Read Pohnpeian Eksodus 25 Bible Online

Eksodus 25 - Pohnpeian bible

Eksodus 25

¹KAUN-O ketin mahsanihong Moses,

²“Ndaiong mehn Israel kan en wia kisakis ong ie. Ke ahpw ale soangen kisakis koaros me emenemen pahn pein nsenki kihda.

³Kisakis pwukat pahn mihmi ni kohl, silper oh prons;

⁴likou linen kaselel; wunen sihpw poh mei, ntahnmwel, oh poh weitahta; likou me wiawihkihda wunen kuht;

⁵kilin wunen sihpw wol me koaduh nan poh weitahta; kilin kou kaselel; tuhke akesia;

⁶lehn lamp akan; soangen mehn doalo lehn kei oh warpwohmwahu kan;

⁷karnelian oh kisin takai kesempwal teikan mehn kapwata en Samworo Lapalap ihpod oh mehn kapwata perehpen mwaremware.

⁸Aramas akan pahn wiahda Impwal sarawi ehu ong ie, pwe I en kin koukousoan nanpwungarail.

⁹Re pahn wiahda Impwalo oh kapwate kan pahn kin wiawihda nin duwen koasoandi me I pahn kasalehiong uhk.

¹⁰“Ke pahn wiahda ehu Kohpwa sang tuhke akesia, me pahn reireiki ins 45, tehlap ins 27 oh ilehki ins 27.

¹¹Ke ahpw kidimkihla loale oh liki kohl tohr, kapilkipene kohl keile ko koaros.

¹²Wiahda rihng kohl pahieu mehn wisik oh katengediong ni neh pahieu en Kohpwao, riau apali a riau apali.

¹³Wiahda tuhkehn wisik sang ni tuhke akesia oh kidimkihla kohl,

¹⁴ke ahpw kadil tuhke ko nan rihng ko ni keile riau en Kohpwao.

¹⁵Tuhke ko pahn kin mihmihte nan rihng ko oh sohte pahn kin kohsang.

¹⁶Ke pahn kihdiong nan Kohpwao pelien takai riapali me I pahn kihwei, me kosonned kan ntinting powe.

¹⁷“Ke pahn wiahda pweine me kohl tohr wia, me pahn reireiki ins 45 oh tehlapki ins 27.

¹⁸Pil wiahda kerup riemen me perperda sang kohl,

¹⁹emen pahn mi ni apali pweinen Kohpwao a emen apali. Kerup ko pahn wiawihda patehngete pweinen Kohpwao.

²⁰Ira pahn sohpeipene pohn pweinen Kohpwao oh kapapeseng pehra ko powe oh koaduhpwaldi.

²¹Kihdiong nan Kohpwao pelien takai riapalio oh pwainkihdi pweineo.

²²I pahn tuhwong uhk wasao, oh pohn pweinen Kohpwao nanpwungen kerup riemeno I pahn kihong uhk kosonned koaros ong mehn Israel.

²³“Ke pahn pil wiahda ehu tehpel sang tuhke akesia, me pahn reireiki ins 36, tehlapki ins 18 oh ilehki ins 27.

²⁴Kohl tohr me pahn kidim oh kapilkipene kohl ni keile ko.

²⁵Wiahda mehn kolpene me tehlepe mihmi ni ins 3 oh kohl me pahn kidim mehn kolpeneo.

²⁶Wiahda rihng kohl pahieu oh katengediong ehuehu ni keimw pahieu en nehn tehpelo.

²⁷Rihng ko me pahn kol tuhkehn wa tehpelo, pahn mi limwahn keilen tehpelo.

²⁸Tuhke akesia me pahn wia tuhkehn wa tehpelo oh pahn kidikidki kohl.

²⁹Pil wiahda pileit, kep, sah, oh ekei pwohl mehn doadoahk ong ni meirong en wain. Mepwukat koaros pahn wiawihkihda kohl tohr.

³⁰Tehpel wet pahn koasoansoandiong mwohn Kohpwahn Inowo, oh ahnsou koaros pilawa sarawi mehn meirong ong ie pahn kin mi pohn tepel wet.

³¹“Wiahda ehu dewen lamp me kohl tohr wia. Wiahkihda kapi oh inonde kohl me sukusukda. Wahntuhke kan me pahn kapwata, me iangahki wahntuhke mpwek oh teh, pahn patehngete dewen lampo.

³²Rah weneu pahn uhsang ni keile, siluh sang ni apali, a siluh apali.

³³Ni ehuehu rah weneu ko pahn kapwatki wahnrohs siluh me mwomwen masal en almond iangahki mpweke oh teh kan.

³⁴Inonden dewen lampo pahn kapwatki wahnrohs pahieu me mwomwen masal en almond iangahki mpweke oh teh kan.

³⁵E pahn mie ehu wahnrohs mpwek pahn ehuehu rah siluh ko koaros.

³⁶Mpwek kan, rah kan oh dewen lampo pahn sukusukda ehute sang ni kohl tohr.

³⁷Lamp isuh pahn wiawihda ong ni dewen lamp wet oh koasoansoandi pwe re en kin kamarainih mwowe.

³⁸Wiahkihda kohl tohr tihpw kan oh opwong kan.

³⁹Doadoahngki paun 75 en kohl tohr mehn wiahda dewen lamp oh dipwisawi kan koaros.

⁴⁰Ke pahn kanahieng wiepen mepwukat nin duwen koasoandi me I kasalehiong uhk pohn nahnao.