Read Pochuri Naga 1 SAMUEL 5 Bible Online

1 SAMUEL 5 - Pochuri Naga bible

1 SAMUEL 5

¹Filistinri nüh Saküüwuowa kütsathuozhü küthseku kürera vü mari tü jüma kha nü Ebenezer vünüh Ashdod vü tewa;

²jüti sanü Filistinri nüh Saküüwuowa kütsathuozhü küthseku virunü Dagon zheh vü Dagon nato vü sa.

³Thi Ashdod nyiri tü jüma rülo nyiehvü kümto sühra ünü, halie, Dagon tü VÜWA kütsathuozhü küthseku tüvü nüh azhih vü küluwa nü fephohketewa. Jükenüh mari nüh vi nü ma pe vü sam le.

⁴Thitü mari nüh rülo künyiawa kümto sühra ünü, halie, Dagon tüVÜWA kütsathuozhü küthseku atüvü nüh azhih vü küluwafephohketewa lehü, thi Dagon alü thi ma ke künyi tü akheji rügi vünüh küloshi nü pehla; ma lahveh mpa nüh ma vü küükhesala nü ngu.

⁵Hama kenüh nosü küju nga Dagon navüri nga satü, thi Dagon zhehlovü küturi aveh nga satü Ashdod vü Dagon kheji münyi.

⁶VÜWA ke tü Ashdod nyiri vü küzho sheh, thi ma nüh Ashdod vü nga thi natonahuori vü nga ma nüh mari sakümzhoh thi aküvü vi mari sakümnomna.

⁷Thi Ashdod nyiri nüh azanyori mokümjie ünüh ta küngu vü mari nüh, “Israelri Saküüwuowa kütsathuozhü küthseku tü hiri vü küpehvüh nyu, küpakenühnyunü ma ke tü hiri vü nga thi hiri nyiaza Dagon vü nga küzhoküm kenüh,” ti küza.

⁸Jükenüh wuori küze nü Filistinri vüwari aveh küvizhuhtaji, “Hiri tü Israelra Saküüwuowa kütsathuozhü küthseku vü mowasana lo?” ti sa. Mari nüh, “Israelra Saküüwuowa kütsathuozhü küthseku vi Gat vü mükiele luo,” ti rületsü. Jükenüh mari nüh Israelra Saküüwuowa kütsathuozhü küthseku jüvü kharu.

⁹Thitü mari nüh jüma vi mükiele küru vü VÜWA ke tü anyujiwa vü sie küsaluo sanü kümzhoh aküji tsü, thi rünguori vü nga thi kükhruori vü nga ma nüh anyujiwa nyiri sakümnomna, jüti sanü marivü aküvü shuru kheh.

¹⁰Jükenüh mari nüh Saküüwuowa kütsathuozhü küthseku tü Ekron vü küzem. Thitü Saküüwuowa kütsathuozhü küthseku Ekron vü teküruvü Ekron nyiri tü zie taji, “Hiri thi anyiri zothe na küsa kenüh mari nüh Israelri Saküüwuowa kütsathuozhü küthseku kha mükielerusavehthuoh,” ti küza.

¹¹Jükenüh mari tü küze nü Filistinra vüri aveh saküüsezhuh nü mari vü, “Israelri Saküüwuowa kütsathuozhü küthseku küzem luo, thi ma mpa ma pe vü küüshelem nü hiri nga thi hiri nyiri nga müküürehthe nüh küsaluo,” ti küza. Küpakenühnyunü anyujiwa avehvü aküsü kümzhoh pehkümthuoh kenüh. Saküüwuowa ke tü jüla küzhosheh küvehthuoh kenüh,

¹²anyi thari müsü nüh pehveh ünüh jümari tü aküvü nüh sakekheh kümthuoh kenüh, thi anyujiwa küzie khi tü atülü vü tekükuo sa.