Read Pohnpeian Eksodus 31 Bible Online

Eksodus 31 - Pohnpeian bible

Eksodus 31

¹KAUN-O ketin mahsanihong Moses,

²“I piladahr Pesalel, nein Uri nein Hur, sang ni kadaudok en Suda,

³oh I audehkidahr ei manaman en dehdehki, saman oh koahiek ong soangen doadoahk koaros en kalingan-

⁴ong ni pilahnihada soangen mwahi koaros, oh ong wiepen soahng kan ni kohl, silper oh prons;

⁵doadoahk en parada takai kesempwal akan, iangahki tuhke; oh soangen doadoahk lingan teikan.

⁶I pil piladahr Oliap, nein Aisamak, sang ni kadaudok en Dan pwe en iang Pesalel doadoahk. I pil audehkidahr koahiek laud tohndoadoahk saman teikan, pwe re en kak wia soahng koaros me I koasoanedier en kin wiawi:

⁷Impwal me I pahn kin ketiket loale, Kohpwahn Inowo oh pweine, mehn kalingan koaros en Impwalo,

⁸tehpel oh dipwisawi kan, dewen lamp kohl tohr oh dipwisawi koaros, pei sarawien isik warpwohmwahu,

⁹pei sarawien meirong isihs oh dipwisawi koaros, peisin en omwiomw iangahki kapi,

¹⁰likou lingan en samworo kan me Aaron oh nah pwutak ko pahn kin likawih ahnsoun ar pahn wia doadoahk en samworo,

¹¹lehn keio oh warpwohmwahu ong Wasa Sarawio. Wiepen mepwukat koaros pahn wiawihda nin duwen me I koasoanedionguhkehr.”

¹²KAUN-O ahpw mahsanihong Moses

¹³en padahkihong mehn Israel kan, “Kumwail pahn kin wauneki rahnen Sapad, ei rahnen kommoal, pwe iei mehn kataman ehu nanpwungen ngehi oh kumwail oh pil kadaudokamwail kan, pwe kumwail en esehla me ngehi, KAUN-O, me wiahkinkumwaillahr nei aramas kesempwal.

¹⁴Iei me kumwail pahn kin wauneki rahno, pwehki eh wialahr rahn sarawi rehmwail. Mehmen me sohte pahn wauneki rahno, pahn kamakamala.

¹⁵Kumwail pahn kin doadoahk erein rahn weneu, a keisuhn rahn, iei rahnen kommoal unsek me kasarawihla ong ie. Mehmen me pahn doadoahk rahno, pahn kamakamala.

¹⁶Mehn Israel kan pahn kin wauneki rahnen kommoal wet nin duwen kilel en inowo.

¹⁷E pahn wiahla kilel poatopoat ehu nanpwungen ngehi oh aramas en Israel kan, pwehki ngehi, KAUN-O, me wiahda nanleng oh sampah erein rahn weneu, oh ni keisuhn rahn I ahpw tokedi sang ei doadoahk oh kommoaldi.

¹⁸Mwurin Koht eh ketin kaimwisekala sapwellime mahsen ong Moses pohn Nahna Sainai, e ketikihong pelien takai riapalio, me pein ih ketin ntingihdier powe kosonned akan.