Read Pohnpeian Nehmaia 3 Bible Online

Nehmaia 3 - Pohnpeian bible

Nehmaia 3

¹Iet duwen kelen kahnimwo eh onohnda sapahl. . Samworo Lapalap Eliasip oh ienge samworo ko onehda sapahl Ewen Kelen Sihpw, kasarawihala, oh patohwanohng wenihmw kan ie. Re kasarawihala kehlo lellahng Wasahn Iroir en Epwikio oh Wasahn Iroir en Ananel.

²Ohl akan en Seriko peusehla. Sakur nein Imri me uhd peusehlahsang.

³Peneineien Assena kauwada Ewen Kelen Mwahmw. Re kidahng doakoaloal kan oh wenihmw kan, oh patohwanohng loak kan oh metehn katengehdi wenihmwo.

⁴Meremod, nein Uraia me eh pahpa kahlap Akkos, me peusehla. Mesullam, nein Perekaia me eh pahpa kahlap Mesesapel, me peusehlahsang. Sadok nein Paana pil peusehlahsang.

⁵Ohl akan en Tekoa kauwada peuspeo, ahpw kaun akan en kahnimwo sohte men iang wisik takai ong ni doadoahk me kileldiong irail sang irail kan me kakaun doadoahko.

⁶Soiada nein Pasea oh Mesullam nein Pesodeia onehda sapahl Ewen Kelen Sesana. Re kihong tuhke kan oh wenihmw kan, oh kihong loak oh metehn katengehdi wenihmwo.

⁷Melataia mehn Kipeon, Sadon mehn Meronod, oh ohl akan en Kipeon oh Mispa me peusehla lellahng wasa me kepinahn Palikapi-en-Iupreitis kin koukousoan ie.

⁸Ussiel nein Araia, sounsuk kohl men, me peusehlahsang. Ananaia, sounwia lehn wai men, me kauwada peuspeo lellahng ni kehl me adaneki Tehlap.

⁹Repaia nein Hur, kaunen apali wehin Serusalem, me peusehlahsang.

¹⁰Sedaia nein Arumap pil peusehlahsang, wasao karanih imweo. Addus nein Asapneia peusehlahsang.

¹¹Malkaisa nein Arim oh Assup nein Pahad Mohap peusehla oh pil kauwada Wasahn Iroir en Uhmw kan.

¹²Sallum nein Alloes, kaunen apalien wehin Serusalem, me peusehla. (Nah serepein ko iang sewese doadoahko.)

¹³Anun oh tohn kahnimw Sanoa onehda sapahl Ewen Kelen Wahu. Re kihong wenihmw kan, kihong loak oh metehn katengehdi wenihmwo, oh onehda kehlo ni piht kid limepwiki lellahng ni Ewen Kelen Kihd.

¹⁴Malkaisa nein Rekap, kaunen kahnimw Ped Akkerem, me onehda sapahl Ewen Kelen Kihd. E kihong wenihmw kan, oh kihong loak oh metehn katengehdi wenihmwo.

¹⁵Sallum nein Kolose, kaunen wehin Mispa, onehda sapahl Poahsoan en Ewen Kehlo. E didihada ewen kehlo, kihong wenihmw, oh kihong katengpe oh mete. Ni Pwarer en Sela e kauwada kehlo peian sapwellimen nanmwarki mwetuwelo, lellahng ni kehndake en doudihsang ni Kahnimw en Depit.

¹⁶Nehmaia nein Aspuk, kaunen apalien kahnimw Pedsur, me peusehla lellahng ni sousoun Depit, ni pwarero, oh ni imwen sounpei kan.

¹⁷Mehn Lipai pwukat me peusehla onohnsapahl en kehlo: Rehum nein Pani me kauwada peuspen kehlo; Asapaia, kaunen apalien kahnimw Keila, peusehla pwehki eh wia wiliepen eh kahnimw;

¹⁸Pappai nein Enadad, kaunen apalien kahnimw Keila teio, me peusehlahsang;

¹⁹Eser nein Sesua, kaunen Mispa, peusehla mwohn imwen nahk dipwisoun mahwen kan, lellahng wasa me kehlo wet ie;

²⁰Paruk nein Sappai peusehlahsang, lellahng ni wenihmwen imwen Samworo Lapalap Eliasip;

²¹Meremod, nein Uraia me eh pahpa kahlap Akkos, peusehlahsang, kodalahng ni imwin imwen Eliasip.

²²Samworo pwukat me peusehla onohnsapahl en kehlo: Samworo kan sang wasa kan me kapilpene Serusalem me peusehlahsang;

²³Pensamin oh Assup me uhd peusehla wasa me mihte mwohn imwara ko; Asaraia, nein Maaseaia me eh pahpa kahlap Ananaia, peusehla wasa me mihte mwohn imweo;

²⁴Pinnui nein Enadad me uhd peusehlahsang ni imwen Asaraia kolahng ni keimw en kehlo;

²⁵Palal nein Usai me peusehla, tepida ni keimw en kehlo oh ni wasahn iroir en palipowehn tehnpesen nanmwarki limwahn imwen sounsilasil; Pedaia nein Paros me peusehlahsang, kolahng ni imwin palimese limwahn Ewen Kelen Pihl oh wasahn iroir en silepen Tehnpas Sarawio. (Wasaht mi limwahn wasa kis nan kahnimwo me adaneki Opel, wasa me tohndoadoahk en Tehnpas Sarawio kin kousoan ie.

²⁶Palal nein Usai me peusehla, tepida ni keimw en kehlo oh ni wasahn iroir en palipowehn tehnpesen nanmwarki limwahn imwen sounsilasil; Pedaia nein Paros me peusehlahsang, kolahng ni imwin palimese limwahn Ewen Kelen Pihl oh wasahn iroir en silepen Tehnpas Sarawio. (Wasaht mi limwahn wasa kis nan kahnimwo me adaneki Opel, wasa me tohndoadoahk en Tehnpas Sarawio kin kousoan ie.

²⁷Ohl akan en Tekoa kauwada peuspeo, iei arail keriaun mwekid, sang wasa kis sallahng wasahn iroir laudo mehn sile Tehnpas Sarawio lellahng ni kehlo limwahn Opel.

²⁸Pwihn en samworo ehu me uhd peusehla, kolahng ni paliepeng sang ni Ewen Kelen Oahs, emenemente pein kauwada kehlo mwohn imwe.

²⁹Sadok nein Immer me uhd peusehla wasa me mihte mwohn imweo. Semaia nein Sekanaia, sounsilepen Ewen Kelen Palimese, me uhd peusehla.

³⁰Ananaia nein Selemaia oh Anun, kawenemen en nein Salap pwutak, me peusehlahsang, arail keriaun mwekid. Mesullam nein Perekaia me uhd peusehla wasa me mihte mwohn imweo.

³¹Malkaisa, sounwia kohl men, me uhd peusehlahsang, lellahng ni ihmw me tohndoadoahk kan en Tehnpas Sarawio oh sounnetinet kan kin doadoahngki, me mihte ni Ewen Kelen Mipkad kolahng ni Tehnpas Sarawio, limwahn pere me mi pohn paliepeng en palimesehn keimw en kehlo.

³²Sounwia kohl kan oh sounnetinet kan me kaimwisekla peuspen kehlo, sang ni pere pohn keimwo lellahng Ewen Kelen Sihpw.