Read Pohnpeian 2 Samuel 22 Bible Online

2 Samuel 22 - Pohnpeian bible

2 Samuel 22

¹Iet koul me Depit ketin koulkihong KAUN-O ni rahn me e ketin kapitasang ih Sohl oh sapwellime imwintihti teiko:

²KAUN-O me silepei; ih me kelepei kehlail.

³Ei Koht me silepei, I kin nekinek mwahu pahn kupwure. E kin ketin pereiehla duwehte mehn sansar ehu; e kin ketin doareiehla oh kin ketin nekinekid ie. Ih me ei sounkomour; e kin ketin apwahpwalih ie oh sinsile ie sang me suwed.

⁴I kin likweriong KAUN-O, e ahpw kin ketin doareiesang ei imwintihti kan. Kapinga KAUN-O!

⁵Iloak en mehla lelieier, iloak en meninkauwo koaduhpwalihiedier.

⁶Keper en mehla lelieier; oh sousou lidipiedier.

⁷Nan ei apwal I ahpw likweriong KAUN-O; I likwerih ei Koht pwe en ketin sewese ie. E ahpw ketin karonge ngilei nan tehnpese; e karongeier ei likwer en pek sawas.

⁸Sampah eri rerada oh itikekda; poahsoan en lahng ahpw mwekidida oh rerada, pwehki Koht ketin engiengdahr!

⁹Ediniei kusieisang nan sapwellime keinuhnu, mpwulen kisiniei oh mwoalus sang nan doauase.

¹⁰E ketin ritingada pahnlahng oh ketidihdo ket pohn depwek toantoal ehu.

¹¹E ketin pihrdi ket pohn kerup kei, e ketin pihrki pehnpihr en kisinieng.

¹²E ketin perehkihla pein ih rotorot; depwek mosul kei, me diren pihl, kapilpene ih;

¹³mwoalus mwehl pil kin lulda sang ni lioal mwowe.

¹⁴KAUN-O eri ketin kapitie laudida rasehng ngirisek en nansapwe sang pahnlahng; kapitien Koht Wasa Lapalap ahpw sansalada.

¹⁵E ahpw ketin kadar sapwellime arep ko oh katangapeseng sapwellime imwintihti ko; e ahpw ketin pwakihkinirailla piripir en sapwellime lioal.

¹⁶Nan kepin madau sansalada, oh poahsoan en sampah kan iang pwarada, ni ahnsou me KAUN-O ketin angiangihada sapwellime imwintihti kan, oh kapitie laudida nan sapwellime engieng.

¹⁷KAUN-O ahpw ketin kapahdihdo lime sang nanleng oh ketin koliehda; oh ketin waikiehda sang nan kepin madau.

¹⁸E ketin kapitiesang ei imwintihti kan, oh sang irail koaros me kin kailongkin ie-% re me nohn kehlail sang ie.

¹⁹Re mahweniong ie ni ahnsou me I mihla nan apwal, ahpw KAUN-O ketin sileiehdi.

²⁰E ketin seweseiehda nan ei apwal; e ketin doareiehla pwehki eh kupwurperenkin ie.

²¹KAUN-O ketin katingih ie pwehki ei kin wia dahme pwung; e kin kupwuramwahwih ie pwehki eh sohte dipei.

²²I peikiong kosonned en KAUN-O; I sohte sohpeisang ei Koht.

²³I kapwaiada sapwellime kosonned kan koaros; I sohte kauwehla sapwellime mahsen kan.

²⁴E mwahngih duwen ei mwakelekel, duwen ei kin kadohwansang ie wiewia sapwung kan.

²⁵Iei me e ketin katingih kin ie pwehki ei kin wia dahme pwung, pwe e ketin mwahngih duwen eh sohte dipei.

²⁶Maing KAUN, komwi kin ketin loalopwoat ong irail kan me kin loalopwoat ong komwi; komwi kin ketin kupwur mwahu ong irail kan me kin unsek.

²⁷Komw kin kupwur mwakelekel ong irail kan me kin mwakelekel, ahpw kin kupwur toutou ong me suwed kan.

²⁸Komw kin ketin doarehla me aktikitik kan, oh kin ketin katikitikihala me aklapalap akan.

²⁹Maing KAUN, komwi me kamarainpei; komwi ketin kasarehsang ei rotorot.

³⁰Komw ketin kakehleiehda pwe I en mahweniong ei imwintihti kan oh ketikihong ie manaman pwe I en kak powehdi arail kelen mahwen kan.

³¹Koht menet-ia uwen deilahn wiepen nin lime kan, ia uwen likilik en sapwellime mahsen kan! E rasehng mehn sansar ehu ong irail kan me kin rapahki sileparail reh.

³²KAUN-O kelehpw me Koht; Koht kelehpw me soundoarepatail.

³³Koht menet, iei kelepei, e kin ketin sinile elei kan sang apwal akan.

³⁴E ketikihong ie nehi kat en marahra duwehte tie; e kin ketin sinsile ie pohn nahna kan.

³⁵E ketin kaiahneiedahng ni mahwen, pwe I en kak doadoahngki kesik ketieu me keieu kelail.

³⁶Maing KAUN, komw kin ketin sinsile ie oh doandoare ie; sapwellimomwi sawas me kin kalinganeiehla.

³⁷Komwi me ketin sileiehdi pwe I en dehr lohdi, oh I sohte mwahn pwupwudi.

³⁸I patohwan pwakihier ei imwintihti kan oh koliraildi; I sohte kin tokedi I lao kamwomwirailla.

³⁹I keseiraildi, re ahpw sohla kak uhda; re wonohnehr nanpwel mwohn mesei kat.

⁴⁰Komwi me ketin kakehleiehda pwe I en kak mahwen oh ketikihong ie I en powehdi ei imwintihti kan.

⁴¹Komwi me ketin kupwurehda ei imwintihti kan pwe re en kin tangasang ie; I kamwomwala irail kan me kin kailongkin ie.

⁴²Re kin repensawasseli, ahpw sohte emen me kin doareirailla; re kin likweriong KAUN-O, ahpw e sohte kin ketin sapeng irail.

⁴³I tiakirailpeseng, re ahpw duwehla pwelpar; I kin sok pohrail rasehng ei kin sok nan pwelmatak en nanial akan.

⁴⁴Komwi ketin doareiesang nei aramas kahngohdi kan komwi ketin koasoanehdi I en kaunda wehi kan; aramas ekei me I sohte ese, met wialahr ei ladu.

⁴⁵Mehn liki kan kin poaridi mwohi; ni ar kin rong ngilei, re kin peikiong.

⁴⁶Re kin nan kapehd tikitikla oh rerrer kohieisang nan arail kelen mahwen kan.

⁴⁷KAUN-O ketin ieias! Kaping ong ei soundoar! Kumwail lohkiseli roson en Koht me ketin doareielahr!

⁴⁸Ih me ketin kupwurehda I en powehdi ei imwintihti kan; ih me ketin kalowehdiong wehi kan pahn ei manaman

⁴⁹oh ketin doareiesang ei imwintihti kan. 1 Maing KAUN, komwi me kin ketin kupwure ie pwe I en powehdi ei imwintihti kan, oh ketin silehsang ie aramas lemei kan.

⁵⁰I pahn kapinga komwi nanpwungen wehi kan; I pahn kokoulkihong komwi koulen kaping.

⁵¹Koht ketikihong sapwellime nanmwarkio en kin powehdi; e ketin kasalehda sapwellime limpoak poatopoat ong me e ketin piladahro, ong Depit oh kadaudoke kan kohkohlahte.