1 SAMUEL 4 - Pochuri Naga bible

1 SAMUEL 4

¹Thi Samuel zhü tü Israelri aveh vü ru. Jüti küsa vü Israelri tü Filistinri siesaluo nti ariepe vü wa, mari tü Ebenezer vü kürünape sa, thi Filistinri nüh Aphek vü kürünape sanü peh.

²Filistinri tü ru nü Israel siesaluo nti ru nü ariepewa tü ritam taji Filistinri nüh Israelri cham, thi ariepe vünüh anyiri anyiemüzü rehthem.

³Thi thopahiri kürünape vü teru ünü Israel kükhruori nüh, “VÜWAtü mokenüh nosü hiri vi Filistinri tüvü saküvohriem lo? HiriVÜWA kütsathuozhü küthseku Shilo vünüh vi hala teru taji ma tü hiri azhievü turu nü mükünongüra kükhra vünüh hiri küülole naveh ünüh,” ti küza.

⁴Jüti sanü anyiri Shilo vü küze nü jüla nüh akükhratsa VÜWAkütsathuozhü küthseku jüma tü Kürhosawa, asa aküsa künyi küperügivü küpehwa kharu; thi Eli atsa künyi: Hofni thi Finehas masü tü Saküüwuowa kütsathuozhü küthseku vü nyiru.

⁵VÜWA kütsathuozhü küthseku kürünape lovü turu ünü Israelri aveh tü kükhra sheh küzie sa, jüti küsa vü azhihwa tü jikhi sa le.

⁶Filistinri nüh jikhi küzie künara nü mari nüh, “Ebrira kürünape vü zie küji sheh küveh jütü mazhühnyo mowathuohlo?” ti sa. VÜWA kütsathuozhü küthseku kürünape vü teruthuohta küünara vü,

⁷Filistinri tü krütewa; küpakenühnyunü mari nüh, “Jie, hiri tü sara nathuoh! küpakenühnyunü hakümjie zanyo küsü nga khanavü müjie küsa wie kenüh.

⁸Jie, hiri tü sara nathuoh! Thawa nüh akükhra nyiaza hamari vünüh hiri vizhu nathuoh lo? Saküüwuowa hamari nüh reza vünüh sahnamüküzüküzü vi Egyptri küzotherithuoh nü.

⁹Luoveh ji luo, thi nohri mpa nüh nyimpari kümjie vünüh saluo, O Filistinri, mari nüh nohri vü küsa üta nohri tü Ebrira tükha thama küsa kenüh; nohri mpa nüh nyimpari kümjie sanü saluo luo,” ti küza.

¹⁰Jüti sanü Filistinri tü saluo nü Israel chara, thi mari tü te taji mari aveh nga papa zheh vü tewa kheh; thi rehthe kümkriekem, küpakenühnyunü Israelri küzothe tü ajih vünüh kütse rienyirianyie cherake zotheküm kenüh.

¹¹Thi Saküüwuowa kütsathuozhü küthseku tü retera; thi Eli tsa nyimpa künyi Hofni thi Finehas masü nga rehthem.

¹²Jüti küsa vü Benjamin anyi küsü tü jüma rülovü ariepera kürivünüh ma thsümnyi müzükhrih thi azhitho vi ma lü küne ti sanü zhü Shilo vü ru.

¹³Ma ruju ünü Eli tü ma pe rügivü lehkhuji kütuoh vü shupehnü nopehveh, küpakenühnyunü Saküüwuowa kütsathuozhü küthseku kenüh ma luoveh tü kükhe küveh kenüh. Thi anyiwa nüh anyujiwa vü ru nü zhühlewa küza ünü anyuji aveh tü krie zhutewa.

¹⁴Eli nüh kükriezhu jikhiwa künakera ünü ma nüh, “Küzie khi hamatü mowathuoh lo?” ti sa. Thinü anyiwa tü pre nü ru Eli vü küza.

¹⁵Khinyi thuoüji Eli tü mahvi guhrake nü tüze khruomthuoh thi ma notha tü küprü nü müküngura sam.

¹⁶Thi anyiwa nüh Eli vü, “Hi tü arie vünüh küruwathuoh; nosü hitü arie vünüh te taji tetse,” ti küza. Thinü ma nüh, “Mokümjie sawa thuoh lo, eh tsa,” ti küna.

¹⁷Zhühle viküruwa nüh rüle taji, “Israelri tü Filistinri atüvü nüh te taji tewathuoh, thi anyiri azhievü küzothe nga müküüzara nüh samthuoh; noh tsa künyi: Hofni thi Finehas masü nga sümthuoh, thi Saküüwuowa kütsathuozhü küthseku nga retewathuoh,” ti küza.

¹⁸Ma nüh Saküüwuowa kütsathuozhü küthseku phrahte ünü Eli tü akheri nato vünüh ma pe rügi vünüh asewuovü jiezehtewa nü ma kusheshim taji süm; küpakenühnyunü ma tü khruomthuoh thi küzhoküm kenüh. Ma tü mahvi zührake Israelra lesa sa.

¹⁹Jüma tsotho vü ma jühnyi, Finehas vüvüh tü atsamoh nü küwuolehvü pehveh. Thinü nyimzawa tü Saküüwuowa kütsathuozhü küthseku tü retewathuoh ta küsa zhühle, thi ma ku thi ma vüpa masü süm ta küünara vü ma tü küngietsuo nü atsa wuo; küpakenühnyunü ma künawatü ma vü teküruthuoh kenüh.

²⁰Thi ma küsü tsotho teküru vü nyimzari ma siepehküvehri nüh mavü, “Mükrü tüm, küpakenühnyunü noh tü nyimpari wuoküsakenüh,” ti küza. Thitü ma tü mürüle nüh sa, nyutü ma tü jümavü luoveh müthse nüh sam.

²¹Thi ma nüh atsawa nyo Ikhabod, ma zhühnyo küthohla mükünyie tithoh taji, “Küthohlawa tü Israel vünüh tewathuoh,” ti sa, küpakenühnyunü Saküüwuowa kütsathuozhü küthseku tü reteküwathuohkenüh, thi ma ku thi ma vüpa kenüh.

²²Thi nyimzawa nüh, “Israelri vünüh kütholathovü tü tewathuoh thi Saküüwuowa kütsathuozhü küthseku tü retewa ti küsa kenüh,” ti küza.