Read Pohnpeian Nehmaia 9 Bible Online

Nehmaia 9 - Pohnpeian bible

Nehmaia 9

¹Ni rahn kerieisek pahieun sounpwongohte, mehn Israel ko ahpw pokonpene pwe re en kaisihsol oh kasalehda ar nsensuwedkilahr diparail kan. Re pein katohreiraillasangehr mehn liki kan. Irail pwuhriong nan likoun nsensuwed oh kamwerehdiong pohn moangarail akan pwelpar, kilel en ar nsensuwed. Re ahpw kesihnenda oh tapihada sakarkihda diparail kan oh pil dipen ar pahpa kahlap ako.

²Ni rahn kerieisek pahieun sounpwongohte, mehn Israel ko ahpw pokonpene pwe re en kaisihsol oh kasalehda ar nsensuwedkilahr diparail kan. Re pein katohreiraillasangehr mehn liki kan. Irail pwuhriong nan likoun nsensuwed oh kamwerehdiong pohn moangarail akan pwelpar, kilel en ar nsensuwed. Re ahpw kesihnenda oh tapihada sakarkihda diparail kan oh pil dipen ar pahpa kahlap ako.

³Erein awa siluh Kosonned en KAUN-O ar Koht kin wadawadohng irail mahs; a mwuhr, pil erein awa siluh, re kin sakarkihda diparail kan oh kaudokiong Koht.

⁴Mie en mehn Lipai kan pasapas ehu, eri, Sesua, Pani, Kadmiel, Sepanaia, Punni, Serepaia, Pani oh Kenani ahpw kin kesihnenda powe oh kapakap ni ngihl laud ong KAUN-O ar Koht.

⁵Iei mehn Lipai pwukat me wia likwerin kaudok: Sesua, Kadmiel, Pani, Asaneia, Serepaia, Odaia, Sepanaia, oh Pedahaia. Re ahpw nda, “Kumwail uhda oh kapinga KAUN-O, amwail Koht; kumwail kapinga kohkohlahte. Kiht koaros, Maing KAUN, en kapinga lingan en mwaromwi; ahpw iet pwe at kapinga komwi uhdahn sohte itar.”

⁶Irail eri kin wia kapakap wet: “Maing KAUN, komwihte me KAUN; komwi me ketin kapikada nanleng oh usu kan en pahnlahng. Komwi me ketin wiahda sampah oh madau oh audepara kan koaros; komwi me ketikihong mour ong mepwukat koaros. Karis en nanleng kan kin poaridi oh pwongih komwi.

⁷Maing KAUN, komwi me ketin pilada Eipram, oh ketin kahluwahsang kahnimw Ur nan Papilonia; komwi ahpw ketikihong en uhd mwarenkihla Eipraam.

⁸Komw ketin mahsanihada uwen eh loalopwoatohng komwi, iei me komw ketin wiahkihong inou ehu. Komw ketin inoukihda me komw pahn ketikihong wehin Kenan, sapwen mehn Id oh mehn Amor kan, sapwen mehn Peris, mehn Sepus, oh mehn Kirkas kan, pwe en wiahla sahpw me kadaudoke kan pahn kousoanla ie. Komwi eri ketin kapwaiada sapwellimomwi inowo, pwehki omwi loalopwoat.

⁹“Komw ketin mahsanihada lokolok en at pahpa kahlap ako nan wehin Isip; komw ketin karongehda ngilen ar pekipek ni Sehd Weitahtao.

¹⁰Komw ketin wiahiong nanmwarkio manaman kapwuriamwei kei, pil ong sapwellime lapalap akan oh aramas akan, pwehki omwi ketin mwahngih duwen ar kin kaloke sapwellimomwi ko. Iei me komwi ketin ndankihla lel rahnwet.

¹¹Komw ketin wiahiong sapwellimomwi kan ahl apwoat nansed, oh ketin kahluwa irail nan ngalangal. Komw ketin kakihrala nan kepin madau irail kan me pwakipwakih irail, duwehte peitehl ehu me kin kihrla nan melimel en nan madau.

¹²Komw ketin kahluwahkin irail pelien depwek pali ni rahn, oh nipwong marain en uhr kisiniei.

¹³Komw ketidihdo sang nanleng ketididohng pohn Nahna Sainai, oh ketin mahseniong sapwellimomwi kan wasao; komw ketikihong irail kosonned pwuhng oh padahk en komour.

¹⁴Komw ketin padahkihong irail re en kin kapwaiada rahnen Sapad pwe en sarawi, oh ketikihong sapwellimomwi kosoned akan ong sapwellimomwi ladu Moses pwe en patohwanohng irail.

¹⁵“Ni ar duhpeklahr, komw ketikihong irail pilawa sang nanleng, oh ni ar men nimpildahr, komw ketikihong irail pihl sang ni paipalap ehu. Komw ketin mahsanihong irail re en pedolong oh sapwenikihla sahpwo me komw inoukihda me komw pahn ketikihong irail.

¹⁶Ahpw at pahpa kahlap ako aklapalapala oh keptakaila, oh sohla men peikiong sapwellimomwi kosonned akan.

¹⁷Re kahngala peikiong komwi; re manokehla soahng koaros me komw ketin wiahiong irail; re manokehla manaman ako me komw ketin wiahda. Nan ar aklapalap re ahpw pilada kauneparail men me pahn kahluwa irail oh kasapahliraillahng nan mouren lidu nan Isip. Ahpw komwi, Koht emen me kin kupwur mahk; me kin kupwurkalahngan oh limpoak, me sohte kin mwadang engiengda. Sapwellimomwi kalahngan me lapalahpie; komwi sohte ketin likidmelieirailla.

¹⁸Re ahpw wiahda dikedik en eni men ni mwomwen kouwol, dene ih kohto me kahluwairailsang Isip! Maing KAUN, ia uwen lauden ar lahlahwei komwi!

¹⁹Ahpw komwi sohte likidmelieirailla nan sapwtehno, pwehki omwi kalahngan me lapalahpie. Komw sohte ketikihsang irail pelien depweko de uhr kisinieio me kin kasalehiong irail ahl me re pahn weweid ie ni rahn oh nipwong.

²⁰Nan omwi kupwurkalahngan oh kadek, komw ketin mahsanihong irail dahme re uhdahn pahn kin wia; komw ketin katungoalehkin irail manna, ketin kanimpilehkin irail pihl.

²¹Erein sounpar pahisek nan sapwtehn komw ketikihong irail mehkoaros me re kin anahne; ar likou kan sohte mwahn ohla de sohrala, pahnnehrail kan sohte mpwoskipeseng medek.

²²“Komwi me ketin mweidohng pwe re en kalowehdi wehi kan oh sahpw akan me wia irepen sapwarail. Re kalowehdi wehin Espon, wasa me Sihon kaunda, oh wehin Pasan, wasa Ok wia nanmwarki ie.

²³Komwi me ketin kahngederehla nair seri duwehte usuhn pahnlahng kan, oh ketin mweidohng pwe re en kalowehdi oh kousoanla nan sahpwo me komw ketin inoukihong arail pahpa kahlap ako.

²⁴Irail kalowehdi wehin Kenan; komwi me ketin powehdi aramas ako me koukousoan wasao. Komwi me ketikihong sapwellimomwi ko manaman pwe re en wia nsenarail ong nanmwarki kan oh ong tohn Kenan kan.

²⁵Sapwellimomwi aramas akan kalowehdi kahnimw kehl kehlail kei, sahpw pwehl mwahu kei, ihmw me diren kepwe, pwarer en pihl kei me weiweidahr, tuhkehn olip, wahntuhke, oh mwetin wain kei. Re medkilahr ar tungoalelahr soahng pwukat oh mworouroukilahr; re nsenamwahukilahr soangen kamwahu pwukat koaros me komw ketikihong irail.

²⁶“Ahpw sapwellimomwi aramas akan kahngohdilahr oh sapeikiong komwi; re sohpeisang omwi kosonned akan. Re kemehla soukohp ako me kin panawih irail oh padahkihong irail re en wekidekiong komwi. Pak tohtohie re kin lahlahwei komwi;

²⁷iei me komwi ketin mweidkihong pwe ar imwintihti kan en kaloweiraildi oh kaunirailda. Nan arail apwal re ahpw likweriong komwi pwe komwi en ketin sewese irail; komwi eri ketin sapeng irail sang nanleng. Nan omwi kalahngan lapalap komwi ketikidohng irail arail kaun me patohwan kapitirailla sang arail imwintihti kan.

²⁸A ni ar meleileidi, re pwurehng wiahda dihp, komwi eri ketin pwurehng mweidala pwe re en lohdiong pahn arail imwintihti kan. Ahpw ni ar kolulahr oh peki komwi en komourirailla, komw ketin karonge irail nanleng, oh pak tohtohie komw ketin kapitirailla nan omwi kalahngan lapalap.

²⁹Komwi ketin kehkehlingkihong irail re en peikiong omwi padahk kan, ahpw nan ar aklapalap re soikasang rehr omwi kosonned kan, mehnda ma re ese me elen kolahng mour iei kapwaiada sapwellimomwi kosonned akan. Aramas ketihwo oh keptakai, re sohte men peikiong komwi.

³⁰Nan sounpar koaros komw kin ketin panawih irail ni kanengamah. Sapwellimomwi soukohp akan kin kohpada, ahpw sapwellimomwi aramas akan sohte kin men rong, ihme komw kin ketin mweidkihong wehi teikan en kin kaunda sapwellimomwi aramas akan.

³¹Ahpw iet, pwehki omwi kalahngan eh lapalahpie, komw sohte ketin likidmelieirailla de kauweirailla. Pwe komwi me kupwurkalahngan oh kupwur mahk.

³²“Maing Koht, at Koht, ia uwen omwi lapalahpie! Ia uwen omwi lammwin, ia uwen omwi roson! Komw kin ketin loalopwoatohng sapwellimomwi inou kan. Sang ni ahnsou me nanmwarkien Asiria kan kin kalokei kiht, lelledohng ahnsou wet, ia uwen lokolok me se aleier! At tungoal nanmwarki kan, at tungoal kaun akan, at tungoal samworo kan, at tungoal pahpa kahlap akan, oh at tungoal aramas akan koaros patohwan aleier lokolok laud. Komw ketin tamanda uwen tohtohn at lokolok kan.

³³Komwi me ketin pwung ni omwi ketin kalokei kiht; komwi me ketin loalopwoat, a kiht se dipadahr.

³⁴At pahpa kahlap ako, at tungoal nanmwarki kan, kaun akan oh samworo kan, sohte patohwan kapwaiada sapwellimomwi Kosonnedo. Re sohte rong sapwellimomwi mahsen kan oh kehkehlik kan.

³⁵Sang ni omwi kupwuramwahu nanmwarki kan kin kaunda sapwellimomwi aramas akan, ni ar kin kousoan nan sahpw laud oh mwahu me komw ketikihong irail, ahpw re sohte wekideksang dihp pwe re en papah komwi.

³⁶Eri met, se wialahr lidu kei nan sahpw me komwi ketikihong kiht, nan sahpw mwahu wet me kin kihong kiht at tungoal kisin mwenge.

³⁷Audepen sahpw kin kohla rehn nanmwarki kan me komw ketikihong kiht pwe re en kaunkitada, pwehki at dipadahr. Re kin wiahiong kiht oh nait mahn akan dahme re kupwurki oh se mihkihla nan apwal laud!”

³⁸Sang ni kahrepe pwukat koaros me wiawiher, kiht, mehn Suhs kan, se patohwan wiahda inou lapalap ehu me ntinting nan doaropwe, oh at tungoal kaun akan oh mehn Lipai oh samworo kan kadehdehkiher neirail sidamp kan.