Read Pohnpeian Eksodus 15 Bible Online

Eksodus 15 - Pohnpeian bible

Eksodus 15

¹Moses oh mehn Israel ko eri koulkihong KAUN-O koul pwoatet: “I pahn koulkihong KAUN-O apwoat koulen, kapingpen roson lapalap en sapwellime powehdi, pwehki e ketin kakihralahng nan kepin madau oahs akan oh soundakepahr akan.

²KAUN-O me kehlepei kehlail; ih me ketin kapitiehla. Ih me ei Koht, I pahn kin kapikapinga; ih me Koht en semeio, I pahn kin koulki sapwelime roson lapalap.

³KAUN-O iei sounpei kommwad men; KAUN-O iei mware.

⁴“E ketin sikendiong karis en sounpei en Isip kan oh wararail kan nan kepin madau; kaunen sounpei wadawad koaros ahpw duhla nan Sehd Weitahta.

⁵Ahden sehdo koaduhpwaliraildi; re ahpw kihrla, rasehng peitehl ehu me kin kihrdiong nan kepin madau.

⁶“Maing KAUN, meid kapwuriamwei roson en nin limomwi palimaun; me kin sipedpeseng at imwintihti kan.

⁷Komw ketin kamwomwalahr sapwellimomwi imwintihti kan, ni roson lapalap en powehdi; engieng en nan kupwuromwi kamwasikairaillahr, rasehng mpwulen kisiniei me kin karoangehla dihpw meng.

⁸Komwi ketin peuk sehdo, e ahpw pwalpeseng; wiahla kelen pihl riau, oh ngalangaldier lel nan kapi.

⁹At imwintihtio ahpw kahski, ‘I pahn pwakih irail oh koliraildi; I pahn nehkpeseng ar kepwe kan, oh kihsang irail mehkoaros me I anahne; I pahn usada nei kedlahs, oh adihasang mehkoaros me re ahneki.’

¹⁰Ahpw, Maing KAUN, esingek teieu sang rehmwi, a mehn Isip ko duhla; re kihrla, rasehng leht, nan ahden pihlo.

¹¹“Maing KAUN, ihs rehn koht akan me duwehte komwi, me sarawihe kowahlap? Ihs me duwehte komwi, me manaman lapalahpie, oh lammwin kowahlahpie ni wiepen nin limomwi kan?

¹²Komw ketin kapahwei nin limomwi palimaun, a sampah ahpw kadallehla at imwintihti kan.

¹³Komw ketin loalopwoatohng sapwellimomwi inowo, ni omwi ketin kahluwahier aramas akan me komw ketin kapitalahr; ni manaman en sapwellimomwi roson, komw ketin kahluwadohng irail nin limomwi sarawi.

¹⁴Tohn wehi kan rongehr oh masepwehkadahr; pwunod laud ehu, rasehng medek en neitik, ahpw kepehdier mehn Pilisdia kan.

¹⁵Kaunen Edom kan eri masepwehkadahr, me lapalap en Mohap kan tapihadahr rerrer, tohn Kenan koaros nan kapehd tikitiklahr.

¹⁶Re masepwehkadahr oh lemmwidahr. Maing KAUN, re kilang sapwellimomwi roson, re ahpw uh nennenkihla ar masepwehk lao sapwellimomwi aramas akan douluhlwei- sapwellimomwi aramas akan me komwi kapitasang nan mour en lidu.

¹⁷Komw ketin kahluwairaildo oh koasoanediong irail pohn sapwellimomwi nahna, Maing KAUN, wasa me komw ketin wiahda ie mwoalomwi, Tehnpas me pein komwi ketin wiahda.

¹⁸Maing KAUN, komwi me pahn ketin nanmwarki erein dih koaros kohkohlahte.”

¹⁹Ni weren mehn Isip ko oahs akan, iangahki werennansapw ako oh soundakepahr ako, keidla nansedo, KAUN-O ketin kapwilodohng sehdo pohrail oh koaduhpwalikiniraildi. A mehn Israel ko ahpw kotehla wasao, sapasapal kohla pohn ngalangal.

²⁰Lih soukohp Miriam, rien Aaron, eri ale soangen keseng ehu me ede dampwurin; oh lih koaros idawehnla pil kesekesengki dampwurin oh kahkahlek.

²¹Miriam ahpw koulkihong irail koul pwoatet: “Kumwail koulkihong KAUN-O apwoat koulen, kapingpen roson lapalap en sapwellime powehdi; pwehki eh ketin kakihralahng nan kepin madau oahs akan oh soundakepahr akan.”

²²Moses eri kaunopada mehn Israel ko pwe re en mweselsang ni Sehd Weitahtao kolahng nan sapwtehn en Sur. Re sapasapalki rahn siluh nan sapwtehn oh sohte diar pihl.

²³Re ahpw lellahng wasa me adaneki Mara, ahpw re sohte kak nim pilen wasao pwe me nohn sadik. Ihme kahrehda re kihong eden wasao Mara.

²⁴Aramas ako eri kaulimala oh lipahnedihada Moses, ndahng, “Dahme se pahn nim?”

²⁵Moses eri kapakap ngidingid ong KAUN-O; KAUN-O eri ketin kasalehiong lepin tuhke lep; Moses ahpw kesehdiongete nan pihlo, pihlo pa ioula, sohla sadik. Ih wasaht me KAUN-O ketikihong irail kosonned kei, oh pil ketin song irail.

²⁶E mahsanihong irail, “Ma kumwail pahn peikiong ie douluhl oh kapwaiada dahme pwung, oh dadaur ei koasoandi koaros, I sohte pahn kalokehkin kumwail ehu soangen soumwahu suwed ko me I kalokehkier mehn Isip ko. Pwe iei ngehi KAUN-O me kin kamwahwihkumwailla.”

²⁷Mandahn rahno re ahpw douluhllahng Elim, wasa me utuhnpihl eisek riau oh tuhke pahm isihsek mi ie. Irail eri kauwada imwarail impwal ko wasao limwahn pihl ko.