Read Pohnpeian 2 Samuel 1 Bible Online

2 Samuel 1 - Pohnpeian bible

2 Samuel 1

¹Eri, mwurin Sohl eh sipalla, Depit ahpw pwurodo sang eh kalowehdi mehn Amalek ko oh mihmihki Siklak rahn riau.

²Manda sang rahno, mwahnakapw emen ahpw leledo sang nan kahnimpwal en Sohl. Pwe en kasalehda uwen eh nsensuwed, e tehrpeseng likou me e likawi ko oh kamwerehdiong pwehl pohn moange. E ahpw kohla rehn Depit, poaridiong nanpwel oh rahnmwahwih.

³Depit ahpw idek reh, “Ke kohsang ia?” A e sapengki, “I tangasang nan kahnimpwal en mehn Israel ko.”

⁴A Depit ahpw idek, “Dah rong?” A e sapeng, “At karis kan tangasang nan mahweno, oh nait sounpei tohto pil kamakamalahr, Sohl oh Sonadan pil kamakamalahr.’

⁵Depit ahpw idek, “Dahme ke esehki me Sohl oh Sonadan sipallahr?”

⁶A e sapengki, “Ahnsou me I mihmi nin Nahna Kilpoa, I kilangada Sohl eh ireirekengki sapwellime ketieuwo, a werennansapw ko oh soundake oahs akan en at imwintihti ko kerekerendohng.

⁷Sohl eri ketin pirekekte mahsanihiehda, e ahpw malipe ie. I ahpw sapeng, patohwan, ‘Iet ngehi, maing!’

⁸E ahpw keinemwe ihs ngehi. Ngehi eri patohwanohng me mehn Amalek men ngehi.

⁹A e ahpw mahsanih, ‘I lellelehr oh I pahn melahr. Keido met oh kemeiehla.’

¹⁰Ngehi eri keilahngete mpe, kadauluhlla; pwe I ese me e pahn sipallahr. Ngehi eri ale nihn me mi pohn tapwio oh luwow me mi nin limeo, eri, iet I patohwandohng komwi, maing.”

¹¹Depit eri kidahngete peh ko ni eh likou ko, tehrpeseng, uwen eh nsensuwed; oh ienge koaros pil iang tehrpeseng ar likou ko.

¹²Re ahpw mwahieiki Sohl oh Sonadan oh pil mehn Israel ko, sapwellimen KAUN-O ko. Re ahpw kaisihsol lao lel nipwong, pwehki me ngeder rehrail me kamakamala nan mahweno.

¹³Depit ahpw pil idek rehn mwahnakapw me wadohng pakairo, “Mehnia men kowe?” A e sapeng, “Ngehi mehn Amalek, ahpw I kin kousoan nan omwi wehi.”

¹⁴Depit ahpw idek, “A dahme ke nohn kapehd loallapki oh kemehla sapwellimen KAUN-O nanmwarki me pilipildahr?”

¹⁵Depit eri malipehdo emen nah sounpei ko oh padahkihong, “Kemehla lahp menet!” Ohlo eri uhdahte pele mehn Amaleko oh kemehla.

¹⁶Eri, Depit ahpw ndaiong mehn Amaleko, “Kowe me pein kahrehiong uhk met. Ke pein kadeikuhdada ni omw kasalehda me ke kemehla ih me KAUN-O ketin pilada en nanmwarki.”

¹⁷Eri, iei kedepwidepw en Sohl oh sapwellime pwutak Sonadan me Depit wiahda

¹⁸oh koasoanehdi pwe aramas en Suda kan en padahngki. (Koul pwoatet ntingdier nan Pwuken Sasar.) Eri, iet duwe:

¹⁹“Pohn nahna kan en Israel atail kaun akan melahr! Neitail sounpei keieu kommwad akan pwupwudier!

²⁰Kaleke kumwail mweseiseikihong mehn Kad, de pakairkiseli nanial en Askelon. Kaleke pwe kumwail de kahrehiong lihen Pilisdia kan ar perenkihda, oh serepein rotorot kan de ngisingiski ar peren.

²¹“Keteu oh pwoaiken lahng en sohla kalamwuri dohlen Kilpoa kan; mohsen Kilpoa kan en tehnla wiahla sapwtehn ahnsou koaros. Pwe iei wasa ko me men sansar en nait sounpei kommwad ko lekdeklahr ie; iei wasao me sapwellimen Sohl mehn sansar wonohn oh merlahr ie.

²²Nein Sonadan kesik ketieu kin kemehla eh imwitihti kan; sapwellimen Sohl kedlahs sohte mwahn kin pir mwahl; pwe e kin pelehdi me lapalap akan oh kemehla sapwellime imwintihti kan.

²³“Sohl oh Sonadan, ira koaros me kupwurkalahngan oh kapwuriamwei, ni ara mour oh pil ni ara mehla; ira koaros marahra sang ikel, ira koaros kehlailasang laion.

²⁴“Kumwail lihen Israel kan, kumwail mwahieiki Sohl! E ketin kalikawihekin kumwail likou kaselel oh weitahta, e ketin kapwatahkin kumwail elin kapwat en takai kesempwal oh kohl.

²⁵“Neitail sounpei kommwad akan pwupwudier; re kamakamalahr nan mahwen. Sonadan melahr, wonohn pohn nahna kan.

²⁶“Sonadan riei kompoakepahi, pilen mesei kat kin kerekerekinuhk; ia uwen ei poakepoakeiuk kowahlap! Ia uwen omwi kin poakepoake ie, soangen limpoak me siksang mehlel limpoak en lih!

²⁷“Neitail sounpei keieu kommwad akan pwupwudier; solahr katepen neirail tehtehn mahwen kan.”