Read Pohnpeian Senesis 9 Bible Online

Senesis 9 - Pohnpeian bible

Senesis 9

¹Koht ahpw ketin kupwuramwahwihki Noha oh nah pwutak ko mahsen wet: “Kumwail kaparaparala pwe kadaudokamwail kan en kousoanla wasa koaros nin sampah.

²Mahn koaros en sampah, iangahki menpihr kan oh mwahmw akan, pahn lammwikin kumwail. Koaros pahn mi pahn amwail manaman.

³Kumwail kak tungoale soahng me momour koaros oh pil tuhke koaros. I kihong kumwail koaros pwe kumwail en wiahki amwail mehn tungoal.

⁴Ihte me kumwail sohte pahn tungoalehn: uduk me mie nta, I sohte mweidada pwehki mour mi nan nta.

⁵Mehmen me pahn kihsang amwail mour, I pahn kalokehki mehla, oh I pahn kauwehla mahn emen me pahn kemeikumwailla.

⁶Mehmen me pahn kemehla aramas, e pahn kamakamala rehn aramas; pwe aramas wiawihda rasehng Koht.

⁷“Kumwail eri kaparaparala pwe kadaudokamwail kan en tohtohla oh kousoanla wasa koaros nin sampah.”

⁸Koht pil mahsanihong Noha oh nah pwutak ko,

⁹“Eri, met I pahn kauwada ei inou rehmwail oh rehn kadaudokamwail kan,

¹⁰oh pil rehn mahn mour koaros me mi rehmwail-menpihr kan oh mahn akan-oh mehkoaros me kohieisang nan warihmwo.

¹¹Eri, iet audepen ei inou en: I inoukihda me I solahr pahn pwurehng kauwekihla nohlik lapalap soahng me momour kan nin sampah. Solahr pil ehu nohlik lapalap pahn wiawi pwe en kauwehla sampah.

¹²Eri, iet kilel poatopoat en ei inou ong kumwail oh ong soahng me momour kan koaros:

¹³ahia pwoat me I padokadahng nan depwek kan. Ih me pahn wia kilel en ei inou ong sampah.

¹⁴Ahnsou koaros me I pahn kapwarehda depwek pohn sampah oh ahia pwoat pahn sansal nan depwek kan,

¹⁵I pahn kin tamanda ei inou ong kumwail oh ong mahn akan koaros, duwen nohlik lapalap eh solahr pahn wiawi pwe en kauwehla soahng me momour kan koaros nin sampah.

¹⁶Eri, ni ahia eh pahn kin pwarada nan depwek kan, I pahn kin kilang oh tamanda inou poatopoat wet me mie nanpwungen ngehi oh soahng me momour kan koaros nin sampah.”

¹⁷Koht ahpw pil mahsanihong Noha, “Ih met kilel en inou me I padokadahr nanpwungen ngehi oh soahng me momour kan koaros nin sampah.”

¹⁸Nein Noha ko me iang kohieisang nan warihmwo, iei Sehm, Ahm (semen Kenan), oh Saped.

¹⁹Nein Noha pwukat silimen iei irail me semen aramas koaros nin sampah.

²⁰Noha, ohlen wia sapwasapw men. Ih me tepin wiahda mwetuwel en wain ehu.

²¹Mwurin eh tungoale wain en eh mwetuwelo, e ahpw sakaula mehlel oh kilisouda wendiong nan imwe impwalo.

²²Eri, Ahm, semen Kenan, ni eh kilangada duwen semeo eh kilisou, e ahpw kohla oh padahkihong rie ko, Sehm oh Saped.

²³Sehm oh Saped eri ale likou reirei ehu, kidahng pohn pwopwara oh kahsekirla nan impwalo oh pwaindi samarao. Masara ko sohsohpeisangete pwe ira dehr kilang samarao ni eh kilisou.

²⁴Ni waino eh sarada oh Noha eri esehda dahme nah me tikitiko wiahiong,

²⁵e ahpw patohwan, “Kenan en riahla! E pahn wiahla lidun rie kan.

²⁶Kaping ong KAUN-O, Koht en Sehm! Kenan pahn wiahla lidun Sehm.

²⁷Koht en ketin kaparahla Saped! Kadaudoke kan en kousoanla rehn nein Sehm kan! Kenan pahn wiahla lidun Saped.”

²⁸Eri, mwurin nohlik lapalapo, Noha pil momourki sounpar 350.

²⁹E ahpw sipalla ni eh sounpar 950.