Read Pohnpeian Sohp 10 Bible Online

Sohp 10 - Pohnpeian bible

Sohp 10

¹I pwangadahr momour. Komwi ketin karonge ei kaulim ni lingeringer.

²Maing Koht, komwi dehr ketin kadeikiehda. Komwi mahsanihong ie! Dihp dah me I wiadahr?

³Me pwung ong komwi omwi kupwur loallapen? En sautikihla mehkot me pein komwi ketin wiadahr? Oh mwuhr kiparamatki koasoandien me suwed kan?

⁴Komwi kin ketin mahsanih soahng kan duwen me kiht aramas kin patohwan?

⁵Sapwellimomwi ieias pil mwotomwot duwehte en kiht aramas akan?

⁶Eri, dahme komwi kin ketin kilelehkihdi dipei kan koaros oh ketin rapahkihki ei sapwung kan koaros?

⁷Komwi mwahngih me sohte dipei, me sohte emen kak doareiehsang nin limomwien.

⁸Nin limomwi kan me ketin wiaiehda, oh met nin limomwi kan me pil kauweiehla.

⁹Komwi ketin tamataman me komwi ketin kapikiehda sang pwehl; eri, komwi pahn ketin kapwureiehla pwe I en pil wiahla pwelpar?

¹⁰Komwi ketin karosonehda semeio pwehn wiaiehda; komwi ketin kakairiehda nan kapehd en inei.

¹¹Komwi ketikihong tih oh uduk en paliwerei oh kidimkihla tih kat uduk oh kili.

¹²Komwi ketikihongieier mour oh limpoak poatopoat, oh sapwellimomwi epwel me kolokol ie.

¹³Ahpw met I dehdehkiher me sang ni ahnsowo kohdo komwi ketin koasoakoasone ni rir en kauweiehla.

¹⁴Komwi ketin mwasamwasahn ma I pahn wiahda dihp, pwe komwi en dehr ketin mahkikihong ie.

¹⁵Ni ei dipadahr, I diarehr apwal sang rehmwi, ahpw ni ei wia me pwung, sohte kaping sang rehmwi. I paisuwedlahr oh nameneklahr kowahlap.

¹⁶Ma I pahn pweida mwahu pak ehu, komwi kin ketin pwakih ie duwehte laion emen; komwi pil ketin wia sapwellimomwi manaman akan pwe komwi en kauwehkiniehla.

¹⁷Ahnsou koaros komwi ketin sapwellimaniki sounkadehde me pahn uhwong ie; omwi engieng pahi kin lalaudla ahnsou koaros; komwi kin ketin koasoakoasoane ahnsou koaros ehu soahng tohrohr me komwi pahn ketin kauwehkiniehla.

¹⁸Maing Koht, dahme komwi ketin mweidikihong ie I en ipwidi? E konehngete I en kapilsalehdala mwohn aramas eh pahn kilang ie.

¹⁹Ei inensangete nan kapehd en inei kolahng nan sousou mwahusang ei ipwidi.

²⁰Ei mour saikinte pahn imwisekla? Komwi ketin piseksang ie! Komwi ketin mweidohng ie I en pereperenki mahs ahnsou me luhwehdi nan ei mour.

²¹I nektehn mweselda oh sohte pahn pwurodo-% kohkolahng nan sahpw ehu me rotorot oh kansensuwed,

²²sahpw rotorot, mwetehn, oh pingiping, wasa me marain wia rotorot.