Read Pochuri Naga 1 SAMUEL 9 Bible Online

1 SAMUEL 9 - Pochuri Naga bible

1 SAMUEL 9

¹Jüti küsa tsotho vü künyirhie shehri küsü Benjamin kuoh vünüh ma nyo Kish, Abiel atsa, Zeror atsa, Bekorat atsa, Afia tsa peh;

²ma tü atsa nyimpari küsü peh, ma nyo thuoüji Saul, ma tü küviza kügahla nyi küsü. Israel nyiri azavü nyi küsü nga ma üta kügahla münyie; ma safü vünüh wiehvü ma tü anyi küpari nyiehvüsuokruo.

³Thinü Kish rawuhri tü, thi Saul apa tü kümiem. Jükenüh Kish nüh ma tsa Saul vü, “Sieperi küsü sie luo, thi sühra nü wa arawuhri noluo,” ti küza.

⁴Jüti küüzavü mari tü Efraim küzhiho nyuri vü thi Shalisha zhih vü tsewa, thitü jümari mphahra nüh sam. Thinü mari tü Shalim azhih vü wa, thitü jümari tü jüla nga münyie nüh sam. Jüsevü nga mari tü Benjamin zhih vü phah wa, thitü müngura nüh sam.

⁵Jüsevü mari tü Zuf azhih vü ru ünü Saul nüh ma se nyikütse siepewa vü, “Ra, eh pa tü arawuhri kenüh luoveh mütsaza nüh hisü kenüh luoveh küna sapehla nathuoh ünüh,” ti küza.

⁶Thitü ma nüh ma vü, “Halie, anyuji hala Saküüwuowa nyi küsüpehveh, thi ma tü küchiekürhe küvüri küsü, ma nüh küüza aveh tü kheta rushushuti. Hisü jüla wa ünüh raluo; hisü khiela tseküwale nüh ma nüh küzara mhieveh ünüh,” ti küza.

⁷Thinü Saul nüh ma siepewa vü, “Thitü mükütüküzü hisü nüh wa wie ketünga anyiwa vü mowa viwa na lo? küpakenühnyunü alohse hisü awe lovü kütüri tü münyithuoh, thi Saküüwuowa nyiwa vü aküte viwa na küsa münyie luo. Hisü tü mowa pehveh lo?” ti küza.

⁸Siepewa nüh Saul rüle le taji, “Hala, hi vü rakasa küüsuo müzü sanü küsü pehveh, tinü hisü lehkhujiwa küüza na küsa kenüh hi nüh hama vi Saküüwuowa nyiwa vü tsü naveh ünüh,” ti küza.

⁹(Khanavü Israel vü nyi küsü nüh wa nü Saküüwuowa vünüh zanyo kürü nta thuoüji ma nüh, “Ra, kürü setsazhüküphrawa vü wanüh,” ti sasati, küpakenühnyunü khinyi setsaküthsüri ta küjiritü setsazhüküphrawa ta küjila kenüh).

¹⁰Thinü Saul nüh ma siepewa vü, “Nyieluo; raluo, wa ünüh raluo,” ti küza. Jükenüh masü tü Saküüwuowa nyiwa küpehpe anyujiwa vü wa.

¹¹Masü nüh anyujiwa küzhiho vü kükhru vü masü tü rülavürünguori ajuh tie nta shuküru mütu nü mari vü, “Setsazhüküphrawa tü hala pehveh ülo?” ti küna.

¹²Thinü mari nüh, “Ma pehveh; halie, ma tü nohsü atüvü pehveh. Shiti waluo, ma tü khintü nüh anyujiwa vü rupehveh ünüh, küpakenühnyunü nosü anyiri nüh azhie kümsiewa rügi vünüh küsahthuo küpeh kenüh.

¹³Nohsü nüh anyujiwa vü tuthuoüji ma zhie küzhiho vünüh ashie tsa nta müjie tekükhru vünüh ma ngura naveh, küpakenühnyunü ma müjieküru küju anyiri tü ashiekütsawa nyu, ma nüh küsahthuowa tsiamütsü üji mükümhie kenüh; jüsevü nüh jike küsari tü tsanaveh. Khinyi khru luo, küpakenühnyunü nohri tü khinyikhinyi ma siemtura naküveh kenüh,” ti küza.

¹⁴Jükenüh mari tü anyujiwa vü wa. Masü tü anyujiwa vü tsetu ünü masü tü Samuel azhie kümsiewa vü wa nti kütse lehkhuji mariwuovü kütse ngu.

¹⁵Jüti küsa vü Saul müjie küru rülo atüvü VÜWA nüh Samuel vü kütsakütsü sataji:

¹⁶Thuohtü hama tsothovü Benjamin azhih vünüh anyi küsü noh vü küze naveh, tinü ma tü eh nyi Israelri nyiehvü kajitsa küsana küsa kenüh noh nüh ma thse naveh. Filistinra ke vünüh ma nüh eh nyiri küülole naveh; küpakenühnyunü mari küzie tü hi vü teruthuoh, thi hi nüh eh nyiri kümnomna ngukümthuoh kenüh, ti küza.

¹⁷Samuel nüh Saul künguvü VÜWA nüh ma vü, “Hi nüh noh vü küüza anyiwa tü hala tsethuoh! Eh nyiri nyiehvü takrü sana küsawa tü mathuoh ünüh,” ti küza.

¹⁸Jüti küsa vü Saul tü akheri vü Samuel vü tsekewa nü, “Setsazhüküphrawa zheh khiela pehveh ünüh hi vü raküza jie,” ti khuo.

¹⁹Samuel nüh Saul vü, “Hi tü setsazhükü phrawathuoh, tinü eh tüvü azhie kümsiewa vü khru luo, küpakenühnyunü nosü noh tü hi vü ashienyitsanaveh, thi arüne vü hi nüh noh küze nü noh luoveh vüpehküveh aveh noh vü küza kheh naveh.

²⁰Rülo küche tüvü noh rawuh kümiekümri thuoüji noh luoveh jülamüthse tüm, küpakenühnyunü jümari tü ngurathuoh. Israelri vü kümngu aveh tü thawa kenüh lo? Jümatü noh kenüh thi noh pa zhehlori aveh kenüh nyu ülo?” ti rületsü.

²¹Saul nüh, “Hi tü Israel vü akuohri azhievü nüh aküzahtsawa Benjaminri vünüh nyu ülo? Thi Benjamin kuoh tharuo aveh vü ehtharuo nüh küzahtsawa nyu ülo? Thinü noh tü mokenüh hi vü hakümjie vünüh küzaveh lo?” ti rületsü.

²²Jüti küsa vü Samuel nüh Saul thi ma siepewa sie taji azhehwa lo vü runü jiküsari azhievü ape atütsawa tsü, jüla küpehri tü anyicherake kümjie pehveh.

²³Thinü Samuel nüh ashieküshuwa vü, “Hi nüh noh vü kütsü, hi nüh noh vü küüza suohpewa viru nü anato vü saluo,” ti küza.

²⁴Jüti küüza vü ashieküshuwa nüh ajih thi jüma nyieh vü küpehri vinü Saul tüvü sa; thi Samuel nüh, “Noluo, mowa saveh ünüh vi noh tüvü savehthuoh ünüh. Tsaluo; küpakenühnyunü jüma tü noh nüh küzehri siekütsa nta tsotho küteküsawa küju noh kenüh saküveh kenüh,” ti küza.

²⁵Jükenüh jüma rülo vü Saul tü Samuel sie ashietsa. Jüti sanü mari tü azhie kümsiewa vünüh anyujiwa vü tu ünü aluomuo rügivü Saul kenüh aze shiesala nü ma tü zeh nti küchuotsuo.

²⁶Thinü arüne thohrieru ünü luomuo rügi vünüh Samuel nüh Saul ji taji, “Sühraluo, hi nüh noh letsewa saküze nathuoh ünüh,” ti küza. Jükenüh Saul tü sühra, thinü ma thi Samuel masü tü lehkhuji vü tsewa.

²⁷Jüti sanü masü tü anyujiwa nato vü tsejuo ünü Samuel nüh Saul vü, “Siepewa tü hisü tüvü tsetewa üti küza luo, thi ma nüh tsetewa thuoüji hi nüh Saküüwuowa zhü vi noh vü saküüthsü na küsa kenüh noh mpa nüh hala pike tsiela luo,” ti küza.