Read Pohnpeian Senesis 11 Bible Online

Senesis 11 - Pohnpeian bible

Senesis 11

¹Nin tapio, tohn sampah koaros ahnekipene soangen mahsenteieu, pwe re kin doadoahngki soangen lepin mahsen kan me duwepenehte wasa koaros.

²Ni ar mwekimwekidlahng palimese, re ahpw lel wasa patapat kis nan Papilonia, wasa re kousoanla ie.

³Irail eri ndapene nanpwungarail, “Nna, kitail umwunda pwehl oh wiahkihda lepin takai.” Eri, re ahpw wiahda lepin takai pwehl, mehn kou ihmw, oh pil onopada tahr, mehn kapasapene takai ko.

⁴Irail ahpw nda, “Eri, met kitail wiahda ehu kahnimw, oh ehu imwen doulik, me imwi pahn leldalahng pahnlahng, pwe kitail en ndandla oh dehr mwarahkpeseng wasa kan nin sampah.”

⁵KAUN-O eri ketidi pwe en mahsanih kahnimwo oh imwen douliko me aramas ako kauwadahr.

⁶E ahpw mahsanih, “Eri, aramas pwukat koaros wiahki ehu, oh re kin lokaiahki lokaiateieu; met iei tepin me re pahn wiewia kohwei. Mwurin met re pahn mwadangete kak wiahda soahng koaros me re anahne.

⁷Eri, kitail kohdihwei oh kapingada ar lokaia, pwe re en dehr wehwehkipene ar lokaia kan.”

⁸KAUN-O eri ketin kalipeihrpeseng ong wasa koaros nin sampah. Irail eri tokedihsang ar wiewia kahnimwo.

⁹Kahnimwo adaneki Papilon, pwehki iei wasao me KAUN-O ketin kapingada lokaiahn aramas koaros, oh sang wasao me e ketin kalipeihrpeseng ong wasa koaros nin sampah.

¹⁰Iet kadaudok en Sehm kan. Sounpar riau mwurin nohlik lapalapo, ni Sehm eh sounpar 100, e nainekihda pwutak emen, ede Arpaksad.

¹¹Mwuri, e ahpw pil momourki sounpar 500 oh nainekihda pil seri kei.

¹²Ni Arpaksad eh sounpar 35, e nainekihda pwutak emen, ede Sela;

¹³mwuri, e momourki sounpar 403 oh nainekihda pil seri kei.

¹⁴Ni Sela eh sounpar 30, e nainekihda pwutak emen, ede Eper;

¹⁵mwuri, e ahpw pil momourki sounpar 403 oh nainekihda pil seri kei.

¹⁶Ni Eper eh sounpar 34, e nainekihda pwutak emen, ede Pelek;

¹⁷mwuri, e ahpw momourki sounpar 430 oh nainekihda pil seri kei.

¹⁸Ni Pelek eh sounpar 30, e nainekihda pwutak emen, ede Reu;

¹⁹mwuri, e ahpw pil momourki sounpar 209 oh nainekihda pil seri kei.

²⁰Ni Reu eh sounpar 32, e nainekihda pwutak emen, ede Seruk;

²¹mwuri, e ahpw pil momourki sounpar 207 oh nainekihda pil seri kei.

²²Ni Seruk eh sounpar 30, e nainekihda pwutak emen, ede Nahor;

²³mwuri, e ahpw pil momourki sounpar 200 oh nainekihda pil seri kei.

²⁴Ni Nahor eh sounpar 29, e nainekihda pwutak emen, ede Tera;

²⁵mwuri, e ahpw pil momourki sounpar 119 oh nainekihda pil seri kei.

²⁶Mwurin Tera eh sounpar 70, e nainekihda Eipram, Nahor, oh Aran.

²⁷Iet kadaudok en Tera kan: Tera semen Eipram, Nahor oh Aran. Aran semen Lohd.

²⁸Eri, Aran mehla nan uhdakeo, Ur nan Papilonia, nindokon eh pahpao eh momourte.

²⁹Aran semen Iska oh pil serepein men, Milka, en Nahor eh pwoud; oh Eipram pwoudikihda Sarai.

³⁰Sohte nein Sarai seri, pwehki ih lih depwen men.

³¹Tera eri kahrehda nah pwutak Eipram, oh Lohd nein Aran, rien Eipram ohl, oh Sarai, en Eipram eh pwoud; irail koaros ahpw mweselsang Ur, kahnimw en Papilonia, pwe re en kolahng Kenan. Irail ahpw lel kahnimw Aran, wasa re kousoanla ie.

³²Tera sipalla wasao ni eh sounpar 205.