Read Pohnpeian Senesis 7 Bible Online

Senesis 7 - Pohnpeian bible

Senesis 7

¹KAUN-O ahpw mahsanihong Noha, “Pedolong nan warihmwen, iangahki omw peneinei koaros; pwe kowehte rehn aramas pwukat me I diarada me kin wia dahme pwung.

²Sehrehlong pwopwoud en mahn wad isuh sang ni soangen mahn mwakelekel koaros, ahpw pwopwoud wad ehu sang ni soangen mahn samin . koaros.

³Pil sehrehlong pwopwoud en menpihr wad isuh sang ni soangen menpihr kan koaros. Ke pahn wia met pwe soangen mahn oh menpihr koaros en mourla, pwe re en kak pwurehng kaparaparala nin sampah.

⁴Pwe mwurin rahn isuhte I pahn tapihada kamwerediong pohn sampah keteu me pahn mweremwer erein rahn pahisek oh pwohng pahisek, pwe en kamwomwala soahng mour koaros me I wiadahr.”

⁵Noha eri kapwaiada mehkoaros me KAUN-O ketin mahsanih.

⁶Noha mahkiher sounpar 600 ahnsou me nohlik lapalap lelohng sampah.

⁷Ih, eh pwoudo, nah pwutak ko, oh ar pwoud kan eri pedolong nan warihmwo pwe re en pitsang nohlik lapalapo.

⁸Soangen mahn oh menpihr koaros ohl oh lih, me mwakelekel oh samin,

⁹re pil iang Noha pedolong nan warihmwo, duwen me Koht ketin mahsanih.

¹⁰Mwurin rahn isuh nohlik lapalapo ahpw lel sampah.

¹¹Ni Noha eh sounpar 600, ni eisek isuhn Mei, keriaun sounpwong, pwarer koaros me mi pahn madau lapalap akan en sampah kakusada audeparail, oh pahnlahng likamwete e pwoarpeseng pwe en kakusedi pile kan.

¹²Eri, keteu ahpw mweremwerki rahn pahisek oh pwohng pahisek.

¹³Rahnohte Noha oh eh pwoudo, nah pwutak silimen, Sehm, Ahm oh Saped, iangahki ar pwoud kan, re ahpw pedolong nan warihmwo.

¹⁴Soangen mahn akan koaros, mahn lawalo oh mahn mand, mahn laud oh tikitik, oh pil soangen menpihr kan koaros, pil iang irail pedolong.

¹⁵Ohl oh lih sang ni soangen mahn oh menpihr koaros, re pil iang Noha pedolong nan warihmwo,

¹⁶duwen me Koht ketin mahsanih. KAUN-O eri ketin ritingedi wenihmwen warihmwo sang liki.

¹⁷Nohlik lapalapo ahpw wiewiawihki rahn pahisek, oh pihl kan lalaudlahte lao kapehda warihmwo sang nanpwel.

¹⁸Pihlo inenen loalada mehlel, me kahrehda warihmwo peipeiseli powe.

¹⁹Pihlo ahpw kohkohda oh koaduhpwaldi nahna me keieu ileile kan;

²⁰e ahpw pil sikdahsang kumwen nahna ileile kan piht 25.

²¹Soahng koaros me momour nin sampah ahpw mehla-menpihr kan, mahn akan, oh aramas akan koaros.

²²Soahng koaros me momour nin sampah mehla.

²³KAUN-O ketin kamwomwala soahng momour koaros nin sampah- aramas akan, mahn akan, oh menpihr kan. Ihte me luhwe Noha oh irail ko me iang pedolong nan warihmwo.

²⁴Pihl akan eri mihmihte oh lalaudlahte pohn sampah erein rahn 150.