Read Pohnpeian Eksodus 36 Bible Online

Eksodus 36 - Pohnpeian bible

Eksodus 36

¹“Pesalel, Oliap oh tohndoadoahk saman teikan koaros, me KAUN-O ketikihongirailehr koahiek oh loalokong, me ese wiahda soahng kan me anahnepe mie ong ni kokoudahn Impwal sarawio, pahn wiahda soahng koaros nin duwen me KAUN-O ketin koasoanehdi.”

²Moses eri ekerodo Pesalel, Oliap oh ohl koahiek teiko me KAUN-O ketikihongirailehr koahiek en doadoahk oh me men iang sawas, oh patohwanohng irail re en tapihada doadoahk.

³Re ahpw ale sang reh mehn meirong koaros me mehn Israel ko wapene pwehn sewesehda kokoupen Impwal sarawio. Mehn Israel ko uselahte weuwapene ar mehn meirong ko nimenseng koaros.

⁴Ohl koahiek ko me tapihadahr doadoahk, ahpw patohla rehn Moses

⁵oh patohwanohng, “Aramas akan wapenehr dipwisou tohtohsang me kitail anahne ong doadoahk me KAUN-O ketin koasoanedier kitail en wia.”

⁶Moses eri kadarpeseng pakair nan kahnimpwalo me aramas akan en tokedihsang ar wapene dipwisou ong ni kokoupen Impwal sarawio; aramas ako eri sohla wapene dipwisou.

⁷Pwe dahme wisikpenehr, itarohngehr kanekehla doadoahko.

⁸Ohl me keieu koahiek ni koadoahkpen Impwal me KAUN-O pahn kin ketiket loale, wiahkihda Impwalo sang ni lepin likou linen kaselel eisek me wiawihkihda wunen sihpw poh mei, ntahnmwel, oh weitahta, oh mwomwen kerup kei deiadidi powe.

⁹Lepin likou ko koaros soangen wehteieu, iaht 14 reirei oh iaht 2 tehlap.

¹⁰Re dehkpene limau lepin likou ko wiahla ehu, pil duwehte lepin likou limau teiko.

¹¹Re ahpw kihong ni keilen pelien likou riauo mwomwen pwakel limeisek me poh mei.

¹²Re kihong pwakel limeisek ni pelien likou keieuo oh pil pwakel limeisek ni pelien likou keriauo, re kapahrekihpene pwakel ko.

¹³Re wiahda kisin metehn kateng kohl limeisek, me kolpene pelien likou riauo oh wiahla ehu.

¹⁴Re wiahkihda pweinen Impwalo lepin likou eisek ehu me wiawihkihda wunen kuht.

¹⁵Re wiahda koaros soangen wehteieu, iaht 15 reirei oh iaht 2 tehlap.

¹⁶Re dehkpene lepin likou limau wiahla ehu, oh me weneu teiko ong ni ehu.

¹⁷Re kihong pwakel limeisek ni keilen kahdeng keieuo oh pil pwakel limeisek ni keilen kahdeng keriauo.

¹⁸Re wiahda kisin metehn kateng limeisek oh kolkipene kahdeng riauo oh wiahla ehu pweipwei.

¹⁹Re wiahda pweipwei riau, ehu wiawihda sang ni wunen sihpw wol me koaduh poh weitahta, a ehu sang ni kilin kou kaselel, mehn pwaindi maslikio.

²⁰Re wiahda uhr en Impwalo sang ni tuhke akesia.

²¹Ehuehu uhr reireiki piht 15 oh ins 27 tehlap,

²²mie mehkot me sikeisang imwin ehueheu uhr pwehn kolpene uhr ko.

²³Re wiahda uhr riehk ong palieir,

²⁴oh poahsoan silper pahisek mi pah, poahsoan riau pahn ehuehu uhr pwehn kolada mehkot sikeisang pahn uhr ko.

²⁵Re wiahda uhr riehk ong paliepeng en Impwalo,

²⁶oh poahsoan silper pahisek, riau pahn eheuehu uhr.

²⁷Ong ni palikapi en Impwalo, re wiahda uhr wenepwoat,

²⁸oh uhr riapwoat ong ni keimw kan.

²⁹Uhr en keimw pwukat patpene sang pah kohda lel powe. Ih duwen kosoandien uhr riapwoat en nan keimw kan.

³⁰Eri uhr welipwoat me wiawihda oh poahsoan silper eisek weneu, poahsoan silper riau pahn ehuehu uhr.

³¹Re wiahda lohlo eisek limau sang tuhke akesia, limpwoat ong uhr kan en apali Impwalo,

³²a limpwoat ong apali, oh limpwoat ong uhr kan en palimese oh palikapi.

³³Lohlo en nanwerenge, pahn mi nanpwungen uhr kan, oh tang sang ni apali Impwalo lel apali.

³⁴Re kidimkihla uhr ko kohl oh kihong rihng kohl kei me kolpene lohlo ko, kohl me kidim lohlo ko.

³⁵Re wiahda kahdeng ehu sang likou linen kaselel me wiawihkihda wunen sihpw me poh mei, ntahnmwel, oh weitahta, oh mwomwen kerup kei deiadidi powe.

³⁶Re wiahda lepin uhr pahpwoat sang tuhke akesia oh kidimkihla kohl, me kahdengo pahn kin langada ie, oh katengehkihdi kisin metehn kateng kohl kei. Re ahpw wiahda poahsoan pahieu en silper mehn utungada lepin uhr ko.

³⁷Ong ni wenihmwen Impwalo re wiahda kahdeng ehu sang likou linen kaselel me wiawihda sang wunen sihpw poh mei, ntahnmwel, oh weitahta, me deiad lingan.

³⁸Ong kahdeng wet re wiahda lepin uhr limpwoat, oh katengehkihdi metehn kateng kei, me kidikidkihla kohl, oh wiahda poahsoan prons limau ong lepin uhr pwukat.