Read Pohnpeian Senesis 23 Bible Online

Senesis 23 - Pohnpeian bible

Senesis 23

¹Sara momourki sounpar 127.

²E ahpw mehla nan Epron, nan Kenan; Eipraam ahpw mwahieiki eh mehlao.

³E ahpw ketila sang wasa me paliweren eh pwoud wie wonohn ie oh ketila rehn mehn Id ko, oh mahsanihong irail,

⁴“Ngehi mehn liki men me patopato rehmwail; kumwail menlau netikidohng ie wasa kis, me I kak nekidedi ie ei pwoudo.”

⁵Re ahpw sapengki,

⁶“Maing, komw karongei kiht mahs. Se patohwan wiahkin komwi ohl lapalap oh manaman emen; komw ketin nekidedi omwi pwoud nan wasa keieu mwahu me mie reht. Kiht koaros pahn perenki patohwanohng komwi sousou ehu, pwe komwi en nekidedi ie omwi pwoudo.”

⁷Eipraham ahpw poaridi mwohrail

⁸oh mahsanih, “Ma kumwail kupwure pwe I en nekidedi ei pwoud wasaht, a kumwail menlau peki rehn Epron nein Sohar

⁹pwe en netikihong ie poaren paip Makpela, me mihte ni keilen sahpweo. Kumwail peki reh pwe en netikihong ie uwen pweinen sahpwo unsek, met, mwohmwail, pwe I en kak sapwenikihla oh wiahkihla ei wasahn sousou.”

¹⁰Pein Epron iang patopato rehn mehn Id ko ni ewen kehl wasahn tuhpene en aramas; ih eri sapeng mwohn aramas koaros wasao,

¹¹“Maing, komw karonge mahs; I pahn patohwanohng komwi sahpwo pwon iangahki poaren paip me mihmi ieo. Met mwohn nei aramas akan, I pahn patohwanohng komwi, pwe komwi en kak nekidedi ie omwi pwoudo.”

¹²Eipraam eri poaridi mwohn mehn Id ko

¹³oh mahsanihalahng Epron, pwe koaros en kak rong, “Eri, I peki rehmwi komwi menlau karonge ie. I pahn pwainda sahpwo pwon, komw ale pweineht, eri I pahn sarepidi ei pwoudo wasao.”

¹⁴A Epron sapengki,

¹⁵“Maing, sahpwo me komw men ale pahn pweipweiki sekel pahpwiki en silper-dahme mie nanpwungata? Eri komw nekidedi omwi pwoudo wasao.”

¹⁶Eipraam eri pwungkihda oh teneki uwen pweipwei me Epron patohwanda mwohn pokono-sekel silper pahpwiki, nin duwen pweipwei me kin wiawi rehn sounnetinet kan.

¹⁷Ih duwen met sahpw me uhdahn sapwen Epron nan Makpela palimesehn Mamre, eh wiahla sapwen Eipraam. Met iangahki sahpwo, poaren paipo, oh tuhke koaros me mi loale.

¹⁸Mehn Id koaros me iang mihmi wasao ahpw kileledier me uhdahn sapwen Eipraam wasao.

¹⁹Eipraam ahpw nekidedi eh pwoud Sara nan poaren paip me mi nan sahpwo nan Kenan.

²⁰Eri sapwen mehn Id ko, oh poaren paipo me mi loale, ahpw wiahla en Eipraam eh wasahn sarepedi me melahr akan.